نقطه و سطر جديد (الحلقه الثامنه)
الفصل الثامن
طلع الموبايل من جيبه لاقاه فصل شحن و مرة واحدة الباب اتفتح و كانت نور
عمرو : يخربيت سنينك .. قلبي كان هيقف
نور : اصل انت اتأخرت قولت اطلع اشوفك محتاج حاجة
عمرو : لالا انا خلصت بس رتبي معايا السرير كدا زي الأول .. و نمشي قبل ما سمر تيجي
نور : وانا همشي معاك ؟ ولا ايه
عمرو : انتي خلصتي الحصة بتاعتك ؟
نور : خلاص همشي بعدك استناني في اي كافيه قريب
عمرو : ماشي بس قبلها اغير اللبس ده
خرج عمرو من الفيلا و رجعت نور تكمل شرح ل جوري و بعد ربع ساعة خرجت نور
_____________________________________
فاطمة : عدي انا خايفة .. انزل بقي انت كنت كويس ايه الي جرالك
عدي : تفتكري الواحد بيشوف ايه لما بيخبط في الأرض
فاطمة بتقرب منه في حذر : عايز تنتحر عشان تخسر دنيتك اللي قرفتك ؛ طيب ما انت برضو هتخسر اخرتك كدا .. و بعدين فهمني كدا انت مستعد تقابل ربنا .. محضرله نفسك يعني كويس ،كدا هتموت و ربنا مش راضي عليك ، يعني تعيش مخنوق و مكتئب و كمان عايز تنتحر و لا ترتاح دنيا ولا اخرة
عدي : انا مبقتش قادر كل حاجة كنت مختارها كانت غلط كان قدامي الصح و كنت بعمل الغلط عمري ما تخيلت أنها تخوني
فاطمة : بس كل حاجة في الدنيا ليها حل .. ممكن اللي فات يبقي وحش لكن انت في إيديك اللي جاي يبقي احلى .. بس خليك قوي بربنا مش بالناس .. صدقني يا عدي مش هتستفيد حاجة هتعيش حياة ابدية في عذاب لو انتحرت .. يعني لا دنيا ولا اخرة كمان ؛ ده احنا بنتحمل قرف الدنيا عشان نوصل للاخرة و ربنا يعوضنا .. عارف في آيات بحبها اوي "لا تدري لعل الله يحدث بعد ذلك أمرا" ... و فيه اية كمان بحبها جدا بتقول " و اصبر لحكم ربك فإنك بأعيننا "
عدي : صدق الله العظيم
فاطمة : انت في عيون ربنا و ربنا لأنه بيحبك بيبتليك
عدي نزل من علي السور و نام علي أرضية السطح و غمض عينيه و فاطمة قعدت جنبه و حاولت تهديه
_____________________________________
اسلام بيرن علي رقم مرام الصوت كان قريب من ندي ، قربت منه مرام لحد ما اتأكدت و خرجته من شنطتها و كلهم مصدومين و ندي بتحاول تستوعب اللي بيحصل
ندي دموعها نزلت:ايه ده انا والله العظيم ما سرقت حاجة
مرام بنرفزة: يعني الموبايل طلع معاكي انتي يا حرامية انا هعملك استدعاء ولي امر و هعلمك الأدب
مرام كانت لسة هتمد ايديها و تضربها ، اسلام وقفها و شد ندي بعيد
مرام : طيب انا هجيب المدير
_____________________________________
في غرفة عدي كان قاعد علي سريره و فاطمة جنبه
عدي : هو انا ليه منتحرتش
