قصة

أنا حقيقى بشكر دبلوم الزراعه اللي حدفني لنجع في أخر الدنيا ، أستلمت الوظيفة وشفت لي أوضة متطرفة بالايجار وجمعت راتب أول 5 شهور ، واشتريت عجلة اروح اخلص بيها شغلي وراديو صغير اللي بيشتغل بالحجارة ، عشان أسمع أم كلثوم  عليه ، وجبته بكشاف عشان لما النور فى النجع يقطع ابقي اتونس بيه ، وكان شغلي بيخليني اروح لكل نخلة موجودة في النجع ادور فيها واختبرها عشان أعرف اذا كان فيها دبور ولا لا ..

العجلة سهلت اللف عليا بعد ما كنت باخد دا كله مشي ع رجلي ، هو اه طريق النجع كله شوك والعجلة اتخرمت كذا مره واكمل طريقي وهي على كتفي ،  بس أهون ما أمشي على رجلى طول الوقت  وكلاب النجع والعياذ بالله زي الديابه ،  واللي الاقي فيها خرم للدبور بحط خرطوم احمر صغير واحط فيه دواء ،  يدخل جوا النخلة فيموت الدبور الاحمر اللي له بوز زي الابره  ، وبيفضل ينخر في النخل لحد ما يوقعه ..

المهم من وقت للتاني كنت بشوف بنت حلوه قوي زي القمر الحزين ،  اللي زعلان ان النهار قرب يطلع عليه وخلاص هيضيع وسط السحاب ..

كان شغلي خمس ساعات ،  وباقي اليوم حاسس بوحدة وفراغ مميت ، لا صحاب ولا أهل ولا حبيبه تهون عليا الايام في النجع  ، فضل الحال كدا حوالي سنة لا اعرفها ولا تعرفني وكل ما اشوفها الاقيها ساكته وحزينه وسارحه بعنيها في الدنيا  ، لحد ما في يوم وانا معدي عليها وقفت قدام العجلة وقالتلي 

" خليل أفندي ، الله يسترك أنا معمولي عمل و محطوط في خرم من اخرام نخلة قديمة في النجع هنا ، ان شاء الله ربنا يسعدك لو لقيته تجيبه ، عشان انا تعبانه ولازم أفك العمل ده والشيخة قالت لازم ألقيه " 

_ انتي عرفتي أسمي منين ؟  واسمك ايه ؟ 

مردتش عليا وسابتني ومشيت ،  لما شافت حد جاي من بعيد ،  انا يومها زعلت جدا عليها وعرفت اكيد السحر هو اللي مخليها كدا ، خلصت شغلي ورجعت الأوضه وطلعت سجارة من الخمسه اللي جبتهم فرط ، وعملت كوباية شاي وقعدت افكر ازاي اساعدها ، المهم سألت عنها واحده بيتها قصاد الاوضه بتاعتي قالتلي 

" دي غلبانة قوي يا خليل أفندي ساعدها ، ودورلها ينوبك ثواب ، دي اسمها " غرام " و امها ماتت وهي بتولدها وعمتها ربتها ، بس فيه حكايات ان عمتها غارت من جمالها ومن العرسان اللي بتيجي لها وعملت عمل يوقف حالها لحد ما بنتها سهير تتجوز وبعدين تجيب العمل وتبطله ، بس اتجوزت سهير من هنا وماتت هي من هنا ، ومن يومها وغرام بتلف عليه مش لقياه ، انت عارف النجع مفيهوش اكتر من النخل ومن الهم " 

انا سمعت الكلام من هنا وشوفت قد ايه الانسان ممكن يضر أقرب حد له ،  وأن الدنيا فعلا بقت صعبه قوي ، فكرت كتير ازاى اساعد غرام دي ، انا اصلا عيني عليها من زمان طب اتجوزها ، لكن دا مش حل وهي هتفضل تعبانه ، فضلت شهرين ادور في كل فتحه الدبور عاملها مش لاقي فيها حاجه ،  وكأن النخله اللي عمتها دفنت فيها العمل ،  الارض انشقت وبلعتها ، مكنش قدامي غير إني اجيب ورق واشخبط عليه بالاحمر والفه في قماش قديم واروح اقول لغرام لقيت العمل اللي بتدوري عليه وفعلا عملت كدا ، يومها لقيتها بتضحك ضحكه عمرها ماهنساها وبتقولي 

" روح ربنا يسترك وما يضرك وتعيش سعيد طول عمرك ياخليل أفندي " 

يومها انا زعلت من نفسي اني خدعتها ، بس مكانش في ايدي حاجه ، المهم خفت تروح للشيخه وتقولها مش هو دا العمل وانه اي كلام فعشان كدا قبل ما اعمل كدا روحت للشيخه دي واتحايلت عليها تقولها انه هو ،  واديتها فلوس عشان توافق وقولتلها انا هخليها تبقي كويسه بس اقنعيها انه هو وابطليه قدامها وخلاص ، راحت غرام للشيخه وفعلا قالتلها عقدتك اتحلت خلاص هو دا العمل وراحت مقطعاه ومعرفش عملت فيه ايه قدام غرام وقالتلها انتي كدا بقيتي زي الفل مفيش حاجه ودا اللي سمعته من شباك الشيخه وغرام عندها جوا ..

ويوم ورا يوم فضلت اقرب لغرام ، وانصحها تقرب من ربنا وتدعي وتشكر انه خلاص اتفك ، وهي كانت كل يوم أحسن من اللي قبله بفضل الله أكيد وبفضل انها نفسيا حست انه فعلا خلاص اتفك وعقلها بطل يفكر ف العمل وانه السبب في حزنها ومشاكلها ،  احساسها انه خلاص اتحل خلاها تتغير فعلا لدرجة اني قولت مفيش عمل من اصله دا كان وهم ربطوها بيه واقنعوها انها فعلا في مشكلة ..

مطولش عليكم غرام بدلت الاسود ولبست الوان وضحكت وفرحت ، وقلبي مال ليها وعرضت عليها الجواز واتجوزنا وبقت كل حياتي ، بس فضلنا عشر سنين مبنخلفش لكن فضلنا صابرين وبندعي ربنا انه يرزقنا ، وبعد المدة دى كلها  حصلت حاجه غريبه جدا ، فيه نخله راسها وقعت بسبب الدبور ، ولقيت في  راسها  " قُـله "مكسوره  بسبب الوقعه ،  وكان في قلبها  قماش فكيته ، لقيت ورق مكتوب عليه اسم  غرام والباقي كلام مش مفهوم ولا عرفت اقراه 

سألت شيخ في نجع جنبينا افكه ازاى ،  لان الشيخه اللي كانت في نجعنا ماتت ، فقالي هات العمل ده وفضل يتمتم بكلام مش مسموع كدا ، ويقطع اللي يقطعه ويحرق اللي يحرقه ، المهم بعد عشر دقايق قالي 

"  خلاص ياخليل افندي ومش عاوز فلوس منك بس ابقي افتكرني بقنو بلح " 

 وطبعا مجبتش سيرة لغرام لتعرف اني كنت بكدب عليها 

وبعدها بأسبوع غرام تعبت جدا جبتلها خالتي رضا تشوف مالها قالتلي ووشها كله استغراب : 

" مبروك غرام مراتك حِبله  ❤