السيدة العجوز
الست العجوزة اللي ساكنه جديد ف الشقة اللي تحت مني دي غريبة .. ليها هيبة مرعبة .. لما تشوفها تحس انك شايف شيطانة !!
كمان بتزعم انها بتقرا الطالع .. وليها ناس بتجيلها مخصوص . بس الغريب انهم مش بيجولها غير بالليل بس .
جحيم ورعب بمجرد ما تدق الساعة واحدة بعد منتصف الليل .. صراخ .. همس .. صوت زار .. أصوات دق على طبول برتم يقشعر الجسم !
برغم كُل دا إلا إني ف مرة قولت لنفسي وليه مادخُلهاش وتقرألي الفنجان مش يمكن أسمع خبر حلو .
نسيت أو تناسيت اللي بسمعهُ كل ليلة من جوة شقتها.. بس كأن في حاجة جوايا بتشدني للست دي .. شعور غريب وكأني مسلوب الأرادة بالظبط ، بالفعل دخلتلها .. عتبة الشقة مش مُريحه ابداً .. بخور ريحتهُ يخليك تحس انك ف عالم تاني .. عالم بتشوف فيه أطياف وخيالات حواليك !!
قدمتلي قهوة ف صمت.. وبعد ماشربتها بدأت تحكيلى كل حاجة ف حياتى وأسماء وتواريخ وفاة أشخاص فى عيلتي بالتفصيل الدقيق جدا !! ..
ولقيتها بتقولي موقف وأدعت إنه هيحصلي فى المستقبل !!
قالتلي :
يوم كذا.. فى الساعة كذا.. حاول تبعد الولاعة عن هدومك لإن هدومك هتكون كلها بنزين .. مش أنت شغال ميكانيكي موتسيكلات!
كملت وقالت : وهيجيلك شحات .. أوعى تديلهُ حاجة وأوعى تقوم من مكانك ... لإنك لو قومت من مكانك وروحتله هيحصلك مكروه المحل كله هيولع وأنت أول واحد هتموت !!!!!! .
طول مانا قاعد معاها كنت مركز ف عيونها .. نن عنيها كان بيتحرك بهستيريا .. ملامح وشها كأنه بيتبدل !
مشيت من عندها وانا حاسس اني كنت مسجون .. من ساعتها وأنا بحلم بكوابيس مقبضة .
لحد ما اليوم دا فعلا جيه والوقت جيه والبنزين كان مغرقنى .. الغريب اني كنت ناسي اللي قالتهولي تماماً ف الوقت دا بالذات !!
الولاعة بتاعتى ماكنتش عايزه تشتغل .. فضلت أحاول أشغلها مافيش فايدة برضو .. أستغربت لإني لسه ماليها..
عليت الشُعلة على الأخر وقبل ما أولع بيها .. لقيت راجل عجوز لابس ماسك عُكازات ولابس جلابيا بيضا متوسخه و .. و لابس نضاره وبيقولى حاجه لله يا أبنى الله يرضى عنك .!!
حطيت ايدي ف جيبي .. وقمت علشان أدي الراجل دا اللي فيه القسمه .. لكن لقيتها بتمشي ورا الراجل وبتبُصلي !!
نظره مرعبه .. حسيت زاي اللي كنت ف غفله وفوقت منها .. أفتكرت كلامها .. مابقتش مصدق .. وف الأخر مادتلوش حاجه .. وسمعت كلامها ورجعت أقعد على الكرسي تاني وانا ماسك راسي .
سامعه بيترجاني .. سامعه بيقولي ماكلتش من امبارح .. سا سامعه بيبكي .. لكن ماتحركتش من مكاني .
بعد اليوم دا بدأت أسمع الأصوات الغريبه جايا من الدور اللي تحت مني كل يوم باليل وف نفس الوقت .. موسيقى لحنها غريب ومرعب زادت على صوت الطبول ..
لحد ما أتفاجئت أن الست دي أختفت تماماً .. مابقاش ليها أثر .. حتي الناس اللي بيجولها مابقوش عارفين هي راحت فين .
لحد ما ف يوم كنت راجع من الشغل تعبان .. وطالع من على السلم .. م .. م ..مش عارف أزاى دا حصل لقيتنى وقعت قدام باب شقتها .. حسيت أن حد زقني !
جيت علشان أقوم لكن ماقدرتش .. تلقائى بصيت تحت عقب الباب "المنظر كان مرعب جداً ومقبض .. ضوء أحمر وموسيقى عاليه جداً أشتغلت لما وقعت .. شامم ريحة البخور المفضل ليها .. ومع كل دا بدأت أشوف رجل .. رجل م م معزه عدت قدامي ..هتقوليلى عرفت أزاى هقولك إن المعزة مالحقتش تعدى قدامي .. لإني شوفت رجل سودة بتمشي وراها وف غمضت عين لقيت راس المعزة بتدلدل قدامي وراسها كلها دم .. دم أسود!
كل دا وأنا واقع ف الأرض ومش قادر أتحرك كنت حاسس ان فى جبل فوق ضهرى , لقيت راس المعزة بتتسحب بكل قوه وأترفعت ماشوفتهاش تاني بس شوفت الدم وهو بينقط قدامي .. وبأعلى صوت سمعت صرخة .. صرخة من قوتها كانت أعلى من الموسيقى اللى كانت شغاله!
وفجأة الشقة كلها بقت سواد ..كحل .. اللون الأحمر أختفى والموسيقى سكتت وكل حاجه بقت هادية.
قومت بسرعة وجريت على شقتى .. من يوميها وأنا بشوف الست دى ف أحلامي وف الحقيقة كمان .. وشها بقى إسود قااتم .. شعرها بيقع .. ولما كانت بتختفي من قدامي .. شعرها اللي كان بيبقي على الأرض ماكنش بيختفي !!
بقيت أسمع أصوات جايه من الحمام فى نص الليل .. دا غير الموسيقى اللى بتشتغل لواحديها كل ليلة بعد إختفاء الست دى وف نفس الوقت المعتاد , قبل ما أنام كل ليله بحس بأصوات بتهمس ف ودانى .. مره صحيت لقيت نفسى فى الحمام وبهز جسمى يمين وشمال !
البيت كله ملعون ، الست دى كانت بتسخر جن وبتعمل أعمال سفليه مرتبطه باللى هى كانت بتعمله والعياذ بالله الشيخ اللي صاحبي جابهولي قال كدا ..
الشيخ الله يباركله هو السبب بعد ربنا إنى أرجع تانى زى الأول والحمد لله من ساعتها مابقتش أسمع ولا أشوف حاجه .. الشيخ قالى كمان إن كان عليك جن يهودي .. حضر عليا لما كان بيقرأ قرءان _الشيخ_ .
بس مش عارف ليه بعد يومين لقيت الشيخ بيتصل بيا وبيقولي إمشي .. إهرب وسيب البيت فوراً!
لأ والغريب إن صاحبي قالي نفس الكلام تقريباً .. لما سألتهم عن السبب قالولي تقريباً نفس الرد .. شافو كابوس إتأكدوا منهُ إن الست أأأأ.. انها .. انها مش بني أدمة أصلاً!!
.. الست العجوزة كانت جنية!
والجن اللي كان عليا والشيخ حرقهُ كان ابنها .. وانها هترجع تنتقم من اللي كانو السبب وهتبدأ بيا أنا .
تمت .
التعليقات على الموضوع