الواقع

حياتك كلها, هي عقلك, فلو نقلنا عقلك ف جسم حد تاني هتعيش كأنك الشخص التاني بس بحياتك و عقلك انت.

    

ده الإعلان اللي إحنا عملناه, و كنا طالبين إتنين مُتطوعين, و هيتم إختيارهم عشوائي من اللي هيقدموا, مع ذِكر سبب التطوع..

و من غير خوض ف تفاصيل الشخص اللي بيكلمكم اللي هو انا , هندخل ف القصة ع طول..

وقع الإختيار ع إتنين, هما سعيد و ياسر..

سعيد قال إنه عايز ينقل مخه ف جسم شخص تاني, عشان شكله قبيح.

و ياسر قال إنه عايز زهق من حياته اللي كلها مشاكل و قرف, و إنه عايز يبدأ حياة جديدة, ف جسم جديد..

و لما وصلوا المكان اللي قلنا لهم عليه, بصيت ع سعيد, كان شكله قبيح فعلًا, عبارة عن شاب قصير القامة, أسود البشرة إلى حدٍ ما, أصلع الرأس تمامًا, أسنانه بارزة لبرا, و عينيه ضيقة و داخلة جوا وشه..

أما ياسر فكان شاب متوسط البنية, طويل, أبيض و ف أثر جرح طولي ف خده, شعره كثيف..

بصيت لسعيد, كان ساعتها هو باصص لياسر بفرح, كأنه أخيرًا هيتحرر من الجسم اللي هو فيه..

بس إزاي ما أخدتش باله من السواد اللي تحت عين ياسر ده كله؟

بس أظن إنه بيفكر إن مع إستخدام كِريم مُبيض للبشرة كل ده هيروح..

 عطيت لهم ورقة فيها كام شرط يمضوا عليه, و هما:

1 لو مُت هيتم دفن جثتك ف أي حتة مُرفق معاها إقرارك إنك مُتنازل عن حقك, و قُصاد ده هيتم صرف مبلغ لأهلك, و إن كنت عايش لوحدك, هيتعمل لك صدقة جارية.

2 لو العملية فشلت, متجيش تتكلم و لا تفتح, بُقْك.

3 لو ف أي عضو ناخلي ناقص ف جسدك, متجيش تسأل عليه.

الشروط قاسية انا عارف, بس ف المقابل انا هعمل لهم عملية العُمر, اللي هتغير مجرى حياتهم.

(طبعًا مش هقدر أقول العملية إيه تفاصيلها, أو تمت إزاي, يكفي إنه أقول إن العملية خلصت, و تم نقل الأدمغة, فاضل بس إننا نستناهم يصحوا من النوم)

أول واحد صحي كان سعيد, اللي ف جسم ياسر.. دخلت عليه الأوضة, ساعدته إنه يقوم, كانت خطواته مش سابته و غير مُتْزنة.. قال لي بفرح مغطي عليه أثر المُخدر:

- مرايا.. عايز مرايا.

جبت له مرايا, بص فيها, حسس ع وشه, و إبتسم, دموعه نزلت, و بص لي و شكرني جدًا..

سبته يمشي طالما قادر, خليه ينعم بحياته الجديدة.. جه الدور ع ياسر اللي ف جسد سعيد..

أول ما فتّح عينه, كنت انا جنبه, ساعدته إنه يقوم, أول ما حط رجله ع الأرض, وقع مباشرةً !!

نديت ع المساعد بتاعي, قومناه إحنا الأتنين, كانت إيديه و رجليه الأتنين مرتخين !

أمرته إنه يحركهم, لكن مكنش قادر.. حاولت اتكلم معاه مش بينطق, عينه بس اللي بتتحرك, و ده الشيء الوحيد اللي بيتحرك, لكن الباقي كان أصابه الشلل !!

هربت.. هربت و سبت كل حاجة, سبت ياسر مرمي ع السرير بلا حراك..

عدّى تلات أيام, عرفت إن سعيد إتقبض عليه لأنه هربان من جريمة قتل, يعني ياسر كان مُتْهم ف جريمة قتل, و لما شافوه إتقبض عليه ع طول.

و حاولت أعيش حياتي و أتناسى اللي حصل, لكن بعد فترة قصير, كان ضميري كل يوم يعذبني, رُحت الجامع و صليت, و حكيت للشيخ اللي هناك حكايتي, لكن مرضتش أقول له إنه هربت

فقال لي:

- يعني واحد كان هربان من جريمة قتل و جاي عشان يستخبى ف جسم حد تاني, فربنا إبتلاه بشلل كُلّي, و التاني مكنش عاجبه شكله, و إعترض ع أمر ربنا و راح لجسم حد تاني, فربنا إبتلاه بالإعدام شنقًا لأنه بدّل نعمة ربنا.

بسم الله الرحمن الرحيم

وَمَن يُبَدِّلْ نِعْمَةَ اللَّهِ مِن بَعْدِ مَا جَاءَتْهُ فَإِنَّ اللَّهَ شَدِيدُ الْعِقَابِ.

صدق الله العظيم

.

.

.

الواقع

.

قصص_مازالت_تحدث

.