الفصل العاشر من "لفة ورد"🌸🌸

الفصل العاشر من (لفة ورد)..💐💜

اتصلت دنيا به و حكت له كل ما سمعته فقال لها بكل ثقة:متخافيش أنا هعمل حاجة هتخلي ثقته فيها تبقي في الأرض
ثقته فيها هتنعدم و مش هيقبلها تكون مراته و ساعتها هي هتكون بتاعتي و هو هيكون ليكي
ضحكت دنيا و قالت:ربنا ما يحرمني منك يا حسن
حسن:ولا منك يا قلب حسن
دنيا بتساؤل:بس بردو مقولتليش عرفتها إزاي؟!
ضحك حسن و قال:هحكيلك كل حاجة يا ستي
أنا أول ما شوفتها كنت مع ابن خالتي الزفت إسلام يوم ما كان رايح يتقدم لأختها
قاطعته دنيا قائلة:يعني ابن خالتك هو اللي هيكتب كتابه علي أختها ده؟!
حسن:أيوة يا ستي
و يومها شوفت جميلة و من غبائي بان عليا أنها عجبتني و سألت إسلام هي مخطوبة و لا لأ؟!!
قام قايلي ابعد عنها و مش هسمحلك تقرب منها
بس هي عجبتني و مش هسمح تكون غير ليا
دنيا بـشَر:وأنا هعمل كل اللي أقدر عليه علشان يبعد عنها حمزة و يكون ليا بردو
حسن:طب بصي كده معاكي صور ليها؟
دنيا:أنا مش معايا و هيبقي معايا ليه للجربوعة دي!
حسن:لمي نفسك يا ماما
دنيا:ماااشي
بس عاوز صور ليها ليه؟
حسن:هفبرك صور ليها علي صور مش كويسة يا ماما أنتِ بتسألي أسئلة غير منطقية
شهقت دنيا و قالت:لا مينفعش حرام مش للدرجة دي مش هعمل كده
تكلم حسن بجدية:أنتِ هتسمعي الكلام ولا أبعت لأهلك فيديوهات و صور ليكي و أنتِ معايا!؟
شهقت دنيا مرة أخري و قالت:أنت سجلت ليا فيديوهات؟
ضحك حسن و قال بشر:أومال أسيبك كده؟!!
ما أنا لازم أستفيد منك يا حلوة
بكَت دنيا و قالت:علشان خاطري بلاش تعمل كده ده أنا أهلي يموتوني
حسن بنبرة مستفزة:يبقي تسمعي كلامي بالحرف يا شاطرة
دنيا:حاضر
هتصرف و أجيب صور ليها من أي حتة
قالت هذا ثم أغلقت الهاتف بدون حتي أن تودعه و ظلت تبكي ثم دخلت المركز و هي تبكي فقابلتها جميلة
فقالت لها:مالك يا دنيا بتعيطي ليه؟
نظرت لها دنيا بتعجب و قالت في نفسها:معقول أكون بأذيكي و أنتِ خايفة عليا علشان بعيط بس!؟
قطع شرودها سحب جميلة لها من يدها لتجلسها و هي ما زالت تبكي بحرقة و قالت لها:احكيلي مالك يا دنيا
لو محتاجة أي حاجة أنا هنا و نورا كمان و أنا أسفة لو زعلتك مني في يوم
نظرت لها دنيا و احتضنتها و هي تبكي و تقول:أنا آسفة يا جميلة أنا اللي آسفة أنا غلطت في حقك جامد والله غلطت في حقك جامد و لسه بغلط
تعجبت جميلة من أخر كلماتها و لكنها لم تسألها كي لا تجعلها تبكي أكثر
و قالت لها:ربنا بيسامح يا دودو احنا مش هنسامح يعني!
ابتسمت دنيا و مسحت دموعها و قالت لها:أنتِ طيبة أوي يا جميلة
جميلة:اممممم طب بصي بقا لو مبطلتيش عياط مش هجيبلك من الشيكولاتة اللي معايا
ضحكت دنيا بشدة و قالت:لا خلاص خلاص أهو
جميلة بكسوف:طب عاوزة أعزمك علي خطوبتي
هي خطوبة و كتب كتاب سوا يعني
ضحكت دنيا بكسرة و قالت لها:ألف مبروووك يا جميلة بإذن الله هاجي طبعًا
جميلة:إن شاء الله...يلا نقوم نظبط المركز
دنيا:يلا
**************************
كان حمزة في طريقه إلي منزله فلمح فتاه تبيع المناديل واقفة بظهرها فنادي لها قائلًا:يا حلوة تعالي هنا
أدارت ظهرها فوجدها جميلة الطفلة التي رآها من قبل فتفاجئت و وضعت يديها علي فمها بحركة طفولية وقالت:عمو حمزة!!
