قصة إدانة قاتل برئ (الجزء الثاني)

إدانة_قاتل_بريء
الحلقة االثانية
أول ما شفت البواب حسيت بالقلق بينط من عينيه سألته.. مين ساكن غير البشمهندس احمد جار القتيل ..رد وقال الخامس يا بيه ساكن فيه 4 شباب من بلد اسمها دسوق تبع محافظة كفرالشيخ بيدرسوا هنا في كليه حقوق وبقالهم تلت سنين الشقه معاهم وفي حالهم, والشقه اللي جمبهم استاذ حسين مدير عام عالمعاش ومراته..والتالت ساكن فيه دكتور اشرف وأسرته واخد شقتين وفاتحهم على بعض والدور التاني ساكن فيها صاحب البيت وابنه, كل واحد في شقه, والشقتين اللي في الاول دا مقر شركة استيراد وتصدير بتاعت استاذ صبري القتيل اللي دي شقته ..
...تعرف ايه كمان عن القتيل ومراته؟؟
...مفيش يا فندم غير ان دي مراته التانيه بعقد رسمي عند المحامي بس شهادة لله مش مخليها محتاجه ايتها حاجه..والاولي قاعده مع ولاده في أمريكا وعنده شقه في التجمع وبيبات هنا ليال بسيطه ..
بعد تحقيق طويل مع عم محمد البواب..طلعت منه بتفاصيل زي ان كلامه كان بيرمي لسكرتير مكتب الاستيراد بتاع القتيل اللي في الدور الاول شاب عنده 25 سنه وأسمه جمال, بلديات صاحب الشركه من بلد أسمها بلطيم وليه أوضه في المكتب بيبات فيها بعد ما بيقفل المكتب عالساعه 10 بعد المحاسبين ما بيمشوا , والبشمهندس أحمد اللي الحرامي دخل من بابه كان مصاحب السكرتير ده لانه اكتر من مره كان ينزل تحت يطبع عنده ورقه عالبرينتر ويشربوا مع بعض سيجارتين بالليل بدل ما يشربهم في البلكونه في البرد ده, كمان اليوم اللي ضاعت فيه مفاتيح البشمهندس أحمد كان عدى على السكرتير يومها وهو طالع, و سيد ابن البواب سبقه على شقته, وقلبوا العماره تدوير عليها يوم الجمعه ودوروا في الشركه لغاية ما لقيوها جمب عربيته ..اما بخصوص الجار القتيل فطبعا مكنش عارف هو طلع ازاي الشقه خاصة مع الرعد والبرق بتاع النهارده فكان دخل نام بدري بس بوابة العماره مقفوله وكل ساكن معاه مفتاح
...طب وعيالك كانوا نايمين معاك؟؟
رد وقاللي ...سيد كان بايت بره والواد الصغير كان نايم
نطلي عماد تااني ..عرفت بقا قلقان ليه؟؟ سيد كان بايت بره دا حوار تمويه عشان يبعد حبل المشنقة عن ابنه واكيد هو شريك معاه
فقلتله ....روح اعملي قهوه يا عماد ومتتكلمش تاني في القضيه
ورجعت لأبو سيد البواب
..طيب مين اول ناس وصلت عند الشقه؟؟ قبل ما تحصل الهالومه بتاعت المصايب؟؟
رد البواب..اللي عرفته أن الدكتور أشرف اللي تحتهم سمع خبط ورزع بس يا فندم هو متعود عالخبط ده عندهم لأن الاستاذ صبري الله يرحمه كان بعض الأحيان بيمد أيده عليها فمركزش معاهم لغاية ما في الآخر خالص بعد ما الحرامي هرب سمعها بتئن وتستغيث وتخبط بحاجه معدن على أرضية شقتها زي ما تكون بتستغيث بيه فطلع جري هو ومراته لقوها بتشاور عالبلكونه وتقول ...ألحقوه ألحقوه, مرات الدكتور أشرف صوتت, فطلعت أنا جري على صوت الصويت وزعيق الدكتور أشرف لقيت الاستاذ حسين وشاب من الطلبه وصاحب البيت وابنه سبقوني وفتشوا السطوح والبلكونه ملقوش حد, وجات الاسعاف خادتها
