مصير غريق 🙄 الجزء الاول

مصير_غريق الجزء الأول
رغدة_حمودة

كان يوم زي أي يوم.. مش فاكر اي حاجه مميزه فيه.. مش عارف اي حاجه عملتها مختلفة تخلي كل ده يحصل.. يمكن ظلمت حد مره وانا مش واخد بالي .. اكيد ده كان ظلم كبير قوي.. اكيد حد دعى عليا خلاني أغرق كده..
انا أمير .. او كنت أمير في بلدي قبل ما أغرق.. في اليوم المشؤوم ده صحيت من النوم على قرب الظهر.. صحيت على أصوات الدوشه اللي عملتها امي.. فتحت ستارة اوضتي و..

ماما: مش كفايه كده نوم احنا داخلين على الظهر..
علت نبرة صوتها شوية
ماما: قوم بقى يا امير
أمير: حاضر يا ماما دقايق وتلاقيني قمت اهو..
ماما: خلاص انا هاعملك سندوتشات .. وشاي .. واستناك بره..
علت صوتها تاني
ماما: ما تنامش تاني بقى..

اتقلبت شويه وقمت براحه.. بصيت من الشباك.. كان الجو جميل جدا.. كنا في أواخر الخريف .. كان مبين انه يوم حلو.. السما صافيه.. الهوا جميل.. اخدت نفس طوييل وكنت متفائل قوي.. اخيرا بدأت اجازة بقى بعد ضغط الشغل اللي فات ده كله..
يومها بعد صلاة المغرب قررت انزل .. اصل كان مستحيل افوت يوم حلو زي ده وأنا فاضي من غير ماخرج.. لازم ارفه وافك عن نفسي شويه بعد توتر الشغل اللي فات..

قمة المتعة عندي كان اني اخرج في جو حلو زي ده.. اشرب نسكافيه فى كافيه يكون بيطل على البحر.. وأطلب أي حلو اكله جنب النسكافيه.. وبعدها اتمشي على طول الكورنيش لغايه ماتعب من المشي.. وارجع البيت.. ياريتني خرجت الصبح.. كان منظر البحر كمان هيبقى احلى.. كان ممكن يومها الصبح اعوم شويه زي مبعشق.. بس مش مشكله اديني نمت براحتي النهارده..

رحت الكافية وبعدها طلعت اتمشى واشم ريحة يود البحر اللي بعشقها.. مكنش في مصيفين .. خلاص المدارس بدأت.. الكورنيش هادي والجو أجمل ما يكون.. وصلت لمكان كنت فيه لوحدي.. انتهزت فرصة ان محدش جنبي وقلت اطلع الموبايل أتصور فيديو في اليوم الجميل ده يفضل ذكرى..
بدأت تشغيل الفيديو.. بصور نفسي وورايا البحر .. قلت اليوم والساعة والتاريخ.. وحكيت ملخص عملت ايه في الخروجه وقد ايه الجو جميل وقد ايه انا مبسوط.. تقريبا دي كانت آخر مرة أقول إني مبسوط ومكنتش اعرف..
رجعت بعدها اشوف الفيديو تاني.. وانا بشوفه لقيت في آخره كان في بنت معديه ورايا.. مش عارف مشفتهاش ازاي.. وقفت على السور فجأة و.. و.. ونطت في الميه!!!

رحت بصيت على البحر بسرعه.. شفتها.. واحدة بتصارع عشان تطلع و تعيش.. فضلت ابص حواليا الناس بعيده.. انا بعرف اعوم كويس لو البحر هادي.. اترددت كتير بس قلت حافضل ألوم نفسي طول عمري لو حصلها حاجه ومحاولتش اساعدها..
نطيت.. كان أسوأ قرار أخذته في حياتي ومكنتش عارف.. كنت عايز بس اساعد.. لو مكنتش نطيت بردك كنت ححس انه أسوأ قرار أخذته في حياتي.. عشان ضميري كان حيأنبني طول عمري..