فرح حمزة و قال لها:جميلة حبيبتي إزيك؟؟
جميلة:الحمدلله والله يا عمو حمزة عارف المرة اللي فاتت الفلوس اللي عطيتها ليا اشتريت أكل كتير للبيت و علاج لماما وكمان فضل معايا فلوس
حمزة:امممم طب لو قولتلك أني هعطيلك كمان فلوس دلوقتي
و هَم ليضع يده في جيبه فمسكتها و قالت له:لا يا عمو حمزة أنا مش هينفع أخُد منك فلوس تاني
حمزة بتعجب:ليه يا جميلة؟!
جميلة بحَرَج:أصل والله يا عمو بتحرج أوي و أنت عطيت ليا فلوس كتير المرة اللي فاتت
ضحك حمزة و قال:طب اعتبريني أخوكي الكبير و مش هتتحرجي مني
نظرت له جميلة و قالت:طب حاضر بس علي شرط
حمزة:امممم اتفضلي
جميلة:نتفق علي يوم نتقابل فيه كل أسبوع
حمزة:ياااااه ده أنتِ طلبك صغنن شبهك أنت تؤمر يا باشا
فرحت جميلة و قالت:طب أنت عاوز يكون يوم إيه!
حمزة:قولي أنتِ
جميلة:امممم يووم السبت
حمزة:تؤمري بس ليه السبت؟!
جميلة:علشان ده اليوم اللي شوفتك فيه
نظر حمزة لعيونها و لمح الصِدق الذي في كلامها فاحتضنها و قال لها:أنتِ جميلة أوي يا جميلة
قالت له:شكرًا يا عمو
حمزة:طب هتقبلي مني فلوس بقا؟
جميلة بحرج:حاضر
أعطاها حمزة المال و اتفقوا علي موعد اللقاء و ودعها و غادر
***********************
عند خروج الفتيات من المركز قالت دنيا بارتباك:طـ طب أنا همشي من الشارع ده علشان عندي مشوار مهم ها
ودعتها جميلة بحب و ودعتها نورا ببرود لأنها غاضبة منها منذ ذلك اليوم الذي أتت فيه مع رجل غريب
عندما ذهبت قالت نورا:مش مرتاحة
جميلة:علي فكرة والله قلبها أبيض أوي
نظرت لها نورا و قالت:أنتِ اللي بتقولي كده؟!
طب حصل ايه خلاكي تغيري فكرتك عنها؟!
جميلة:الصبح لما جَت كانت بتعيط جامد و كنت بحاول أهديها
و بردو مرضتش أضغط عليها علشان متزعلش مني حسيتها غلبانة كده
بس قالتلي كلمة غريبة
ضيقت نورا عيونها و قالت:قالت ايه؟
جميلة:قالتلي أنها غلطت في حقي جامد و لسه بتغلط
نورا:البت دي وراها مصيبة
جميلة:لازم نحسن الظن يا بنتي
نورا:شوف شوف مين اللي بيقول نحسن الظن
جميلة:أصل شوفت فيديو علي الفيس واحد بيقول فيه
أن مرة واحد راح لسيدنا علي و قال لُه ده في واحد بيقول كلام كُفر و قال كام حاجة كده
أنه بيكره الحق
و بيحب الفتنة
و عنده ما لا عند الله
و بيعمل اللي مش بيعمله الله
و بيصلي من غير وضوء يبقي كده كافر
قام سيدنا علي رد عليه و قاله أن الموت حق فهو بيكره الموت فعلشان كده بيكره الحق
و الأموال و الاولاد فتنة و هو علشان كده بيحب الفتنة
و عنده أولاد و ربنا مش عنده أولاد لم يلد و لم يولد فعلشان كده عنده اللي مش عند ربنا
و بينام و ربنا مش بينام و ده اللي بيعمله و ربنا مش بيعمله
و الصلاة علي النبي بتبقي من غير وضوء
يمكن تكون دي احتمالات لكلامه و هو جاب أبعد الاحتمالات
فاحنا لازم نحسن الظن حتي لو في كلام كتير بيتقال
نورا بدهشة:يااااااه ده أنا حاسة أنك اتغيرتي كتير
الكلام الحلو ده مبسوطة أني بسمعه منك يا جميلة والله ربنا يفرح قلبك بكل خير
**********************
قابلت دنيا حسن و قالت له باشمئزاز:أنا مش هكمل في القرف ده
حسن بعصبية و غضب:يعني أنتِ جايباني بالسرعة دي و علي ملا وشي و تقولي مش هتكملي؟
ليه مش هتكملي يا روح أمك؟
دنيا بغضب أكثر:لأن هي متستاهلش مني كل اللي هعمله ده
و بعدين أنا مش بحب حمزة أنا كنت أعجبت بيه بس ده إحساس و راح
لكن كنت عاوزاه علشان بس أغيظها لكن دلوقتي أنا مبقتش عاوزة غير رضي ربنا عني
ضحك حسن بسخرية وقال:رضي ربنا؟؟!!!!!
