تجربة الهلاك
تجربة الهلاك
٢٢ نوفمبر ٢٠١٩..
بداخل شقة في احد العمارات بالقاهرة، توجد جثة لشاب لم يبلغ الثامنة عشر عامًا بعد تبدو وكأنه مات مخنوقًا ،وحولها يوجد الكثير من أفراد الشرطة وسيدة تبكي بحرقة ورجل يحاول تهدأتها على الرغم من حزنه الظاهر على وجه هو الأخر، تكلم شخص من هيئته يبدو أنه الظابط :- حضرتك مالحظتيش أي تغير في سلوكه في الفترة الأخيرة وظهرلوا أصحاب جداد فجأة.
السيدة من بين دموعها :-لا مكنش في حاجة غريبة ،كعادته يروح دروسه ويرجع يذاكر، وإذا كان هينزل لصحابه شوية وبس.
الظابط:- طيب حضرتك تفتكري هو ممكن يكون انتحر؟
وكأنه صعقها بسؤاله فردت في عصبية:- لا هو منتحرش لا، أنا ابني عمره مايعمل كده، عمر نفسه ماتهون عليه كده لا هو اكيد اتقتل، امال احنا كلمناكوا ليه
وانهارت باكية من جديد فحاول الرجل تهدئتها، ثم تركها الظابط لزميله ليكمل التحقيق واتجه ناحية غرفة الشاب، وأخذ يبحث هنا وهناك عن أي دليل لما حدث، فلاحظ وجود عدة علامات تبدو كخربشة أظافر على الحائط وعلى سقف الغرفة يوجد بقعة سوداء وكأن هذا الجزء احترق من قبل، ولكن أهم ما وجده الظابط كانت أجندة ذات لون بني على سرير الشاب بجانب جثته فأخذها لفحصها.
******
وبداخل مكتبه جلس الظابط ليفحص الأدلة، فامسك بتلك الأجندة و فتحها، إنها مذكرات الفتى
"١٤/١١/٢٠١٩
النهاردة كان يوم ممل وعادي تقريبًا مكنش فيه حاجة مميزة غير كلامي مع صحابي عن ال lucid dreaming اللي عرفنا عليها عمرو صاحبي قالنا ببساطة هي طريقة تقدر بيها انك تتحكم في أحلامك وتخلق كمان الأحلام وشخصياتها وأحداثها وكل حاجة كأنك بتخلق العالم بتاعك وأن ليها اكتر من طريقة لكن اهم النقاط أنه لازم عقلك يبقى واعي وأن يبقى في حاجة ملزماك عشان تربطك بأرض الواقع وتقدر من خللها تفرق ما بين الحلم والحقيقة وقبل دا كله لازم تدون أحلامك هي طريقة مكلكعة لكني هجربها"
" ١٥/١١/٢٠١٩
انهاردة جبت مغناطيس لعبة وطول الوقت ماسكه فايدي بلعب بيه وأول ما صحيت كتبت اللي حلمت بيه كان حلم مخيف لكني كتبته بردو،استعدًا لل lucid dreaming "
" ١٧/١١/٢٠١٩
امبارح جربت ال lucid dreaming وكانت تجربة ناجحة لحد ما ،لكنها انتهت لإني خفت زيادة بسبب حلمي الغريب ،لكن مش مهم، هجرب تاني انهاردة وهسجل اللي هيحصل"
" ١٨/١١/٢٠١٩
تاني تجربة، أنا مش عارف اوصف اللي حصل، كان شيء مرعب مكنتش قادر افسر ايه الشيء ده ، مرعب لدرجة اني قمت بصرخ بعلو صوتي وصحيت البيت كله وماما جت مخضوضة تطمن عليا وفضلت جنبي لحد ما نمت، لكن أنا قررت إني مش هجرب تاني"
" ١٩/١١/٢٠١٩
النهاردة صحيت على صوت المنبه اللي كنت ظبطه عشان تجربة ال lucid dreaming، على الرغم من اني كنت لغيته خلاص، قمت شربت مايه ورجعت للسرير لكن لما رجعت تاني وقبل ما اقفل عيني عشان انام لمحت حاجة متعلقة فالسقف، فالاول قولت أن ده من تأثير الضلمة مش كتر لكن الحاجة دي زي ما تكون فتحت عينيها، عيون حمراء ومخيفة بتبصلي بتركيز شديد، محستش بحاجة بعد كده تقريبًا اغمى عليا"
" ٢٠/١١/٢٠١٩
