الفصل الثاني من "لفة ورد"🌸🌸

الفصل الثاني من "لفة ورد"..💐💜

عندما دلفت جميلة إلي منزلها رأت أختها مني جالسة علي الأريكة و الشرر يتطاير من عينيها
و وجهها كلون الدم و أخيها يوسف و والدتها يضحكان و بشدة
فضحكت جميلة بتلقائية و عفوية و قالت:باين أنكوا استلمتوا البت الغلبانة دي والله
مني بحزن طفولي:آه و الله يا جميلة دول صعبين أوي والله و وحشين و أنا هقوم أدخل الأوضه بتاعتي و ....
أكمل عليها يوسف باستفزاز:و احبسي نفسك في درج الدولاب يلا
انفجرت جميلة و والدتهم بالضحك فقاطعهما يوسف:المهم بقا نتكلم بجد شوية موافقة نعمل قاعدة ولا لا يا مني؟!
قاطعتهم جميلة صارخة:لا انا مش موافقة
نظروا جميعًا لها متعجبين منها'،فقال يوسف:مش موافقة ليه؟!
جميلة بمكر:معرفش أصلًا الموضوع بس قولت أعترض و خلاص
مسكها يوسف من أذنها و قال:هموتك صدقيني في يوم من الأيام بسبب رخامتك دي
صرخت جميلة و مثلت البكاء:اهئ اهئ اهئ أهون عليك يعني يا چو هاااا اهون عليك يا قلبي!!!
تركها يوسف و قال باستسلام:آه منك يا بت أنتِ محدش يقدر عليكي بربشتيلي بعينيكي ثبتيني ربنا يكون في عونه
جميلة بتساؤل:هو مين؟!
يوسف:اللي أمه داعية عليه
ضربته جميلة و قالت:مفهمتونيش بردو في ايه؟
احمر وجه مني مرة أخري..فلاحظ يوسف هذا فذهب إليها و قبَّل جبهتها و قال:الست مني جايلها عريس يا جميلة
صرخت جميلة من الفرحة و قالت:الله أكبر الله أكبر
ده بجد ده؟!
طب و أنتِ موافقة يابت ولا ايه؟!
أصل أنتِ بتتأمري علي كل حاجه هاهاهاهاهااه
ضربتها مني و قالت:مش موافقة لسه
أنا بس عاوزة نعمل قاعدة و أخوكي يوسف كان بيتريق عليا بيقولي قاعده و حوض
بس بجد ده حقي الرؤية الشرعية علشان أعرف هو كويس ولا لا...صح ولا ايه؟!
ابتسم يوسف بحنان و قال:عداكي العيب
صرخت جميلة بصوت طفولي: و أزح
نظروا جميعًا لبعضهما البعض و هجموا علي جميلة بالضرب فسمعوا صوت يقول:من غيري استنوا ده انا بحب ازغزغ البت دي أوي
صرخت جميلة و قالت:بقا كده يا بابا وأنا اللي بقول أنك أنت اللي هتحوش عني
ابتسم لها والدها و قال:ده أنتِ الحب والقلب من جوا يابت يا جميلة
فتنحنحت عزة والدة جميلة قائلة:احممم احمم طيب ماشي
فابتسموا جميعًا و احتضنوا بعضهم البعض و قالت عزة:ربنا ما يحرمني من لمتكوا دي أبدًا
********************
في اليوم التالي دلف حمزة لغرفة والدته و كانت نائمة فطبع قُبلة رقيقة علي خدها فاستيقظت و ابتسمت قائلة:ياااااه أنت لسه فيك الطبع ده يا حمزة؟!!
رد حمزة بابتسامة نقية:و عمري ما هبطله يا أحلي حاجة في دنيتي..
عمري ما هبطل أني أجي أبوسك يوم ميلادك أبدًا
ردت فريدة بابتسامة و دمعة قفزت من عينها علي وجنتها:و دي بتبقي أحلي هدية يا حبيب قلبي والله
دلفت هدي و رأت هذا المنظر فأدمعت عيونها و قالت:أنا بحبكوا أوي والله
ضحك حمزة و قال بمُزاح:بتقطعي عليا اللحظة الرومانسية دي يا هدي الله يسامحك
نغزته والدته في ذراعه و قالت له:دي هدي حبيبة القلب من جوا يا واد
ابتسم حمزة بأسي و ترورقت الدموع في عينيه و ضم هدي لقلبه و قال لها:ربنا ما يحرمني منك أبدًا يا هدي
في الحقيقة كانت هدي فتاه جميلة جدًا..ذات ملامح بريئة بعيون كلون السماء في صفائها و لون بشرتها أبيض وردي..
و لكن القمر لا يكتمل أبدًا فقد كانت مريضة بالقلب...و دائما ترفض إجراء العمليات لكي لا تفشل و مع ذلك هي قوية الايمان بالله فهي تعلم أن الله لا يشاء إلا الخير لعبده و كانت تعلم أن مرضها البشع سيكون سببًا لشئ جميل...هذه ثقة العبد المؤمن بربه'''
*********************
استيقظت جميلة في هذا اليوم علي ذاك الحلم بالأصح الكابوس و كانت ترفض دائما أن تحكيه حتي لأختها الوحيدة وفي نفس الوقت صديقتها لكي لا يتحقق..
استيقظت و وجدت أنها كانت تبكي في الحقيقة و قالت:يا ربي هو أنا ليه بحلم الحلم ده أنا تعبت والله ياربي تعبت
دخلت مني الحجرة و هي تقول:ست الحسن والجمال لسه نايمة قووومي يا جميلة بقاا  علشا....
