غادرتني روحي

من "عيادة دكتور نفسي"

"غادرتني روحي"

..
كالعادة على الكرسي في عيادة الدكتور النفسي..
كانت سارة قاعدة و بتحكي حكايتها و كانت ماسكة فردة حذاء كعب و كالعادة بردو كانوا بيسمعوها و البسمة على شفايفهم فقالت:
أنا اسمي سارة عندي ٢٥ سنة
حكايتي بدأت من ست سنين لما شافني في فرح بنت خالتي كان صاحب العريس اللي هو ابن خالتي بردو
كنت تعبت من لبس الكعب جدًا فقعدت في جنب بعيد عن كل الناس و بعيد عن القاعة و قلعت الكعب خالص و فضلت أضحك من كتر ما أنا حسيت براحة كبيرة
فضلت أضحك و أضحك لحد ما لقيت صوت بيقول:في حاجة يا آنسة؟!
قُلتله:هااا؟!
حاجة ايه؟!
قال:إنتِ بتعيطي؟!
ضحكت بعد ما لفيت وشي الناحية التانية و قُلتله:لا لا أنا بضحك
ضحك نص ضحكة و قال:هو إنتِ تبع العريس و لا العروسة؟!
ضحكت و قُلتله:الإتنين
هو ابن خالتي و هي بنت خالتي
قال:اممم أنا بقا صاحب العريس
اسمي إسلام
و إنتِ؟!
أنا اكتشفت إني بعمل حاجة غلط بإني واقفة كده مع واحد غريب و كمان بيكلمني و يضحك يا نهار أبيض لا أنا لازم أسيبه و أمشي
جريت بسرعة و أنا ماسكة الجزمة بتاعتي و لما وصلت للقاعة لقيت إني معايا فردة واحدة بس!!!
إيه ده؟!
طب راحت فين دي؟!
اليوم عدى خلاص و أنا روحت البيت نمت كتير نمت كتير أوي
عدى على الفرح تقريبًا أسبوع لقيت محمد ابن خالتي جه يقول لبابا إن في واحد صاحبه شافني في الفرح و عرف إني بنت خالته و عاوز يتقدم ليا
قال إنه كويس سواء في خلقه أو خلقته و كمان محاسب و و و و و و و.....
بابا فرح بالعريس أوي و كده و نفس الكلام ماما
أنا ماكنتش معترضة على حاجة و بابا قالي صدقيني مش هجبرك على حاجة
بابا قال نعمل الرؤية الشرعية و أنا وافقت عادي
جه يوم الرؤية و بابا جه نادالي من الأوضة بتاعتي و قعدت في الصالون لقيت مفاجأة إن اللي متقدم هو هو اللي قابلته في الفرح!!!
أنا قعدت على الكنبة و بابا قال اتكلموا شوية سوا و خرج و ساب الباب مفتوح
لقيته ماسك شنطة و بيفتحها قبل أي حاجة خالص و قبل أي كلام و المفاجأة التانية إنه طلع من الشنطة دى الفردة التانية من الجزمة بتاعتي!!!!!
ضحك و قال:هو إنتِ عندك كام سنة؟!
ضحك بتلقائية لضحكته مش عارفة ليه و قُلت:١٩ سنة...ليه؟!
قال:لإن دي مقاس ٣٦!!!!
في واحدة عندها ١٩ سنة مقاسها ٣٦؟!!!!
ده مقاس أطفال؟!!!!
كتمت ضحكتي و قُلتله:دلوقتي إنت جيت ليا علشان شُفتني مرة واحدة بس؟
بصلي و قال:أومال كنتِ عاوزاني أتكلم معاكِ أول و أقولك تعالي نتعرف على بعض علشان أشوف ينفع نتخطب و لا لاء؟!
أنا مارضاش يا بنت الناس أعمل فيكِ كده أنا عندي أخت و مارضهاش ليها
على العموم أنا اسمي إسلام و عندي ٢٦ سنة و الحمدلله محاسب في شركة كبيرة للإستيراد و التصدير و جاهز إلى حد ما
ممكن مش ملتزم أوي بـ.....
قُلتله:يعني مش بتصلي؟!
ضحك بسخرية كده و قال:هو الإلتزام يعني صلاة؟!
الصلاة فرض علينا و الحمدلله مش بسيب فرض و بقرأ وردي
بس ساعات بسمع أغاني و كده بس بحاول بردو أكون صالح و بجاهد
بحاول أكون كويس
فهل ترضي بيا يا بنت الناس؟!
أنا غصب عني ضحكت و قُلتله:موافقة
هعرفك بنفسي أنا كمـ....
قاطعني و قال:أنا مش عاوز أعرف حاجة يا سندريلا زمانك و عطالي الشنطة اللي فيها الجزمة و خرج لبابا و أنا خرجت بعده قُلتله إني موافقة
اتخطبنا سنة و كتبنا الكتاب و بعدها بشهرين كان الفرح..
كنت عشقته و عشقت رجولته و روحه الحلوة
و حبيت حبه ليا بجد..
كلمني في الموبايل يوم الفرح بعد ما خلصت لبس الفستان و الميك أب و كان جاي ياخدني و هو فرحان و مبسوط أوي إن إحنا هنكون سوا خلاص
كان بيقول:أنا هموت من الفرحة يا سارة بجـ.....
صوته اتقطع بعد صوت خبطة جامدة و بعدها كلام كتير سمعته زي لا حول و لا قوة إلا بالله
ده شكله مات
الخبطة كانت جامدة
كل ده و أنا مش مستوعبة حاجة و لا قادرة أجمع حاجة
معقول يكون فعلًا عمل حادثة؟!
لقيت حد بيكلمني و بيقول:آلو آلو
رديت و أنا مزهولة:أيوة آلو
قال:تعرفي صاحب الموبايل ده؟!
قُلت:ده جوزي
قال:عمل حادثة جامدة و هننقله على مستشفى"...."
كلمت ماما و بابا و أنا بعيط و أختي كانت معايا عند الكوافير
روحت المستشفى بفستاني و لقيتهم بيقولوا البقاء لله
قُلت للدكتور:إزاي؟!
قالي:البقية في حياتك
إزاي يموت؟!
يموت يوم فرحنا؟!
يموت في اليوم اللي بيحلم بيه؟
يموت إزاي يا ربي
بابا جه حضني و قالي:وحدي الله يا بنتي
و أنا أصرخ و أقول:يموت إزاي و يسيبني؟!
و بابا يحضن فيا أكتر و يقول:وحدي الله يا بنتي
أنا صريخي زاد و قُلت:روحي سابتني يا بابا روحي سابتني
و هو يقول:وحدي الله
قُلت:لا إله إلا الله
إنا لله و إنا إليه راجعون
من يومها ليومنا ده و أنا بتعالج و مش قادرة أنسى أي حاجة
بقالي ست سنين عايشة على السنة و شهرين اللي عشتهم معاه و بالذات الشهرين اللي بعد كتب الكتاب لإن مشاعره ظهرتلي بجد و حبه ليا ظهر وقتها أكتر
الحمدلله راضية بس بجد مش حمل الصدمة لدلوقتي و لسه بيجيلي حالات صرع
عشت معاه سنة و شهرين بعمري كله
روحي سابتني
روحي بتحن لروحه
روحي سابتني
خلصت حكايتها بين دموع كل اللي قاعدين
ضحكت ضحكة مكسورة و قالت:أنا بتمنى من ربنا يجمعني بيه في الآخرة و أكونله حور زي ما كان بيقول ليا...!

ريهام يحيى