وصال الجزء الثاني

وصال2
نظرت فرحه خلفها الي مصدر الصوت لتجد مديره المدرسه وبجوارها رجلان احدهما تبدو البساطه علي ملابسه والاخر تفوح منه رائحه عطر قويه مرتديا احدي السترات الفاخره  طويل القامه قوي البنيه حاد الملامح بنّي الاحداق ..
-انتي غير مسئوله بالمره تخلي عيله صغيره للوقت ده واحنا زي النحله شغالين ندور عليها
=حضرتك بتكلمني انا !!
-شايفه ان في حد هنا غيرك يا استاذه!!
-بس انا..
=وصااال تعالي هنا اتاخرتي بما فيه الكفايه
-بابا ..
=انتي معاقبه يبقي متتكلميش لحد م نروح قدامي يلا

سحب الصغيره من يدها ورحل دون أن يلتفت وراءه تاركا فرحه في وجومها ,سحبت حقيبتها هي الآخرى ورحلت في هدوء دون مبرررات واكتفت بالهمهمه في سرها .."والله المستعان علي ما تصفون"

-انتي لو بتخترعي فون جديد مكنتيش هتتأخري كده
=مكتوبلنا ناخد تاكسي
-عليه العوض ومنه العوض ع المرتب اللي راح
=بنت عييب احنا البنات !!
-سكرررر نباااات
=ذاتس ماي جيرل
...
الرابعة فجرا علي ضوء خافت في الركن الثالث من غرفتها تجلس علي مصليتها بعد انتهائها من الصلاه تدعو وتبتهل الحي القيوم لا ترتب الحديث وانما تدع قلبها يخرج ما في جعبته ليتولي لسانها الدفه والله خير من ينصت لحديث الروح في جوف الليالي حالكه السواد ..
..لا ارجو خفه الحمل لكن قوه الظهر يا الله
=مش هتنامي ؟؟
-دعيتلك
=ربنا يباركلي فيكي يا بنتي ويجعلك من اسمك نصيب
اكتر من انه اداني ام زيك لااا كده كتييير بصراحه
-يا بكاشه
=قلب البكاشه
-طيب الحقي ناميلك الساعتين دول عشان وراكي شغل بكره
=نص ساعه وجايه
-يا بنتي لو منمتيش الليل دلوقت الليل هينام تحت عيونك وهيبقي يا نهار هالات سودا
=فكريني افصل عليكي الواي فاي بكره قبل م اروح الشغل يا ست الكل
....
-خمس تلااااف جنيييه !!!
= بالظبط كده
-مدرسه خصوصي وخمس تلاف طب ازاي!
=منا فهمتك يا فرحه مش بالمعني اللي فاهماه انتي تقدري تقولي هتديها دروس في كلله او هتذاكريلها حتي الدين لانها ميح فيه
-طب وهديها في سنتر الطالبه دي
=لا في بيتها والسواق بتاعها هيوصلك لحد البيت كل يوم يعني مسهلينلك كل حاجه بس في مقابل انك تحتويها علميا واجتماعيا
-واشمعنا انا طيب م المدرسه فيها مدرسين كتير اقدم مني
=ببساطه لانها عايزه كده وطلبتك بالاسم ومجتش انهارده ووالدها اللي طلب مني اكلمك عشان بس خاف لتحرجيه
-واحرجه ليه ؟؟
=عشان اللي حصل امبارح يا انسه فرحه
جائها الصوت من خلفها التفتت لتجده ..
=جيتلك بنفسي اعتذرلك  وصال فهمتني كل حاجه اتمني تقبلي العرض اللي قالتلك عليه المديره مش عشاني حتى عشان وصال ..
عادت فرحه برأسها ناحيه المديره لتعيد ترتيب الاحداث برأسها ..
-حضرته جاي يعتذرلي عشان ادي بنته دروس ولا عشان غلط في حقي امبارح ؟؟
=نيه الاعتذار واضحه يا فرحه يا بنتي
-بس مش واضحالي يا حضره المديره
=امبارح كان في سوء تفاهم واانا هنا عشان الاتنين لو معندكيش مانع
-هبدأ امتي الشغل ؟؟
.....
=كل يووم يا فرحه انتي بتهرجي وهتقدري توفقي بين المدرسه والدروس دي ؟؟
-الله المستعان هقدر يا حنان ..هقدر