فاطمة :لان حياتك دي مش ملكك عشان تنهيها بايديك دي ملك اللي خلقها .. عارف ان ربنا بيحب يختبر صبر عباده عشان يرجعوله في ضعفهم .. لما حطك في اللي انت فيه ده كان عشان ترجعله و الاختبار لازم يكون صعب .. بس دايما لازم يكون عندك يقين ان ربنا في اللحظة اللي انت بتوصل فيها لاخرك و تستغفر كتير بيحول كل حاجة حلوة في حياتك و بيفهمك حكمته من اللي انت فيه ؛ خليك واثق ان ربنا احن عليك من اي حد ده كلنا عايزين يوم القيامة عشان نشوف ربنا يعني شوية المشاكل دول اللي هيتحلوا كانوا هيمنعوك عن لقاه
عدي :بحاول ابعد عن فكرة الانتحار بس مش عارف
فاطمة : معنى انك بتسأل ليه منتحرش ان فيه حاجة جواك و جزء بيقولك متنتحرش و دي حاجة كويسة .. انا معاك ان الحياة صعبة و فيها ضغوطات كتير بس احنا بنفكر تفكير محدود و ضيق عشان بنوقف حياتنا علي أشخاص و علي مواقف و علي مشاكل ناسيين ان دي ابتلاءات بناخد اجر عليها ممكن تدخل الجنة بسبب صبرك علي الابتلاءات و بكدا قدامك اختيارين يا تموت و تدخل النار و تتعذب يا تصبر و تقبل من ربنا و تدخل الجنة اللي بمجرد ما تدخلها هتنسي كل حاجة حصلتلك و اي وجع و هتفضل في النعيم ده دايما و خليك حاطط في دماغك ان الدنيا كدا كدا فانية و الناس اللي كانوا السبب يوصلوك للحالة دي متخليهومش ينجحوا و ينتصروا عليك مرتين هما نجحوا اول مرة لما دمروك نفسيا و المرة التانية لو كنت هتنتحر هتبقي خسرتك الدنيا اللي المفروض تكون عايش فيها مبسوط و خسرتك اخرتك كمان .. صدقني محدش يستحق انك تضحي برضا ربنا عليك و تاخد خطوة زي دي .. الدنيا اللي احنا فيها دي كانت عقاب لسيدنا آدم .. ف لازم يكون كلها تعب و مشقة
عدي :بس هما عاشوا حياتهم و مبسوطين .. و احنا اللي بنتعذب
فاطمة :هي اه انتصرت مرة بس انت مش هتسيبها تنتصر عليك التانية خليك ثابت و متتأثرش بأي مواقف او ضغط .. اقف و اتفرج عليهم و اضحك علي اللي بيحصل .. فكرك يعني ان دي هتكون آخرتها ايه دي اتجوزته عشان فلوسه و هو عشان يتمتع بيها و بجمالها يعني لا ده هيكسب ولا هي هتكسب ..قول لنفسك بقي انك قوي و هتتخطي كل ده و هتخف و تخرج من المستشفي و ترجع اقوي و انجح من الأول
عدي بصلها و ابتسم: انا فعلا بقي عندي طاقة اني ارجع اقوي من الأول .. انا هستغل فترة وجودي في المستشفي و اشتغل علي اللاب و أتعلم علي برامج جديدة و اقوى من شغلي
فاطمة :أيوة كدا وانا هساعدك في اي حاجة تحتاجها
عدي : خليكي معايا كلامك بيخليني اقوى
فاطمة :وانا مش هسيبك
_____________________________________
في الفصل كان المدير و بعض المدرسين موجودين و ندي بتعيط و مش مستوعبة ازاي الموبايل اتحط في شنطتها
اسلام : ندي مسرقتش حاجة يا مستر علاء
مرام بسخرية : و الموبايل طلع من شنطتها ازاي
