قصة شيطاني الاليف الجزء الاول💀

#شيطاني_الأليف
#الجزء_الاول
الوحدة إسوأ إحساس ممكن حد يحس بيه إنك تبقي لوحدك ليل ونهار مبتسمعش غير صوتك ومبتكلمش حد ولا حد بيكلمك أنا حاسة إلاحساس ده من يوم ما أهلي ماتوا من ٣ سنين ومفيش جديد إحساس الوحدة بيزيد مبعملش حاجه غير بكتب يومياتي علي الورق ده عشان لو حصلي حاجه يبقي في حد عارف أنا مريت بإيه أنا دينا ممرضة في مستشفى خاصة مش هقول إسمها عشان الخصوصية
أهلي ماتوا في حادثة عربية من ٣ سنين ومن يومها وأنا وحيدة حاولت أشغل نفسي بالشغل بشتغل ليل ونهار بس إحساس الوحدة مبيفارقنيش في النهاية قررت أتبني حيوان أليف يسليني شوية روحت ملجأ للحيوانات الأليفة بيجمعوا فيه الحيوانات المشردة
هتسألوني ليه مفكرتش أشتري قطة من أي مكان وخلاص بس هقولكم إن الحيوانات المشردة دي بشوف فيها نفسي بشوف فيها وحدتي فقررت أجيب حيوان من هناك من أول ما دخلت وحقيقي كل اللي في المكان رحبوا بيا جدا والمسئولة عن المكان خدتني أدور علي الحيوان اللي أحب أتبناه وهناك شوفتها قطة سوداء تماماً فروها غزير وناعم لون عينيها غريب جداً كل عين لون واحدة لونها أزرق والتانية بني ومن الظريف وقتها إن القطة أول ما شافتني كانت مركزة معايا جدا وبتصدر أصوات مواء عالية المسئولة ضحكت وقالت شكلها إختارتك
خدتها ومشيت رجعت بيها البيت وأنا مبسوطة إن أخيرا حد هيشاركني بيتي
أنا ساكنة في شقة أهلي عبارة عن عمارة قديمة من عمارات زمان شقتنا في آخر دور شقة بسيطة وصغيرة علي قدي معزولة عن الجيران تماماً وتقريبا معرفش حد من الجيران أو بمعني اصح بطلت أعرف حد منهم 
كنت مبسوطة جدا بقطتي الجديدة وقررت أدورلها علي إسم مناسب 
رجعت بيها البيت وانا فرحانة جهزت مكان تنام فيه وإشتريت أكل قطط سبتها تأكل ودخلت أوضتي وقررت أنام  حلمت بكابوس كان في حاجه خنقاني نفسي بيضيق حاسة إني بموت صحيت مخضوضة عرقانة جسمي كله خدوش  قومت أدور علي قطتي بس ملقتهاش مفيش أي أثر لوجودها كل الابواب مقفولة وكل الشبابيك مفيش مخرج حرفياً دورت في كل مكان في النهاية قررت مشغلش نفسي بس سمعت صوتها بيعلي زي صوت القطط وهي بتتخانق بدأت أدور علي مصدر الصوت بس الصوت كان عالي ومتداخل قلبي كان بيدق بسرعة بدأت أخاف جدا دخلت أوضتي بسرعة وقفلت علي نفسي فضل صوتها عالي لحد قرآن الفجر إختفي تماماً ونمت ساعتها بأمان الصبح صحيت من نومي أدور عليها كانت مش لسه مش موجودة بس البيت كان مقلوب ومبهدل معرفش مين عمل كده بدأت ارجع كل حاجه مكانها ونزلت عشان ألحق شغلي وطلبت من البواب يدور عليها  روحت المستشفي وبدأت أشوف شغلي كالعادة خلوني اقولكم إن شغلي ده صعب جدا تخيل تبقي عايش في مكان بتشوف كل يوم حالات بتموت قدام عنيك ناس اتعاملت معاها وشوفتها كلمتك وسمعت صوتها وفجأة كل ده يروح وتفضل تسأل نفسك يا تري هما راحوا فين خصوصا إني بشتغل في العناية المركزة في قسم معظم حالاته بتكون سيئة للغاية ومعرضين للموت في أي وقت مقدرش أقول إن فكرة الموت بقت عادية بالنسبة ليا بس أقدر أقول إني إتعودت عليها في الاول لما حالة كانت بتموت كنت بنهار حرفيا دلوقتي بقيت أتقبل إن دي نهايتها وخلاص
القسم بتاعي كان في آخر دور كان غالبا فاضي الا من الزيارات القليلة والسريعة لان حالة المرضي كانت محتاجة الهدوء اكتر
وصلت المستشفى وركبت الاسانسير وقفت قدام المراية لمحت حد عدي ورايا بسرعة لفيت بس النور قطع الاسانسير وقف والنور طفي مش ده الغريب بس الغريب اني سمعت صوت قطة بدأت أدور علي مصدر الصوت حسيت بيها بتلمس رجلي بصيت عليها كانت سوداء تماماً بعنيها الغريبة كانت مركزة في عنيا جدا  حسيت إن عينيها بتلمع في الضلمة وبدأت تفتح بوقها وتصرخ بصوت غريب مش صوت قطة رجعت لورا لحد ما وقعت علي الأرض وكانت بتقرب ناحيتي وعنيها كلها شر 
وهجمت عليا وعضتني في كتفي وبدأت أصرخ من العضة لما فجأة النور جه والاسانسير اشتغل الباب فتح ولقيت دكتور أحمد قدامي سألني مالي معرفتش أقوله ايه
قولتله كان في قطة محبوسة في الاسانسير وهجمت عليا عضتني  عرض عليا يشوف الجرح ولما شافه استغرب جدا وقالي أن مش ممكن تكون دي قطة شكل الانياب والاسنان مش طبيعي وقالي اني مخبية حاجه حاولت اتهرب منه لحد ما افهم بيحصل ايه
بس أنا دلوقتي بدأت أسمع صوتها بتقرب وصوتها بيعلي أكتر انا خايفة خايفة جدا .....
Hadeer_saeed