" يقول نجم : من سار بين الناس جابرا للخواطر ادركه الله  في جوف المخاطر !"
....
-يا مس فرحه ياا مس اناا عم مدبولي يا مس
=عم مدبولي !!
-ايوه بعتني الباشمهندس امير عشان اوصلك
=امير !!
-ابو الست الصغيره
=الست الصغيرره !!
-ابااااي عليكي يا مييس الست وصااال
=وصاااال ااااه طب مش تقول كده يا راجل يلا يا عم مدبولي يلا استعنا ع الشقا بالله
....
حديقه صغيره تتوسطها ارجوحه  وبضعه شجيرات علي حدودها والازهار تتخللها لتضيف اليها بهجه من نوع خاص ,طول الممر ما يقارب بضه مترات خطتها لتصل إلى باب كبير كأنه يودي لقصر ما من فرط الزخارف التى تعتليه ,ما إن خطت اولى خطواتها داخل البيت حتي علت صيحه صغيره لتنظر بإتجاه الصوت فإذا بوصال تركض إليها فاتحة ذراعيها على مصرعيها ..
- مسسسسس فرررررررررررحه !!!
- يا روحي
- جبتي نجم معاكي ؟؟
- لا بس باعتلك معايا ملبس بالفراوله
- فلاوله
- انتي اللي فلاوله والله
- نورتي يا مس
- بنورك يا باشمهندس
- طيب تحبي تديها في الصالون ولا تفضلي اوضتها
- اوضتي يا مس من فضللك
- مش هتفرق خلاص خلينا في اوضتها
امسكت وصال بيد فرحه وهمت بالركض إلى أعلى حتى صاح فيها امير ..
-بننننت فين الاتيكيت عيييب كده
انكمشت وصال وعادت خطوتين خلف فرحه لتنظر إليه فرحه باستياء ..
-من فضلك لما تيجي تتكلم معاها متزعقش كده دي طفله ..مجرد طفله
-الطفله مسيرها تكبر يا انسه فرحه ولازم تتعود من صغرها ازاي تمشي امتي تتكلم امتي تقف وامتي تمشي..
-وامتي تتنفس كمان مش كده ؟؟
-انا جايبك عشان تعلميها مش تقلبي النظام اللي ماشيه بيه
-واضح ان مش هي خالص اللي محتاجه تتعلم ..يلا يا وصال

صعدت فرحه لاعلي تصطحبها وصال متجهة إلي غرفتها تاركة أمير وسط حنقه ليتصاعد صوت ضحكات مكتومه خلفه ..
-انتي بتضحكي علي ايه ؟؟
= حبيتها قوي المس الجديده دي
-روحي يا ام علي اعمليلي قهوه وربنا يعديها على خير الفتره دي
....
- من الجِنَّةِ والنّاس ..
=من الجنه والناس
-لا الجنةِ اكسري التاء المربوطه مش تقفي عليها وتنطقيها هاء
=من الجنّةِ والنااس ..تي تي اهو
-مين هياخد ملبس فراوله ناو
=اناااااااا
-بكره هسمعهالك كامله اتفقنا
=اتفقنا ..هو انا المفروض لما افرح بسبب حد اجيبله ملبس فراوله
-تدعيله ..اللي يفرح بسبب حد بيدعيله
=هدعيلك
-يا روحي انتي ,هحبك اكتر لو قولتيلي اجيب ميه منين في البيت الطويل العريض ده
=تحت المطبخ فيه داده ام علي اروح اجيبلك انا
-لا يا روحي خليكي انتي احفظي هنا علي بال م اجيلك

ما إن خرجت فرحه  إلى الطرقه التى امام غرفة وصال حتي انقطع التيار الكهربائي لتصطدم بشيء ما علي حين غرة فكادت أن تسقط لولا يد احدهم خرجت من اللاشيء وجذبتها لتنطلق صرخاتها في ارجاء المكان ..يد تمسك بها والاخرى تكممها ..
=بس بس ششششش اسكتي بقي انا امير
_مممممم ممممممممممممممم
=خلاص اهدي خبطتي فيا ولحقتك قبل م تقعي
-مممم مممم ممممم مممممممم
=مفيش داعي للشكر انا ..
جاءت قطعه من النور لتكشف موضع فرحه وامير فإذا بها وصال ممسكة بكشاف الهاتف مسلطة إياه علي كليهما وكان المشهد كالتالي..
يد امير حول فرحه باحكام وكلتا يديها مضمومه إلى صدرها وكأنها مكتوفه ويده الآخرى علي فمها مكمما إياها منعا من الصراخ مجدداا عينا فرحه جاحظتان من هول الوضع استفاقت علي صوت وصال وهي تسأل امير..
-بابا انت هتخطف مس فرحه ؟؟