اسلام : ندي مستواها المادي كويس جدا يعني مستحيل تسرق موبايل زي ده يا مستر علاء
المدير : ايوة يا إسلام بس الموبايل طالع من شنطتها
اسلام :حصتي كانت بعد البريك و مس مرام علي كلامها أنها نسيت موبايلها قبل البريك و مفتكرتهوش غير وقت حصتي اللي المفروض ان البريك مكنش فيه حد خالص في الفصل يعني ممكن جدا حد يحط الموبايل في شنطتها
مرام : انت بتدافع عنها ليه
اسلام :مش بدافع بس موبايل زي ده حتي لو ب 20 الف جنيه و غالي زي بتاعك .. باباها او مامتها يقدروا يجيبولها 100 واحد زيه ف مفيش اي مبرر أنها تسرق موبايلك و ندي مستعدة تحلف علي مصحف ان مش هي اللي اخدته و اظن ده ابسط حاجة
المدير : وانت متأكد منين يا اسلام ما فيه ناس أهلهم اغنية لكن بيسرقوا و تقريبا بيكون مرض
اسلام : تقدري تحلفي علي مصحف يا ندي انك مسرقتيش الموبايل بتاعها
ندي : ااه احلف
مرام اتضايقت من تصرفه : اومال مين يعني اللي حطه في شنطتها
اسلام : حضرتك تقدري تسألي نفسك السؤال ده .. المصحف فين
واحدة زميلة ندي اعطتها المصحف
رغد :بس خلي بالك يا ندي حلفان المصحف مش سهل لو انتي اخداه اعتذري بدل ما يحصلك حاجة وحشة يعني لاقدر الله
ندي مسكت المصحف بكل ثقة و حلفت ان هي مش اخدته
اسلام : اظن دلوقتي اتاكدتوا لو كانت هي عمرها ما كانت هتحلف عليه كدب .. و تضيع نفسها يلا بقي كلوا يروح فصله عشان نكمل الحصة اللي راحت نصها دي
ندي قربت منه : انا بجد مش عارفة اقولك ايه
اسلام : متقوليش حاجة ده حقك و كان لازم الكل يعرف ان مش انتي
ندي : بس انت عرفت ازاي ان مش انا اللي عملت كدا
اسلام : لأني أعرفك بقالي فترة و عمري ما شكيت انك بالأخلاق دي و لاني عارف مرام ممكن تعمل اي حاجة عشان تكرهني فيكي
ندي :تكرهك فيا ليه؟
اسلام : احم اقعدي مكانك طيب عشان اكمل الحصة
_____________________________________
تاني يوم
في شقة عمرو
دخلت نور و معاها جوري الشقة
نور بصوت ضعيف : جوجو خليكي هنا عشان هو شكله نايم .. هصحيه و نعمله مفاجأة
جوري :اوكيه
دخلت "نور" غرفة "عمرو" كان نايم ، نطت علي السرير بطريقة طفولية ايقظت عمرو من النوم
نور مسكته من خدوده: اصحي بقى كل ده نوم
عمرو مخضوض و هو بيتمطع: يخرب عقلك اتخضيت والله
نور :يلا بقي قوم كفاية كسل يلا
عمرو : ممكن متصحينيش كدا تاني و خففي الجنان ده بقى
نور ضحكت: حاضر يا حبيبي .. يلا بقي قوم و البس التيشرت ده
بتساعده يلبس التيشرت
نور : احم عاملالك مفاجأة حلوة اوي
عمرو : ايه هي
نور : ضيف حلو اوي مستنيك في الصالون برة
عمرو باستغراب: مين الضيف ده .. ايه ده و بعدين ازاي يعني هو حد عارف انك بتجيلي
نور : بس بس اهدي كدا مفيش حاجة ده ضيف وحشته و جاي يشوفك
عمرو بجدية: مين قولت ؟!