وانا في البحر حاولت ادور على البنت.. لقيتها جنبي بشويه.. رحت عشان الحقها.. مش عارف ايه حصل فجأه.. لقيت الموج بيعلى جامد .. ازاي يعلى كده والجو كويس.. في ثواني لقيت نقط مايه زي الطوب بتخبط ف راسي.. ازاي تشتي كده دلوقتي .. لقيت السما بتنور .. سامع أصوات وسط صوت موج البحر.. انا عارف ان ده برق ورعد كويس.. حاولت اوصل للبنت وانقذها.. بس مبقتش عارف اسيطر على نفسي اساسا و انقذها..

في لحظه ملقتش حواليا غير موج.. مش عارف بيجيبني منين ولا بيوديني لفين.. حاولت افكر كويس اعمل ايه.. لقيتني بتحرك لتحت من غير ارادتي.. انا زي مكون بلف.. تقريبا.. تقريبا انا دخلت في دوامه..

كانت راسي تحت ورجلي فوق .. ونازل بسرعه.. سرعه عماله تزيد.. بلف كتير وانا مش عارف اقاوم.. الدنيا ظلمه وانا فاقد السيطره تماما.. ومش عارف اتنفس كويس.. وقتها اقتنعت اني بموت.. غمضت عيني جامد وفتحتها تاني.. لمحت نور من بعيد .. في عمق البحر مش عارف جاي منين.. النور ده خلاني اشوف حد بينزل تحتي بشويه.. تقريبا دي البنت اللي نطت..

حاولت اقنع نفسي اني باحلم.. اكيد باحلم.. انا باحلم كتير اني بقع من مكان عالي.. وبصحى قبل ماوصل للارض.. اكيد حصحى قبل مغرق..
مبقتش عارف اتنفس خلاص.. والنور بيقرب.. غمضت عيني.. و..

وصحيت.. اتنفضت.. انتفضت من على السرير جامد وده خلاني اصحى.. فضلت ابلع ريقي جامد .. ووقتها عرفت انه كان كابوس.. الدنيا كانت ظلمه قوي.. اصل انا بحب انام في الضلمه والباب مقفول.. عطشان جدا .. حاولت افتح الاباجوره اللي جنب السرير عشان اشرب مايه من جنبي.. معرفتش احرك ايدي.. انا مربوط!!

……

كنت مش عارف اقول ايه وقتها.. كنت مفزوع.. فضلت انادي على ماما.. بعدها بشويه لقيت الدنيا بدأت تنور..
كان نور غريب قوي أقرب للسماوي.. انا في اوضه كده.. لا دي مش اوضه.. ده زي جحر او كهف.. الحيطان دي عامله زي الصخور.. لونها كان اقرب للكحلي.. انا نايم في سرير وسط المكان.. ايدي ورجلي مربوطين في جنازير حديد.. مش عارف اتحرك.. على الجدار الشمال في فتحه عليها ستاره.. شكل ده المدخل..
سقف الكهف كان بعيد قوي.. فيه زي فراغات في النص.. مش عارف النور جي منين بالظبط .. ولا عارف انا فين وايه جابني هنا.. حتى البنت اللي كانت معايا مش لاقيها..

حسيت بالستاره بتفتح فضلت عيني عليها.. دخل منها تلاته من بعيد.. واحد منهم ماسك زي طبق.. ده شكله اكل جيبه ليا ولا ايه..
بدأو يقربو شويه بشويه.. كل ميقربو اخاف اكتر.. شكلهم مختلف.. دول مش بشر.. عيونهم كبيره قوي.. و جلدهم أقرب لجلد الحيوانات.. ودانهم قد حبات الفول..
استعذت بالله من الشيطان الرجيم كتير.. انا فين.. فضلت اقولها بصوت عالي متقطع وانا مفزوع

