قصة اشباح درعا 💀الجزء الاول💀

💀 اشباح درعا 💀
📸المصور 📸

(مش كل اللي تسمعه تصدقه )
المقولة دي كنا بنسمعها من ناس كتير و بنصدقها بس ده كان زمان لكن دلوقتي اتطورت شوية مع تطور التكنولوجيا و الكاميرات و برامج المونتاج و بقت
(مش كل اللي بتسمعه و تشوفه تصدقه )
و ده فعلا اللي حصل لي لما قربت من الحقيقة و شوفتها ع الارض بعيداً بقي عن شاشات التليفزيون و عن اخبار السوشيل ميديا بس ف الحقيقة ده ماكنش بأرادتي ده كان غصب عني .

اسمي : محمد نصر الدين
مهنتي : مصور بأحدي الصحف المصرية المشهورة
سني : ٢٥ سنة
الحالة الاجتماعية : اعزب و بدور علي بنت الحلال😂

بدأت حكايتي لما ف يوم جالي تليفون الصبح بدري من رئيس قسم التحقيقات ف الجورنال اللي بشتغل فيه و كان ملخص المكالمة (تعالي حالاً يا نصر رئيس التحرير عاوزك )
في خلال ساعة كنت ف مقر الجورنال ، قابلني استاذ ايمن حسين رئيس قسم التحقيقات و قالي (ادخل بسرعة رئيس التحرير مستنيك جوه )
استغربت اووي لأن رئيس التحرير عاوزني و ده نادراً اما بيحصل و ليه انا بالذات و بيني و بينكوا خوفت لا يكون في مصيبة ف دخلتله المكتب علي طول من غير تفكير و لما دخلت كان جنبه المحرر محمد ابو السعود و دار بينا الأتي .

انا : صباح الخير يا فندم .
رئيس التحرير : اهلا اهلا بصاحب احسن عدسة ف الجورنال كله اتفضل اتفضل يا نصر اقعد .
انا موجهاً كلامي ل ابو السعود : صباح الخير يا ابو السعود .
ابو السعود : صباح الخير يا نصر .
رئيس التحرير : الحقيقة يا ولاد انا جمعتكم النهارده علشان زي ما انتو عارفين الحرب ف سوريا اشتدت و خصوصاً في مدينة درعا و احنا هنا ف الجورنال محتاجين يبقي لينا عين و قلم هناك و طبعاً زي ما انتو عارفين انتم الاتنين اكتر ناس محترفة و مجتهدة ف الجورنال و خصوصاً ف باب التحقيقات و عشان كده انا اختارتكم بنفسي علشان تسافروا تقضوا اسبوع هناك و تعملو لقاءات مع الاهالي بحيث اننا نحسس القارئ انه موجود معاهم و ننقل للناس الحقيقة كاملة زي ما اتعودنا و انت هتكتب التحقيقات يا ابو السعود و محمد نصر طبعا هيصور اي حاجة عينه تقع عليها و ده هيكون اصدق حاجة نكشف بيها للناس حقيقة اللي بيحصل هناك .
انا حسيت ان دمي اتجمد و بلعت ريقي كده و قولت لرئيس التحرير : بس يا ريس مش ده فيه خطورة علي حياتنا ولا ايييه يا ابو السعود .
رد رئيس التحرير : لا لا من الناحية دي اتطمن انتو هتكونوا في حمايه الجيش السوري محدش هيقدر يتعرضلكوا بأذي انا مظبط كل حاجة مع القيادات هناك و متقلقوش انتو ولادنا مش هنبعتكم للموت يعني .
رد محمد ابو السعود بفرحة : انا جاهز يا ريس هنسافر امتي ؟؟.
بصيت له باستغراب اوي كده و من جوايا بقول (الله يخربيتك انت خلتها هنسافر خلاص انا اصلاً ماقولتش موافق ولا لأ )
رئيس التحرير حس ان انا قلقان ف بصلي بنظرة الاب ل ابنه كده و قال لي : متخفش يا نصر متخفش انتو هتكونو متأمنين كويس ف كل تحركاتكم و انا مش هضحي ب اكفأ اتنين عندي ف الجورنال .
ف الحقيقة ماكنش قدامي حل غير ان انا اوافق و خصوصاً ان انا كمان محتاج اعرف حقيقة اللي بيحصل هناك و بصراحة كان جوايا كذا سؤال زي مثلاً هل اللي بيحصل ده ثورة مسلحة فعلاً و لا حرب اهلية بين سني و شيعي و لا هي حرب بين الجيش السوري و بين تنظيم الدولة ، كل الاسئلة دي بقي كانت اجابتها ان انا لازم اروح و اتأكد و اصور بنفسي و لذلك قررت اقول ل رئيس التحرير : تمام يا ريس انا موافق .
رد رئيس التحرير بفرحة وقال : طيب تمام يا شباب روحوا جهزوا نفسكوا علشان السفر بعد ٣ ايام و انا محضرلكوا كل حاجه، روحوا انتو بقي و جهزوا نفسكم و اشوفكم بعد بكرة عندي هنا ف المكتب .
خرجنا انا و محمد ابو السعود من مكتب رئيس التحرير و روحنا قسم التحقيقات عشان نتكلم و نشوف هنحضر ايه و هنستعد ازاي بس الغريب ف الامر ان ابو السعود كان عمال يضحك زي الاهبل ف طبيعي سألته : انت بتضحك علي ايه !
ايه اللي مخليك مبسوط كده ؟
احنا ممكن نسافر مانرجعش تاني .
قالي : لا يا سيدي هنرجع بأذن الله بس انا فرحان لأن اخيرا هعمل تحقيق زي ده الف غيري يتمنوا يعملوه ده هينقلني لمرتبة اعلي في مجال الكتابة و انت كمان يا نصر المفروض تكون فرحان دي فرصة بتيجي ف العمر مرة واحدة يا اخي .
رديت عليه ب لا مبالاة و قلتله : اه ما انا مبسوط اهو ، ربنا يسترها .
مروا يومين و انا ف خلال اليومين دول جهزت الكاميرات بتاعتي و كل حاجة هحتاجها و انا هناك ، و روحنا انا و ابو السعود لرئيس التحرير اللي ادانا التأشيرات و قال لنا هتنزلوا من الطيارة ف مطار دمشق و منه هتتحركو برياً لدرعا و لما توصولوا بالسلامة انا بنفسي هتصل بيكو و رجالة الجيش السوري هيكونوا معانا لحظة بلحظة .
تمت كل حاجة بسرعة و ركبنا الطيارة تاني يوم و وصلنا مطار دمشق اللي اول ما وصلتلو حسيت ب احساس غريب زي ما يكون قلبي اتقبض ، حسيت ان احنا وصلنا مدافن مش بلد بس الحق يتقال كان المطار عبارة عن ثكنة عسكرية و كان متأمن كويس جداااا لكن انا من جوايا مش متطمن و عارف و متأكد بأحساسي كده ان هتحصل مصيبة ف السفرية دي و لو رجعنا انا و ابو السعود عايشين حياتنا هتتغير كتيييير و فعلاً احساسي ده كان ف محله ...... يتبع😍😍

بقلم
محمد_شعبان
العارف
اشباح_درعا
المصور