في حركة مفاجئه تملصت فرحه من يدي امير وابعدته بكلتا يديها بضعه خطوات للامام لتصيح في توتر ..
-ال الل فين؟؟
=ايه هويا مس ؟؟
-البتاع فين اللي انا رايحاله ؟؟
=اللي هو ايه ؟؟
-الميه الميه عطشانه
=اهدي انا هخلي ام علي تجيبلك الميه لحد عندك
-لا متشكره انا هجيبها من تحت بنفسي

همت فرحه بالتقدم حتى خانتها ساقها فتلعثمت في ردائها ليختل توازنها مره اخرى ويلتقطها امير وهي علي وشك السقوط مجددا ..
=اسم الللللله عليكي
-يوووووووه هو يوم مش فايت ...ايدك من فضلك
=اه سوري نسيت
-مس انتي كويسه ؟؟
-بحاول والله
=قولتلك خليكي زي م انتي والميه تجيلك لحد عندك
-ماشي
=ايه ده بسهوله كده مش هتناهتي معايا تاني ؟؟
-هو الواحد لازم يقول احدٌ احد في بيتكم عشان يشرب بق ميه
=المس بتاعتك دراما كوين في نفسها يا وصال يا حبيبتي
-يعني ايه دراما كوين يا مس؟؟
-يعني صبوووره يا وصال وللصبر حدود يا روحي
=يااااااام عليييييييييييي شب ميه للانسه لتقول علينا بخلا ولا حاجه
....
-برنلك فونك مغلق ليه ؟؟
=معلش يا ماما والله فصل شحن مني اول م خلصت جيت علي طول
-وهتفضلي يا بنتي كده كل يوم
=اه يا امي متقلقيش عليا عم مدبولي بيوصلني لحد باب البيت
-يا بنتي انا مش علي كده انا علي تعبك ده ,مين يستحمل شغل من سته الصبح لتسعه بالليل متواصل كده
=ربنا بيدي الحمل علي قد طاقة العبد يا امي متشليش همي
...
-وصاااال
=نعم يا بابا
-شووفتي جبتلك ايه
=ملبس فراوله ؟؟
-لا
=خلاص مش عايزه
-دي شيكولاته المفروض الاطفال كلها بتحبها
=من نجم البحر ؟؟
-من ايه يا عنيا ؟؟
=خلاص مش عاوزاها
-بت انتي
=مس فرحه قالتلك متزعقليش عشان انا طفله
-متأكده انك طفله !!
=بابا عاوز ايه علشان معاد نومي جه ومتأخرش بكره ع المدرسه
-انتي لا يمكن تكوني بنتي لاء ثم من امتي الاجتهاد ده انا بصحيكي بالطبل لبلدي ومبترضيش تروحي المدرسه
=لا منا خلاص هاخد في فصل المس فرحه من بكره الوضع اختلف
-الوضع !! اللهم طولك يا روح من حصه واحده اتقلبتي =كده اومال لما تكملللك هتعملي فيا ايه
-هدعيلك
=نعم
-هدعيلك يا بابا ,مس فرحه قالتلي لما نفرح من حد ندعيله وانا فرحانه منك عشان عشان جبتلي المس فرحه
=مس فرحه مسسس فرحه مسسسس فرررررررررحه قومي با بت نامي
-بابا من فضلك
=قومي يا وصال يا ابنتي اخلدي الي السرير
-تصبح علي خير ابي العزيز
=وانتي من اهله يا ابنتي فيحاء
احم ، فيحاء اا قصدي وصااال انتي نمتي ؟!
-لسسه يا بابا
=طيب يا قلب بابا كنت عايز بس اسألك هي مس فرحه ادتك رقمها وسجلتيه
-ليه ؟
=عشان..  عشاان اه عشان لما تتأخر ترنيلها تستعجليها التلتزام مطلوب طبعا
-اه يا بابا سجلته
=اها برافو عليكي فتاه مطيعه.. وعلي كده شحنتي الفون بتاعك ولا اشحنهولك انا قبل م تنامي
-شحنته يا بابا جزاك الله خيرا
=خيرا اه..  سلام عليكم

"يقول نجم : اعذب الوصل ما القت به الاقدار صدفة ليزهر الروح بعد افتقارها"
...
=اهلا اهلا يا امير المدرسه نورت
-بنورك يا حضرة المديره
=لعله خير ورا زيارتك دي
-خير باذن الله هو الحقيقه انا جاي وقاصد حضرتك في خدمه
=اتفضل
- فرحه
=مالها !!!
يتبع