أمير: انا فين.. وانتو مين.. انا ايه جابني هنا

كانو بيبتسمو ليا.. قرب واحد منهم عليا وفتح عيني جامد بايده.. حسيته زي ميكون دكتور وبيتطمن عليا.. بعدها بصلهم وقالهم كلام بلغه عجيبه جدا.. مفهمتش منه أي حاجه.. وهما اكيد مش فاهمين مني حاجه.. اه ياني.. وبعدين.. اتفاهم معاهم ازاي كده بس !!!
اللي كان معاه الاكل قطع حته منه وقربها من بقى.. مرضتش اكل.. ريحته كانت شبه السمك المشوي.. وشكله كمان بس انا كنت خايف اكل حاجه.. كان معاه مايه وحاول بردك يشربني.. انا مقدرتش امنع نفسي من الشرب كنت عطشان جدا كنت حاسس ان ريقي بقى زي الحجر..
بعدها رجعو يتكلمو سوا شويه وابتسموا وواحد منهم طلع من المكان اللي احنا فيه..
بعدها بشويه رجع تاني.. بس مكنش لوحده.. كان معاه واحده.. وهما بيقربوا كنت حاسسها مختلفه عنهم.. فعلا دي بشر زيي.. بصتلي وابتسمت..

البنت: حمد الله على سلامتك
انا فضلت متنح وساكت.. مش عارف من الخضه ولا من كتر مانا متوتر..
البنت: ممم انت فاهمني مش كده شكلك عربي
امير: ايوه.. ايوه اه فاهمك.. انا فين.. انتوا مين..
البنت: متقلقش خالص.. حاول تهدي أعصابك.. دول القوم اللي اتقذوك.. طيبين جدا متقلقش منهم..
امير: ورابطني ليه مدام كده.. وشكلهم عامل كده ليه..
البنت: هما خايفين منك بس.. انت مختلف عنهم.. خافوا تفوق.. وتطلع لوحدك .. وتشوفهم بره كتير مختلفين كده .. ممكن تثور عليهم.. بس هما طيبين جدا..
امير:وانت ليه مختلفه عنهم.. وفي زينا تاني ولا ايه
البنت: اكيد عندك اسئله كتير.. انا حفهمك كل حاجه.. المهم تاكل دلوقتي عشان انت تعبان.. انا شويالك سمك بنفسي اكيد بتاكله.. هنا مفيش غير سمك وفاكهه وخضار واعشاب…
امير: تمام حاكل..

البنت بصت لواحد فيهم اللي ماسك الاكل وقالت كلام بلغتهم الي مش مفهومه بعدها ناولها الطبق..

امير:وانا حاكل وانا مربوط كده؟

كلمت البنت تاني الكائن اللي وراها بعدها راح فاكك الجنزير اللي رابطاني
وهيه ناولتني طبق الاكل وقالتلي

البنت: اتفضل

أخذته منها وانا لسه خايف بعدها هيه كملت

البنت: انت اسمك ايه؟
امير: اسمي أمير وانت؟
البنت:اسمي شهد.. اسيبك تاكل دلوقتي .. شويه حاجي نلف في المكان تشوفه .. وتروح للمعبد الكبير تشوف كبير المعبد تتعرفوا على بعض.. و اجاوبك على اي سؤال بيدور في راسك
أمير: ماشي ان شاء الله

وطلعت تاني شهد.. وطلع وراها الكائنات التلاته.. وانا لسه خايف احط اي حاجه في بقي .. بس رغم كده اكلت.. اكلت ببطئ شديد جدا.. كان زي السمك المشوي عادي جدا.. يمكن احلى من اللي باكله في اسكندريه كمان رغم عمري مكنت اكلت احلى منه..
بعدها بشويه رجعت شهد.. وكان معاها كائن واحد بس منهم.. كان ماسك المره دي قوس و سهم ..

شهد:يلا بينا يا امير؟
امير:يلا بينا

بدأت اطلع من المكان الغريب ده لعالم أغرب َواغرب..

تتبع ..

انتظروا الجزء الثاني 😍