رواية صراع بين الحب و الثأر الحلقة 42

💘   الحلقة    ٤٢  قبل الاخيرة  💘

.
💘💘💘💘💘💘💘💘💘💘💘💘💘💘💘💘

.

اياد / انا لازم اخرج اصلى عازم قمر على العشاء برة ولما ارجع نتكلم

اياد خرج من اوضة عمار و عمار متعصب اوى و قمر بتنزل
 و اياد مستني تحت وبيخرجو و عمار بيروح على الشباك وبيشوف قمر و اياد ريحين على العربية والغيرة بتاكل قلبو ومش قادر يعمل  اى حاجة

مراتو وحببتو وروحو وكل حاجة عندو فى الدنيا مسكة فى ايد حد تانى وهو واقف وميقدرش يتكلم وبيمشو وبيخرجو من الفيلا و عمار بيتعصب اوى وبيضرب الكرسى بايدو وبيرجع يقاعد على السرير ودموعو بتنزل       

.       **********************************

.
 

 الصعيد

حسن فى المصنع وصوتو عالى

حسن / يعنى اية الخامات متشحنتش على العربيان العربيات دى لازم توصل على القاهرة النهاردة ولو اى عامل خرج من المصنع قبل ما العربيات دى تتحمل وتخرج يعتبر نفسو مرفوض يلا الكل على شغلو

.
      **********************************

.             


حسن بيروح على الفيلا واحمد واقف مستنيه

احمد / حسن عمك فؤاد اتصل بيا وبيقول الخامات موصلتش والشغل واقف ودى خسارة كبيرة

حسن / انا اتكلمت مع العمال دلوقى وخلال ٣ ساعات العربيات هتتحمل

احمد / وانت هتسافر معاهم تسلمهم بنفسك

حسن / انا بس

احمد / جهز نفسك هتروح معاهم

حسن / حاضر يا بابا

حسن بيطلع لمي فوق و مي مش فى الاوضة وبيخرج يشفها

حسن / سندس فين مي

سكينة / مراتك فى المطبخ وقالتلنا انها هتعمل مفاجاة لينا

حسن / مفاجأة مي فى المطبخ

حسن بينزل لمي وبيروح على المطبخ وبيدخل والمطبخ مليان دقيق وبيض على الارض و مي بتعيط

حسن / مي

مي بتشوفو بتروح علية وبتحضنو واديها مليانا دقيق

حسن / انتى بتعملى اية

مي / كنت عوزة اعمل كيكة انا شفت الطريقة بس

حسن / طب تعالى يلا

مي / طب والكيكة

حسن / انتى بتسمى دى كيكة خلاص هخلى سندس تعملهالك

مي / لا انا الى هعملها

حسن / خلاص بقي علشان متازيش نفسك

مي / بلاش تعاملنى انى طفلة صغيرة

حسن / زب يلا خلينا نخرج من هنا

مي / لا انا هعمل وحدة غيرها

حسن بصوت عالى

حسن / قولتلك خلاص

مي بتبصلو بحزن

حسن / انا اسف مش قصدى بس عندى مشاكل فى الشغل

مي بتروح علية وبتحضنو وبتبوسو من خدو

حسن / انا مسافر النهاردة على القاهرة وممكن اتاخر يومين هناك

مي / وانا هاجى معاك

حسن / لا مينفعش الطريق طويل عليكى انا هطلع ارتاح شوية قبل ما اسافر

.
      **********************************

.             

 اسكندرية

عمار فى الاوضة وبيسمع صوت عربية وبيروح على الشباك
وبيشوف قمر و اياد رجعو و قمر بتبص على شباك اوضة عمار   و بيكون واقف وبيبصلها و قمر بتتوتر

قمر و اياد بيروحو على الفيلا

فاطمة /حمدالله على السلامة ياولاد

اياد / فى خبر حلو قمر هتقولهولك

فاطمة / خبر اية

عمار بيسمع صوتهم وبيروح عند الباب وبيسمع و قمر بتحس بية انو واقف وري الباب

قمر / انا و اياد قررنا نعمل خطوبة كمان يومين لحد ما نحدد ميعاد الفرح

عمار بيسمع كدة وبيفتح الباب وبيبص لقمر و قمر بتشوف الغضب فى عنية

فاطمة /الف مبرووك يا حبيبى ايوة كدة لازم يكون فى خطوة

اياد / انا هسبكو تفرحو وهطلع انام احسن عندى عملية بكرة الصبح تصبحو على خير

اياد لسة هيطلع وبيشوف عمار

اياد / انت لية واقف كدة

اياد بيروح علية وبيسندو

عمار / مبرووك

اياد / عقبالك

عمار / بس انا متجوز

وبيبص لقمر اوى و قمر بتبصلو

اياد / طب تعالة اقاعد الاول

وطاهر بيسندو وبيقاعد على السرير و فاطمة بتدخلهم ومعاها قمر و قمر بتقف على الباب ومتوترة اوى وباين من حركات اديها

فاطمة /متجوز ومش تقولنا يا ابنى وعندكو ولاد

عمار / لا

فاطمة / بس لازم نتعرف عليها

عمار / ان شاء الله

اياد / زمنها قلقانة عليك

عمار / هى مسافرة بس هترجع قريب اوى اتفضلى يا انسة قمر ادخلى

قمر / انا لا انا تصبحو على خير هطلع انام

عمار / اية مش عوزة تشوفى صورة مراتى

عمار بيمسك الجاكيد بتاعو وبيفتش فية وعيونو على قمر

عمار / يااة للاسف الصورة شكلها ضاعت منى بس اكيد هجبها تتعرف عليكو هى حلوة اوى

اياد / بس اكيد مش احلا من قمر حببتى

عمار / هى تشبة قمر اوى كمان قصدى الانسة قمر

اياد / انا بكرة هجبلك عجازات ممكن تتحرك بيهم شكلك مليت من الاوضة تصبحو على خير

 والكل بيخرج وبيطلعو على الاوض و قمر سرحانة اوى فى تلميحات عمار

.
      **********************************

.             