كانت ليله صعبة اوي، أصعب ليلة عدت عليا ، كنت نايم عادي فجأة لقتني جوا حلم من الأحلام الغريبة من تاني، أرض لونها احمر وحواليا تلال رملية وسماء سودة لكني كنت واعي أنه حلم ده معناه اني جوا تجربة lucid dreaming، كان في أصوات كتير حواليا، أصوات مخيفة، وناس بتصرخ وكأنهم بيتسلخوا وهما أحياء، كنت خايف وعايز اصحى لكني جسمي ماستجبش لأمري، حاولت وحاولت لكن جسمي مشلول، فجأة بدأت ألمحه جاي ناحيتي من بعيد جسم طول ملفوف بحاجة سوداء شبه العباية مش باين غير عينه الحمراء واللي بردو مركزة معايا،بدأت اجري، لحد ما اتكعبلت ووقعت وأول ما دماغي اتخبطت صحيت بنهج وجسمي غرقان ف العرق، ده غير أني لقيت الشيء الغريب ابو عيون حمراء واقف على السقف وفضل واقف كده طول الليل وجسمي كان مشلول وفضلت فالعذاب ده لحد ما ماما جت عشان تصحيني والشيء دا اختفى"
" ٢١/١١/٢٠١٩
مش عارف اقول عليها كانت ليلة عامله ازاي لان كل لياليا بقت بالشكل ده، كنت بحاول اطمن نفسي وانام لكني حسيت بحركة عالسرير غير حركتي تحديدًا عند رجلي، بصيت عند رجلي وعلى النور الخفيف اللي جاي من الصالة شفت ابشع حاجة ممكن الواحد يشوفها طول حياته، من كتر بشاعتها مكنتش قادر ابصلها، كانت واقفة على ايدها ورجليها، كنت حاسس بضوافرها كانت غارسة فرجلي ،بدأت تقرب مني، مقدرتش استحمل ف صرخت لحد ما بابا وماما جم وماما هدتني وسألتني مالك يا حبيبي بتصحى مفزوع كتير كدا ليه؟، مكنتش عارف اقولها ايه لأن بمجرد ما بتيجي كل شيء بيختفي، لكن بابا قالها تلاقيه حلم بكابوس وهو اللي خلاه صحي وصحى البيت كله يلايلا سبيه ينام وبصلي وقالي ابقى اتغطى كويس، مكنتش عايزهم يخرجوا ويسبوني لكنهم خرجوا، قبل ما يخرجوا طلبت من ماما تسيب النور منور لعل وعسى يفيدني وأول ما خرجوا ظهرت تاني كانت واقفة عالحيطة ونطت فجأة ع السرير، لكنها المرة دي بشعتها كانت أكتر وأكتر بسبب النور مكنتش قادر اتحرك او اتكلم، قربت مني ومسكتني من رقبتي حسيت بنار لدرجة أني شميت ريحت جلدي بيتحرق، رفعتني لفوق وقامت وقفت وهي بترفعني كانت طويلة أوي ،وبدون مقدمات رمتني، اتخبط فالحيطة ووقعت على الأرض الخبطة كانت قوية لدرجة أن دماغي اتعورت وحسيت بالدم وهو بيسيل من دماغي و اغمى عليا بعدها"
" ٢٢/١١/٢٠١٩
النهاردة ماما خدت بالها أن في حرق غريب علي رقبتي معرفتش ارد عليه لكني قررت اتصلت بعمرو صاحبي اسأله إذا كان في حالات من الناس اللي جربوا ال lucid dreaming اشتكوا فيها من اضرار أو مشاكل بتحصلهم وحاولت أبين الموضوع عادي لكنه قالي مفيش.
***
أنا مش عارف أنا هعيش ولا لا، لكني قررت اكتب، المرة دي غير كل مرة، المرة دي ظهرلي الشيء اللي بعباية سودة وعيون حمراء و الحاجة البشعة التانية سوا، المرة دي الشيء ده اتكلم صوته عامل زي فحيح الافاعي قالي إني ارتكبت غلطة شنيعة وأني لازم اتحاسب وأن جزائي هو الجحيم،بعد ما قال كده قعدت انادي على ماما كتير لحد ما جت هي وبابا، بابا قعد يزعقلي وماما بتحاول تهديني وطلبت منه انها تبات معايا لكنه مرضيش وخدها وخرجوا،وأنا قررت أمسك اجندتي واكتب لأخر مرة، أنا مش فاهم حاجة ولا عارف غلطت في ايه، لا أنا افتكرت فالمرة التانية اللي كنت بجرب فيها ال lucid dreaming كنت فالارض الغريبة اللي مليانة تلال ظهر لي كائن اشبه بخنزير و قتلته لكني مكنتش اعرف كنت فاكر، انها أحلامي اللي اقدر اعمل فيها اللي احبه، لكني كنت غلطان، هما ظهروا تاني اهو واقفين قدامي دلوقتي، أنا مش عارف اعمل ايه"
****
تنتهي المذكرات هنا، ثم يغلق الظابط الأجندة ويخفيها بداخل درج مكتبه، ثم تقيض القضية على أنه انتحار ليس ألا، لكن السؤال الوحيد الذي أخذ يدور بعقل الظابط، لو ما قرأه حقيقة فما تلك الأرض وما الخطأ الذي ارتكبه الفتى في تجربته ليذهب إليها؟
بقلم #سمر_سعيد_أبوالفتوح
التعليقات على الموضوع