نور : قوم وانت تعرف
عمرو بضيق : طيب اما نشوف آخرتها
نور :بحبك كدا وانت بتسمع الكلام
خرجوا من الأوضة و كانت جوري مستنياه علي الكرسي اللي جنب المطبخ ، اول ما شافته جريت عليه و حضنته
عمرو : جوجو وحشتيني اوي
جوري : وانت كمان
نور : قولت بما انك مشغول و مش عارف تشوفها اجيبهالك
عمرو : يخرب عقلك عملتيها ازاي دي
جوري :لا انا بعرف أفكر
نور : وانا كمان
عمرو : اشك بصراحة بس بجد عملتوها ازاي
نور : ابدا جوري قالت للسواق ان هي هتاخد الدرس عندي في البيت و هو وافق و قال بعد ساعة هيعدي ياخدها
عمرو : طب و افرضي قال لسمر
جوري : خليه يقول كدا وانا ممكن ارسمه و اخليه طول يوم معايا بيترسم مكان منحوس
_____________________________________
بعد ما نور نزلت جوري للسواق .. طلعت ل عمرو شقته
و كانوا واقفين في الصالة و الشباك كان مفتوح
عمرو :اليوم كلو ضاع مع جوري
نور : يعني انا غلطانة اني جبتهالك
عمرو : بكرة الحد صح ؟
نور : اه
عمرو :اخيرا هيبقي البنك فاتح بقي تيجي معايا ؟
نور : صحيح ايه حكاية المفتاح ده
عمرو:هتعرفي بكرة
نور : ماشي
في اللحظة دي كانت " مي " اخت نسرين الصغيرة بتلعب في البلكونة
نسرين : مي ادخلي بقي كفاية صداع
مي : بصي نور اهي
نسرين : فين
مي : اهي عند عمو ده
نسرين وقفت مكان مي و شافت نور و هي عند عمرو
نسرين : طب ادخلي انتي يا مي العبي جوة
نسرين في سرها:و عاملالي فيها محترمة وانتي بتروحيله شقته .. ماشي يا نور حسابك معايا تقل اوي
_____________________________________
اسلام هيلاحظ ان رغد بتقف مع مرام كتير و هيراجع كلام و تصرفات رغد و هيشك فيها و هي راجعة من عند مرام هينادي عليها
اسلام :رغد ..
رغد : ايوة يا مسيو
اسلام : تعالي عايزك
رغد بقلق : ايوة
دخلت رغد الفصل اللي جنب فصلهم و مفيش حد فيه لان كان عندهم حصة موسيقي في غرفة الموسيقي
اسلام : يعني اللي سمعته صح !
رغد : هو ايه ده اللي صح ؟
اسلام : ان انتي اللي حطيتي الموبايل فيه شنطة ندي
رغد بتوتر: انا ! لا مش انا هحطه ليه
اسلام : فيه بنت شافتك وانتي بتحطي الموبايل في شنطة ندي و صورتك لكن كانت خايفة تعرفيها و قالتلي
رغد : لالا مش انا والله دي مس مرام اللي طلبت مني كدا
اسلام : مش كان من شوية مش انا
رغد : يا مسيو هي اللي طلبت مني انا خوفت اقول لا تنقصني في أعمال السنة
اسلام :يبقي تيجي معايا دلوقتي و قدام الكل تعتذري ان انتي اللي عملتي كدا و كان بسبب مرام
رغد : لا مش هينفع
اسلام بابتسامة : تمام براحتك
_____________________________________
فاطمة :ما تسيبك من اللاب ده بقي و ركز معايا انا زهقت
عدي بيقفل اللاب : طيب بريك 5 دقايق
فاطمة: لا بريك ساعتين .. اه صحيح سمعت اخر نكتة
عدي :لا قولي
فاطمة : مرة واحد خس حطوه علي السلطة ..
