من المذنب 🤔🤔

من...عيادة دكتور نفسى..💙🍃

(من المُذنب)..

فى عيادة الدكتور النفسى..
هى كانت قاعدة و بتضحك بكسرة و باينة أوى عليها،،فبدأت تحكى بقا و قالت:
أنا مش عارفة ابدأ منين بس هختصر الموضوع..
أنا كنت متجوزة واحد كنا بنحب بعض جدًا جدًااا يعنى و حارب علشانى أهلى لحد ما اتجوزنا و كنا عايشين بسعادة مقدرش أوصفها خالص كنت بحس أنى فى الجنة والله..
فضلنا كده سبع سنين و أنا خلفت بنوتة جميلة شبهه و كنت بعشقها لسببين أنها بنتى طبعًا و لأنها شبهه و مقدرش أنكر أنى كنت بحبها علشان شبهه أكتر..
بعد سبع سنين جه اليوم اللى فتح عليا لحظات و أيام و ليالى من ناااار
اليوم ده يوم ما صديقتى رجعت من السفر (صديقة الطفولة) كانت مسافرة من عشر سنين أمريكا مع أهلها و جه اليوم اللى حبت ترجع فيه مصر لأنها وحشتها و أنا وحشتها أكتر (هى اللى قالت كده)..
المهم بقا بعتلها جوزى يجيبها من المطار و أنا بحسن نية و انه عادى و كده ..
قعدت معانا فى البيت و أنا كنت بعاملها گ ملكة متوجة والله و كنت بعملها كل حاجة بس كنت مبسوطة و قلبى راضى لأنى كنت بعشقها بمعنى الكلمة..
مر شهرين و انا ملاحظة ان جوزى تصرفاته بدأت تتغير من فترة،يعنى كان يقعد فى البيت كتير و يهزر معاها أكتر و حاجات تانية كتير،و كان بيبعد من نحيتى أنا!!..
بس أنا من اللى كنت بشوفه مقدرتش أسكت خلاص..
فى يوم كانت هى هتخرج فقالها استنى اوصلك فأنا قولتله لا خليك معايا محتاجالك بصلها و بصلى و هز راسه بالموافقة..
هى خرجت و هو قعد يبصلى لفترة كبيرة خالص و قام قايل فجأة:بتحبيها أوى؟
ضحكت ضحكة غصب عنى و قولت: طبعًا يعنى دى صديقة الطفولة! .
قال:يعنى مش بتغيرى و لا هتغيرى منها؟!
ضحكت تانى و قولت:و هغير منها ليه يعنى؟!!
ضحك ضحكة خبيثة و قال:طب حتى لو بقت ضرتك؟!
كنت ماسكة طبق وقع من ايدى اتكسر بس أنا مااتحركتش حسيت أنى اتشليت من الكلام او اتكهربت..حسيت انى اتأذيت جامد ..
قولتله و أنا لسه مصدومة:أنت بتهزر صح؟!
قال بكل هدوء:و هو الجواز فيه هزار
بصلى بقرف و قالى و هو بيقوم من ع الكرسى:ع العموم أنا قررت خلاص و هتجوزها ده حتى هى موافقة
صرخت و قولتله هى  مين دى اللى موافقة ده مستحيل تعمل فيا كده...
قالى:يعنى مصدقاها فيا و مش مصدقاها فيها؟!
خلاص مبقتش قادرة اخد نفسى و وقعت ع الأرض (اغمى عليا) محستش بنفسى غير و هى جنبى بتفوقنى و هو واقف وراها
قولت الحمدلله يمكن كنت بحلم لقيتها قالتلى:هو بجد انت ِ زعلتى للدرجة دى لما قال هيتجوزنى؟!
بصيتلهم الاتنين وانا مش مصدقة نفسى مش مصدقة اى حاجة
بس قعدت اعيط و اعيط جامد و اتشنجت و طردتهم برا الأوضة
نمت و صحيت بالليل لميت هدومى و هدوم بنتى و خرجت من الأوضة أنا و هى
لقيتهم قاعدين سوا و جنب بعض و صرخ فى وشى لما شاف الشنط و قال:انتِ هتهزرى يعنى؟
قولتله:لو مسيبتنيش أمشى و أروح بيت أبويا صدقنى هيكون فى كلام تانى
قالى:لو خرجتى من البيت هطلقك
ضحكت بصوت عالى و قولتله:يااااه ده اللى اتمناه والله حاليًا
قام مصرخ فى وشى و قال:أنتى طالق طالق طالق
كل ده و هى قاعدة و بتضحك
مشيت و خلاص كنت هخرج من الباب لقيتها جت و قالتلى:ما كنا هنكون احنا الاتنين سوا
تفيت عليها و قولتلها:ميشرفنيش أقعد فى البيت ده تانى ..
خرجت و روحت بيت أهلى طبعًا كلهم اتصدموا من جوزى و صديقتى اللى مكنش ليا غيرهم و الصراحة اتصدموا منها أكتر لأنها صديقة عمرى...
بس والله الحق يتقال أهلى شايلينى أنا و بنتى فوق راسهم و مش مقصرين فى حقنا خالص،،طبعًا فى ناس قالولى حاولى تعملى أى حاجة علشان بنتك متبقاش (متلطمة) و فى اللى قالولى كرامتك متهينهاش أكتر من كده و فى و فى و فى ......
بس أنا مرجعتش علشان مقبلش أكون مع واحد خاين و مقبلش لبنتى تعيش مع أب سئ شبهه..
و طبعًا جيت اتعالجت هنا بسبب أنى كنت متدمرة خالص و نفسيتى كانت فى الأرض..
من يومين بقا جالى البيت و حالته (تصعب ع الكافر)..
بابا سأله:مالك؟
عيط و صرخ و قاله:ضحكت عليا و سرقتنى و خليتنى وقعت على ورقة الطلاق و أنا معرفش و خدت كل حاجة بتاعتى..
طبعًا بابا مقدرش يقوله حاجة بس أنا خرجت من الأوضة بتاعتى و قولتله اطلع برا البيت ده و اياك تدخله تانى أنا اتعذبت بسببك و عمرى ما أقدر أرجعلك يا خاين..
بنتى خرجت من الأوضة و شافها و شافته بس بعدت عنه و قالتله (أنت بابا وحش و بابا لازم يكون حلو و أنا خلاص مش عاوزة بابا)..
بعد ما سمع كده منها خرج من نفسه كأنه اتكسر اضعاف كسرته....
و فعلًا كما تَدين تدان حتى لو فى آخر الدنيا....
النهاردة بقا خلاص مش هتعالج بالمهدئات تانى كفاية كده حاسة أن ربنا رزقنى الصبر و حسيت أنى فعلًا مرتاحة..

ريهام_يحيى