أنا مش مصدق ودني!!....
يا ماما الشمال شمال حتي لو لبست إسدال
و بعدين لو مش هتعملي لنفسك إعملي ليا و بأمر مني علشان مبعتش الفيديوهات اللي معايا لأهلك يا شاطرة
دنيا بعدم اهتمام:ابعت الفيديوهات عادي و لا يهمني
قالت دنيا هذا بكل ثقة لأنها تذكرت أنه عندما تقابلا في المطعم الذي يقصد أنهم كانا معًا به كان هو يتواري من أُناس هناك بسبب أنه احتال عليهم و سرق منهم أموال بالخداع
فلا يُعقل أنه سيورط نفسه أيضًا بهذه الڤيديوهات!!
رد عليها و قال:اممم أفهم من كده أنك مش خايفة خالص؟!
دنيا بثقة أكثر:لا مش خايفة غير من اللي خلقني يا أستاذ حسن
مع السلامة و خليك فاكر أنك لو أذيتها أو لمست منها شعرة واحدة أنا اللي هوديك في ستين داهية و أفضحك قدام أهلك بكل الأدلة اللي معايا
قالت هذا و رحلت
قال في نفسه بتعجب:يا تري إيه اللي غيرها فجأة؟!
و معقول تكون مرضتش تسمع كلامي لأنها واثقة أني مش معايا ڤيديوهات زي ما بقول!
يلا تتحرق أنا هعمل كل حاجة بنفسي مش محتاج حيوانة زي دي
**************************
ذهب حمزة لمنزله و ألقي التحية قائلًا:السلام عليكم يا أهل الدار
ردوا جميعًا:و عليكم السلام و رحمة الله و بركاته
قال مصطفي:أنت مكلمتش جميلة تسأل عليها و لا علي أهلها خالص زي ما أمك قالت ولا ايه؟
نظر حمزة للأرض و قال بكسوف:لا يابابا
مصطفي:طب ده ينفع يعني؟!
حمزة و هو ما زال يحدق للأرض:لا مينفعش
مصطفي:طب اتصل بيوسف يلا علشان تتطمن عليهم
حمزة:حاضر يابابا
اتصل حمزة بيوسف ففتح يوسف و قال:السلام عليكم
حمزة:و عليكم السلام يا يوسف
أخبارك ايه؟
يوسف:أنا زي الفل وأنت؟
حمزة:الحمدلله والله
يوسف:يدوم الحمد والخير
حمزة:تسلم...
أنا كنت عاوز أسألك علي الناس اللي عندك أخبارهم ايه و هي أخبارها إيه؟
ضحك يوسف و قال:الحمدلله و هي الحمدلله كويسة
ما تيجي النهاردة شوية بالليل
حمزة:بمناسبة ايه بس و بعدين أهلك هيقولوا إيه يابني!
يوسف:باااابااااااا ماااماااااااا
حمزة بتوتر:ايه ايه بتزعق ليه بس؟!!
يوسف:اصبر
حمزة بتوتر:ماشي
محمد بفزع:في ايه يابني بتنده من و أنت في الأوضة ليه؟
يوسف:حمزة يا والدي اتصل يسأل علينا فقولتله ييجي يتطمن بنفسه كده انا غلطت؟!
عزة:لا طبعًا احنا بيتنا هيتفتح لمين قبله يعني!
يوسف:سمعت ياباشا؟!
حمزة و قد احمر خجلًا:أيوة سمعت
سمع يوسف الباب يُفتَح فكانت جميلة فقال:و ست الحسن جت أهي
خفق قلب حمزة بشدة و قال:طب طب أنا هقفل ها؟!
أنت قولت أجي امتي؟
يوسف:استني لما نسأل ست الحسن
وجه حديثه لجميلة قائلًا:يا ست جميلة حمزة كان اتصل يسأل علينا و قولتله ييجي شوية يشوف أحوالنا بنفسه... موافقة؟
فرحت جميلة بشدة و ضحكت ضحكة مسموعة و قالت:أيوة أيوة ييجي طبعًا
نظرت لنفسها و قالت بصوت يسمعه حمزة:بس لازم أظبط نفسي يااالهوي فين الأوضة!
سمع حمزة هذا فضحك بشدة و قال في نفسه:هي مالها كده؟!
ضحك يوسف و قال:علي فكرة هو لسه علي التليفون
جميلة بدهشة:ايييه يا نهار أبيض!!!!
واحمر وجهها و دخلت غرفتها بسرعة و هي تتمني أن تنشق الأرض و تبتلعها
ضحك يوسف و قال لحمزة:الوقت اللي تحبه تعالي فيه ياباشا
حمزة:ان شاء الله بعد المغرب
يوسف:ان شاء الله