 الصعيد

 حسن فى العربية مسافر على القاهرة

مي / حسن خدنى معاك وحياتى عندك بابا وماما وحشونى اوى

حسن / مينفعش السفر غلط عليكى وكمان هتقوللهم اية على بطنك كبرت بالسرعة دى ازاى يعنى

وَ حسن راح على القاهرة

.
      **********************************

.             

فاتن فى الفيلا بتكلم اسيل فى التلفون

اسيل / يعنى مفيش حد يعرف عنو اى حاجة

فاتن / انا كلمت عادل وقالى انو كويس بس مش عاوز يكلم اى حد

اسيل / انا مسافرة كمان اسبوع

فاتن / مسافرة

اسيل / اة هروح اغير جو شوية فى عرض شغل جالى

فاتن / شغل اية ومراد يابنتى

اسيل /هخدو معايا اكيد مش هفضل قاعدة فى البيت واخلى اى حد يصرف علينا

فاتن / اى حد اية احنا اهل

اسيل / متزعليش منى بس انا كدة هكون مرتاحة اهم حاجة عمار يكون كويس

.
      **********************************

.             

  اسكندرية

فى الصباح  عمار سهران طول الليل وريم بتدخل علية

ريم / بوسى بوسى بس بس

عمار / تعالى هنا

وريم بتروح لعمار

عمار / بتدورى على اية

ريم / بوسى القطة بتعتى راحت وزعلانة منى علشان ملعبتش معاها

قمر / ريم ريم

قمر بتدخل على اوضة عمار

قمر / ريم انتى هنا يلا تعالى علشان تفطرى

ريم / لا انا عوزة القطة بتعتى

قمر / خلاص هجبلك وحدة غيرها

عمار / لا لو بتحبيها هتلقيها دورى عليها لو بتحبيها

قمر / حببتى لو بتحبك مكنتش سابتك ومشيت

عمار / حببتى روحى دورى عليها لازم تلقيها يلا اجرى

وريم جريت بسرعة

ريم / بوسى بوسى

قمر بتبصلو وبتخرج

عمار / استنى

قمر بتبصلو وبتمشى وبتسيبو

.
      **********************************

.
           

القاهرة

 حسن فى المصنع بيسلم الخامات للشركة وبيطلع فؤاد من المكتب

فؤاد / اتفضل

وبيدخل حسن

حسن / انا قولت لازم اجى بنفسى واقولك ان الخامات وصلت المخازن وبكرة هاجى اتمم عليهم قبل ما الماكينات تبدا شغل

فؤاد بيبص لحسن اوى

فؤاد / تعالة اقاعد تعالة

حسن بيقاعد قدمه

فؤاد / سيبك من الشغل وقولى عملين اية انت و مي

حسن / الحمد لله لو انا خلصت شغلى هروح ارتاح

فؤاد / استنى نروح مع بعض

حسن / لا اصل انا حاجز اوضة فى فندف قريب من الشركة

فؤاد / يعنى بيت حماك موجود وتحجز في فندق

حسن / علشان اقدر اباشر الشغل بنفسى

فؤاد / لا هتيجى معايا

حسن / لو سمحت خلينى برحتى

حسن بيمشى

.
      **********************************

.             

اسكندرية

اياد رجع ومعاة عجاز لعمار علشان يقدر يتحرك و عمار بيجربو وبيخرج من الاوضة

فاطمة / الف حمدالله على سلمتك يا ابنى عقبال ما تستغنا عن العجازات دى خالص

 قمر وقفة و عمار بيروح عندها وبيتكعبل و قمر بتجرى علية وبتسندو وعنيهم بتيجى فى عيوون بعض

اياد / معلش لحد ماتتعود عليهم كلها اسبوع وتقدر تدوس على رجلك وحدة وحدة

فاطمة /انا هاخد قمر ونخرج نشترى شوية حاجات علشان الخطوبة يلا قمر

قمر بتخرج مع فاطمة

اياد / انا وانت لوحدينا بقي تحب نعمل حاجة

عمار / لا انا هدخل ارتاح شوية بعد ازنك

وريم جريت على عمار ومعاها القطة بتاعتها

ريم / انا لقيت القطة بتعتى

عمار / شفتى قولتلك هتلقيها

ريم / لقتها فى اوضة بابى

عمار بيبص لاياد وبيكلم نفسو

عمار / شكل ابوكى بياخد كل حاجة مش لية

ريم / انا هروح العب

             

.
      **********************************

.

عمار بيروح على الاوضة وموبيل عمار بيرن

عادل / عامل اية دلوقتى

عمار / بمووت فى اليوم الف مرة

عادل / انا مش عارف انت عندك بتعمل اية لو متاكد انها قمر روح هتها من اديها ورجعها البيت

عمار / مش بالسهولة دى انا وجعت قمر اوى وكان المفروض اكون بعيشها اجمل ايام عمرها معايا بس للاسف انا عيشتها اسوء ايام فى حياتها انا كل امنيتى انها تكون سعيدة وبس

عادل / بس انت كدة بتتعذب

عمار / انا كل عذابى لما بشوف الى اسمو اياد دة بيبصلها ولا بيلمسها ببقي عاوز امسكو انزل فية ضرب

عادل / انت الى اخترت استحمل بقي

عمار قفل التلفون مع عادل

وردة ✍️