قُطِع الكلام منها عندما رأت جميلة تبكي ففُزع قلبها و قالت لها:مالك يا قلب أختك في ايه احكيلي!؟
اوعي يكون نفس الحلم؟
نظرت لها جميلة بأسي و قالت:أيوة هو يا مني هو
مني:طب احكيلي بإذن الله مش هيتحقق
جميلة بابتسامة حزينة:لا يلا يا بت قومي نحضر الفطار
ابتسمت مني و قالت:لا ما أنا حضرته خلاص لما جيت أصحيكي لقيتك غرقانه في سابع نومه فمهونتيش عليا الصراحة
جميلة بابتسامة:بحبك يا مني والله ربنا ما يحرمني منك أبدًا يا أحلي حاجة في حياتي بس بعد ماما و بابا طبعًا
ضحكت مني و قالت:طب قومي بقا يا اختي علشان نفطر وننزل الشغل
******************
في الطريق إلي العمل قصت جميلة علي مني أنها رأت الشاب الملتحي مرة أخري و أنها خافت منه كثيرًا
قالت لها مني:بصي يا جميلة أنا الصراحة مش عارفة ليه أنتِ خايفة كده و أصل....
قاطعتها جميلة:نعمممم ليه خااايفة كده؟!
أنتِ مش شوفتي السكينة اللي كانت في إيده دي كانت شبه الساطور يا أمي
و هدومه اللي كانت كلها دم ده واحد ميعرفش ربنا ده قتال قُتلة
قالت لها مني:أنتِ مسمعتيش عن حاجة اسمها حُسن الظن قبل كده؟!
ردت جميلة:أيوة سمعت
مني:يبقي الله أعلم الدم اللي كان علي هدومه ده كان من ايه؟!....
و السكينة اللي شبه الساطور دي كانت ليه؟!...
إن بعض الظن إثم يا جوجو
ردت جميلة بابتسامة:صح والله معاكي حق...أنا بتعلم منك كتير أوي يا مني
أنتِ اللي علمتيني أصَلِي و اللي علمتيني ألبس صح و علمتيني حاجات حلوة كتير والله
ضحكت مني و قالت:و هفضل وراكي لحد ما تلبسي الخِمار
ردت جميلة بصراخ مصطنع:لااااااا لااااا نوووو يا قلبي نيڤر
سي يووو بقا علشان أنا وصلت....
كانت مني مُختمرة منذ أن كانت في السادسة عشر من عمرها و تحاول اقناع جميلة بأن ترتديه و لكنها ترفض بشدة لأنها لا تحبه و كانت دائما تشبهه بالخيمة فترد عليهاا مني: حور مقصورات في الخِيام..
***********************
في هذا الوقت كان حمزة يخطط مع هدي لعمل حفلة صغيرة لوالدتهما و كان والدهما يعلم بالخطة و لكنه اصطحبها معه للتنزه بحُجة أنه يريد الانفراد بها وحدها
قال حمزة لهدي:أنا هنزل أشتري الورد يا دودو بس مش عارف أجيب هدايا ايه ليها و بردو يعنـ..
قُطع كلامه عندما رأي هدي مُدمعة العينين فقال لها:مالك يا حبيبة قلبي؟!
تنهدت هدي و قالت:هو أنا مش هتجوز أبدًا صح؟!
رد حمزة و الحزن شق طريقه بمهارة لوجهه:مين قال كده يا ست البنات؟!
هتتجوزي و هتخلفي و هتبقي أحلي عروسة والله
ضحكت هدي بسخرية وقالت:هخلف!..
لا يا حمزة خلاص كده ده حتي النقاب اللي نفسي ألبسه مش عارفة ألبسه و الدكتور مانعني ألبسه بسبب ضيق التنفس اللي عندي و ممكن يوقف قلبي
صمتت قليلًا و قالت متابعة:عارف يا حمزة لما بشوف ماما و بابا بحب العلاقة اللي بينهم بحب المودة والرحمة اللي بينهم دي
ربنا مقالش الحب صريح في القرآن ربنا قال المودة والرحمة نفسي أحس الإحساس ده أوي و بردو يا حمـ..
وضع حمزه يده علي فمها و قال:أبوس ايدك متقوليش كده أنا قلبي واجعني أوي و بإذن الله حياتك هتبقي أحلي حياه و هتشوفي
ابتسمت بكَسرة قائلة:بحبك يا حمزة والله
مسح حمزة دموعها و دموعه و قال لها:بكرة تشوفي أن كلامي هيبقي صح لأن أنا واثق في ربي و عارف أنك واثقة فيه وأن كل حاجة هتبقي بخير و زالفل زالفل
ابتسمت قائلة:طب يلا يا خِفة روح هات الورد
حمزة:فوووريرة
***********************
دلفت جميلة إلي المركز و قالت:صبح صبح يا عم الحاج
نظرت لها دنيا بتبرُم بينما ردت نورا:مالك يا بوحة ع الصبح مزاجك حلو ولا أنا بيتهيألي؟!
ضحكت جميلة بطفولية و قالت:لا والله عادي بس أنتِ عارفه أني بحب أرخم عليكي بس يا نورتي
بينما الفتاتان تضحكان سمعتا صوت يقول بهدوء و يتنحنح:السلام عليْكم
نظرتا لمصدر هذا الصوت فكان.....