عدي مضحكش
فاطمة: امممم طب اسمع دي بيقولك مرة بنطلون شرب خمرة قال انا Skirt ..و مرة شامبو اتجوز بلسم خلفوا pantene و ولد
عدي : مضحكونيش علي فكرة
فاطمة بغيظ: طب اسمع دي .. مرة حلة شاطت جابت جول
فاطمة ضحكت اوي : طب والله بتضحك
عدي : هاهاهاها اضحك ولا فيه اختيارات
فاطمة :طب والله بيضحكوا و حلوين انت بس اللي دمك تقيل
عدي : طيب ياختي هزري براحتك
فاطمة : أيوة مانا ههزر و اضحك و بعدين مش احسن ما ابقي معقدة وشي دايما و راسمة حواجبي 111
عدي غير ملامحه للغضب : كدا يعني
فاطمة لمست وشه و رسمت بأيدينا ابتسامة لملامحه
فاطمة :بس كدا احلي جدا
في اللحظة دي دخلت ممرضة بتنادي علي فاطمة
.....:فاطمة .. فاطمة
عدي ارتبك : احم هو ده وقتها
فاطمة ضحكت : استني اما اشوفها
_____________________________________
في حصة مرام .. اسلام استدعي كل المدرسين و المدير اللي كانوا واقفين وشافوا موقف ندي
اسلام : دلوقتي حضرتكم اتاكدتوا ان ندي معملتش كدا لما حلفت لكن دلوقتي هاكدلكم ان مش هي فعلا و السؤال ازاي موبايل مس مرام اتحط في شنطتها
فتح موبايله و سمعهم تسجيل حواره مع رغد
مرام : دي كدابة محدش يصدقها انا مستحيل اعمل كدا اكيد هي اللي سرقت الموبايل و حطته في شنطة ندي عشان محدش يعرف ان هي
رغد: لا يا مس حضرتك اللي طلبتي مني كدا
ندي بصت ل رغد باستحقار : انا بجد مش قادرة أصدق انك صاحبتي يا رغد يا خسارة بجد
المدير :خلاص كلو يروح علي فصله وانتي يا مس مرام تعالي علي مكتبي .. و احنا اسفين يا ندي عشان شكينا فيكي
_____________________________________
تاني يوم
دخل عمرو مع نور البنك
عمرو : عايز افتح الحساب السري اللي باسمي و معايا المفتاح بتاع الخزنة
الموظف : لحظة واحدة ...
خلص عمرو الإجراءات و دخل غرفة الحسابات السرية و معاه نور فتح الخزنة بتاعته بالمفتاح
و اتصدمت لما شافت الفلوس كانت مبالغ كتيرة جدا و بالدولار
نور : هما دول بتوعك
عمرو :افتحي الشنطة اللي جبناها و دخليهم فيها
فتحت الشنطة و دخلوا كل الفلوس و حول جزء من الفلوس من الدولار للمصري و الباقي وضعه في حسابه
خلص الإجراءات الباقية و خرج من البنك
نور : لا فهمني ايه حوار الفلوس دي هي بتاعتك ؟
عمرو : طيب تعالي بس الأول نروح اي مكان
نور : ماشي ولا اقولك تعالي نتمشي احسن
عمرو : تمام نتمشي ..
خرجوا من البنك و بيتمشوا في شارع
بصي يا ستي الحكاية ان دي فلوس كنت شايلهم في حساب سري و محدش عارف عنه حاجة
نور قاطعته : بس ازاي مش انت كنت واثق فيها
عمرو : أيوة كنت واثق فيها طبعا بس سمر كانت بتكره اني ادي أي فلوس لبهاء او اي حد يتيم ف قررت اعمل جزء من فلوسي ل بهاء و سيبت جواب مع جدة بهاء ان لو جرالي اي حاجة بهاء يقراه و يعرف مكان المفتاح و هو اللي يفتح الحساب و لان الفلوس دي من فترة و طبعا الدولار وصل 17 جنيه دلوقتي ف الفلوس زادت أضعاف لان كنت حاططهم و الدولار ب 7
نور : سبحان الله .. بجد اللي بيعمل خير بيلقاه والله
عمرو :بس ف انا بقي هرجع حقي و بعدها هرجعهم تاني في الحساب ل بهاء و هسيب المفتاح معاكي
نور : معقولة هتثق فيا؟
عمرو : انا مقدرش اثق في اي حد غيرك اصلا انتي بقيتي حاجة كبيرة اوي عندي
نور :طب بما ان معاك فلوس دلوقتي ينفع استغلك
عمرو ضحك: ينفع يا باشا
نور : ينفع بقي يا روح الباشا توديني سينما فيلم يكون حلو كدا
عمرو : امممم لازم يعني ؟
نور : أيوة
عمرو :خلاص بالليل هحجز و نروح
نور : أيوة بقي
_____________________________________
في شقة نسرين
نسرين :عايزة اقولك علي حاجة يا لولو
علي : ايه
نسرين : نور
علي : مالها
نسرين :شوفتها من البلكونة مع عمرو جارهم في شقته
علي بصدمة: نعم و كانت ازاي معاه
نسرين :كانوا قريبين من بعض كدا و واقفين حتي لو مش مصدقني حاول تراقبها في مرة
علي : انا فعلا شوفتها معاه كتير في الشارع لكن متوقعتش خالص توصل لدرجة أنها تروحله البيت
نسرين : خلاص قول ل عدي اخوها بلاش اسلام ده انت عارفه ممكن يتخانق معاك و هيقولك انا واثق فيها و غير كدا مش هيضربها لأنه متفاهم شوية مش زي عدي
علي : بس عدي مسافر الأيام دي عند قرايبه
نسرين :يا حبيبي لما يرجع
علي :انا مش قادر أصدق .. نور !
