شنطة باك
"شنطة باك"
........
طول عمري كنت بحلم بقصة حب غريبة و فريدة من نوعها..
و كل ما يتقدم عريس أرفضه و أقول "مش هتجوز صالونات أنا!!"..
و أصحابي دايمًا كانوا بيقولوا في هزارهم "هييجي أبو حصان أبيض إمتى يا آلاء؟!"
أنا مش عاوزة بردو حد أحبه و يحبني
يووه...أنا كنت عاوزاه صالونات و في نفس الوقت غريب...حد فاهمني!!؟؟
نيجي للي حصل..
كنت في الكلية و معايا أصحابي كنا خلاص سنة رابعة تربية فرنساوي في بداية السنة..
كنا واقفين برا المدرج و بنتكلم سوا..
واحدة صاحبتي قالت:أنا سمعت إن أول محاضرة النهاردة تربوي و الدكتور أول سنة ليه
أنا قُلت:أوووف يعني هيورينا الويل والله
اللي بيكونوا أول سنة دول بيتعبوا الدفعة
كان واقف جنبنا كده واحد بيتكلم في الموبايل فـ ساب الموبايل و بص علينا وعليا بالذات و ضحك و راح وقف لبعيد
صاحبتي قالت:ده مين ده؟!
أنا أول مرة أشوفه معانا في الدفعة؟!
صاحبتي التانية قالت:يمكن حد عايد السنة عادي أنا سمعت إن في ناس قبلنا شالت مواد و هتكون معانا السنة دي
أنا هزيت راسي و بعدم اقتناع قُلت:بس حساه أكبر مننا بكتير؟!!!
صاحبتي قالت:عادي يا آلاء و بعدين ده لابس شنطة باك
يلا ندخل المدرج المحاضرة هتبتدي
.....
دخلنا المدرج و قعدنا حوالي ١٠ دقايق كده و لقيت الشاب ده داخل
ايييه اييه ده ايه ده؟!!!
ده طلع وقف مكان الدكتور
يا نهار أبيض ده طلع هو الدكتوووور
أبو شنطة باك طلع الدكتور!!!!!
أنا و أصحابي بصينا لبعض و حطينا وشنا في الأرض خلاص
إزاي هنحضر تاني إزاااي؟!!!
و أكيد هيعلقنا النهاردة على باب المدرج
قال:السلام عليكم يا شباب
أنا دكتور يوسف نصر دكتور في مادة "...." و بإذن الله تكون مادة حلوة و لذيذة كده
بالمناسبة أنا أول مرة أدرس بصفتي دكتور
بص عليا و ضحك و قال:و صدقوني مش هوريكوا الويل و لا حاجة
أنا هتعامل معاكوا كإني واحد منكوا لإني في يوم كنت مكانكوا
النهاردة مش هشرح كتير بإذن الله هعطي حاجات بسيطة خالص كده و عاوز نتعرف على بعض بما إنكوا قليلين في العدد
كان بيشرح مقدمة في المادة و أنا اللهم صل على النبي مافتهمتش ولا كلمة و كل اللي حاسة بيه إنه هيقتلني أكيد..!!
بعد ما خلص شرح شوية لقيته بيقول:يلا بقا هسأل كل واحد عن اسمه و نتعرف على بعض
ساعتها كنت بتمنى الأرض تتشق و تبلعني حرفيًا
سأل بالدور و صاحبتي تغنيلي بصوت واطي علشان توترني:الدور الدور الدور الدور موعودة ياللي عليكِ الدور
سأل صاحبتي و بعدين أنا لقيته بيقول:اتفضلي عرفينا بنفسك
كان مش بيبص لبنت بس أول ما جه عليا الدور بصلي و بعدها بص لنحية غير نحيتي و ضحك بصوت مسموع
أنا قُلت:اسمي آلاء الحناوي
خلاص خلصنا يا جماعة و المحاضرة كانت خلصت خلاص و كنت خارجة من المدرج لقيته بيقول:يا آنسة آلاء
ايه ده هو بيناديلي؟!!!