الواد السكرتير بقا مجاش الا الآخر خالص وقال ايه كان نايم
...نط عماد تاني ماهو عامل زي مراتي لما تبقى عايزه حاجه.. تصدق يا فندم ممكن يبقى السكرتير برده, عيل غلبان محيلتوش اللاضه والفلوس الكتير بتغوي..المفتاح وقع عنده في الشركه عمل نسخه ورمى المفاتيح جمب العربيه وقعد يستنى الفرصه اللي جات لما عرف بال 200 ألف دولار, فدا طبعا اكتر واحد عنده حافز ودافع للجريمة دول تلاته مليون ونص مصري..دخل نط عشان يخلص في هدوء قتل الراجل والجار شاف القتل من بلكونته مستناش راح قفزله راح قتله السكرتير ورزع السكينه في ضهر الست ونزل بعد ما شال القناع عالسلم,ممكن يكون نزل خبا الفلوس بره العماره ولما رجع كان القلق شغال ومحدش واخد باله من حاجه وهتفتش الشركه مش هتلاقي حاجه يااا عالغدر لما ييجي من أقرب الناس, بتبقى صعبه بردو
بصيتلو ومعلقتش مع أن كلامه منطقي بردو   
بعدها استجوبت الاستاذ حسين وعرفت منه ان كلامه بيرمي ناحية طالب من الطلبه اللي جنبه اللي كان واضح اوي انه كارههم ..وبيقول انهم بيشربوا مخدرات وبيعلا صوتهم وكان بيشوفهم في عز التلج واقفين في البلكونه بالفانلات الداخليه وعالم منتهي في قلة الادب على قد قوله, كمان كان في محضر رسمي منه يتهم حد فيهم أنه نط في بلكونته وهو ومراته بره البيت وسرق فلوس والمحضر اخد عدم كفاية ادله ...بيضيف انه سمع باب شقتهم بيتفتح قبل ما يسمع صوت مرات الدكتور أشرف بتصوت بربع ساعه..استجوبت الطالب كان اسمه اسلام, كان واد رزين, كل اللي قاله انه كان قاعد بيذاكر لما سمع الصويت وصاحبه أسمه طارق كان نايم فنزل جرى على شقة القتيل
طبعا عماد مش هيخرس الا لما أحبسه
...بص يا فندم آخر حاجه هقولها أن شقق الطلبه بتعمل بلاوي خاصة اللي بيشربوا, والبشمهندس مفاتيحه وقعت عند العربيه فعلا, ودايما الطلبه بيبقوا متنشرين في البلكونات وشافو المفاتيح وعملوا النسخه واحتمال يبقوا مخططينها مع بعض هو والواد اللي معاه والاتنين اللي نزلوا البلد دول مكنوش موافقينهم عاللي ناويينه ولما الواد خلص مهمته طلع عمل نايم والتاني نزل على صوت الصريخ والفلوس هتتخبى في أي حته ان شا الله لو في خزان عالسطوح وخلي بالك معاك شاهد بيقول أن صوت بابهم أتفتح قبل الحادثه بربع ساعة يعني مسبوكه
حولت عماد للتحقيق وسبقني عالقسم
الصبح طلع علينا ورئيس المباحث جه يشوف التقدم اللي حصل, طبعا دعمني وحفزني وقاللي قدامك 48 ساعه وبعد كده هرتاح منك للأبد وسابني ومشي
وقررت أفتش كل الشقق,خاصة شقة الجار المقتول اللي مش عارفين نوصل لمراته دي فقررنا اقتحامها عشان أشوف أخرتها

يتبع..