لااااء هعمل نفسي مش سامعة لااااء
صاحبتي قالت ماينفعش كده يا آلاء ردي
رديت عليه و قُلت:أيوة يا دكتور آسفة ماكنتش سامعة
بص جنبه كده و ضحك نص ضحكة و قال:أولًا بلاش تكذبي حتى لو لسبب تافه
اتوترت بجد بسببه الله يسامحه
لقيتني بقول:المهم في ايه يا دكتور؟!!
قال:آسف إني عطلتك بس أنا أصلًا سامعك من أول ما اتكلمتِ عني في الأول و حبيت أعرفك إني مش كده و مش هعمل كده بإذن الله
قبل ما أكون دكتور علم لازم أعرفك حاجة ماتحكميش على حد و إنتِ مااتعاملتيش معاه قبل كده
رديت بإحراج:شكرًا يا دكتور ربنا يكرمك
بس بردو أنا عمري ما شُفت إن في دكتور بشنطة باك
ضحك و قال:مش بعرف أمشي من غيرها
سابني و مشي بعد ما قال في رعاية الله
.......
عدت الأيام و بصراحة كنت معجبة بيه بس مش بطريقة مش كويسة لااا
كنت معجبة بأسلوبه و احترامه و تدينه الملحوظ و ثقافته و .......و غرابته!!!
و كنت بحسه بردو بيبص عليا من وقت للتاني بس كنت بقول أكيد بوهم نفسي مش أكتر
شخصيته حلوة بجد يا سارة
قُلت كده مرة لصاحبتي لقيتها بتقول:أيوة ما شاء الله
بس نفسي أعرف الشنطة دي فيها ايه؟!!!
بصيتلها و قُلتلها:أيوة أنا كمان نفسي أعرف والله
دايمًا شايلها كده و مش بيمشي من غيرها
أكيد في يوم هعرف
.......
قربنا نخلص التيرم الأول خلاص كنا في أيام المراجعة
لقيته في مرة و احنا خارجين من آخر محاضرة ليه نادالي و قال:يا آنسة آلاء
ضحكت بكسوف و غصب عني قُلت:تاني؟!
عارفة إن لساني صعب يلم نفسه بس والله غصب عني
لقيته ضحك بردو و قال بكسوف:ممكن أقابل والدك؟!
أنا تنحت و قُلت:هااااا نعم؟!
قال و هو لسه مكسوف:عاوز أقابل والدك يعني و أطلب ايد حضرتك و لو مش موافقة عادي صدقيني هقفل على الموضوع ده خالص
لقيتني بقول غصب عني:هعطيلك رقمه و أول ما أروح البيت هقوله
رحب بالفكرة و خد الرقم و كل ده و أنا متنحة من اللي حصل
سارة صاحبتي كانت ماشية معايا و لقيتها قالت:كان نفسك في قصة حب غريبة عجيبة
صدقيني ماشُفتش أعجب من كده!!
و لا عمري شُفت شخصية عجيبة شبهه
ضربتها و قُلت:على فكرة لحد دلوقتي مش مستوعبة اللي حصل ده و إزاي أنا عطيتله رقم والدي..!!
.............
جه يوم الرؤية الشرعية
إزيك يا آنسة آلاء؟!
الحمدلله بخير و حضرتك؟!
الحمدلله كويس في نعمة
أدام الله حمدك
و اياكِ
سكتنا شوية فلقيتني من غير تردد بقول:ممكن أسألك الشنطة بتاعتك فيها ايه؟!
ممكن بحسك غريب بسببها شوية
عمري ما شُفت دكتور بشنطة باك!!!!
ضحك و قال:مش عارف الشنطة اللي متقدمة و لا أنا بس هجاوب
الشنطة فيها مصليتي و مصحفي و سبحتي و إزازة ماية بقرأ عليها قرآن و بونبوني علشان لو قابلت أطفال
من صغري و والدتي معوداني عليها لحد ما كبرت و بقيت دكتور بسبب و بفضل اللي جوا الشنطة بعد ربنا طبعًا
هو البني آدم ده طبيعي يا ربي؟!
...............
حاليًا متجوزين و معانا ساجد و عابد
و بعودهم من دلوقتي إنهم يشيلوا شنطتهم الباك...
ريهام يحيى
التعليقات على الموضوع