_____________________________________
في غرفة نور
كانت ندي قاعدة معاها
ندي : عشان خاطري يا نونا بقي هو مش هيعرف صدقيني هستخبي تحت السرير
نور : طيب بس اوعي تطلعي ها
ندي : متقلقيش مش هعمل اي صوت
نور :هو لسة برة اول ما يجي هنفذ الخطة
ندي : تفتكري هيقول انه بيحبني
نور :مش عارفة بس يارب يقول
بعد دقايق كان اسلام دخل الشقة
نور : إسلام جه .. يلا انزلي تحت السرير انتي و انا هطلع اجيبه
ندي : لالا بلاش تحت السرير .. بصي ممكن في البوكس اللي هناك ده
نور : طب استني اشيل الحاجات اللي فيه
كان بوكس كبير بغطاء بيتخزن فيه الهدوم او الأشياء التانية .. خرجت نور منه الحاجات بتاعتها و دخلت ندي فيه و حطت الغطاء بتاعه عليه و خرجت من الأوضة
نور : إسلام .. تعالي عايزاك
اسلام : مش وقته عايز اكل و انام
نور : ماما لسة مجتش اصلا و الاكل لسة بيستوي
اسلام : طيب عايزاني ليه
نور شدته من ايديه و دخلته الأوضة و قعدت جنبه علي السرير
نور :عايزة اتكلم معاك يا حبيبي شوية
اسلام : يا نور بقي انجزي
نور : بس تجاوبني بصراحة
اسلام : طيب
نور : انت و ندي بتحبوا بعض ؟
اسلام رفع حاجبه : ها .. حب ايه .. ايه اللي بتقوليه ده
نور : أيوة بس انت شكلك بتحبها مش شايف شكلك اول ما قولت وشك طلع منه قلوب و قلبك دق .. توك تك تك
اسلام : توك تك علي راسك .. قلوب ايه دي اللي طلعت مني
نور : يا لوما محدش هيعرف قول بقي مفيش غير انا وانت بس و بعدين هتخبي علي نور
اسلام سند رأسه علي السرير : مفيش حاجة قولتلك
نور : عشان خاطري يا ايسو قولي بقي
اسلام : يوووه انا طالع
نور مسكته من قميصه: ماليش دعوة لازم اعرف و بعدين محدش معانا يعني اعتبر بتكلم نفسك
اسلام قعد و اتنهد:بصي مش عارف بس بكون مبسوط اوي وانا معاها بحب لماضتها و ضحكتها .. فيه حاجة فيها بتشدني معرفش نهايتها ايه .. بصي من الاخر انا اه بحبها
ندي شالت الغطا بتاع البوكس و نطت منه و صرخت بسعادة
ندي : كنت حاسة والله كنت حاسة ان انت بتحبني زي ما انا بحبك
اسلام بيستوعب اللي قدامه : هو ده بجد و لا انا بحلم
نور غمضت عينيها و حطت ايديها علي راسها :الله يخربيت سنينك بوظتي كل حاجة
اسلام بنرفزة : يعني انتي كنتي متفقة معاها يا نور .. كنتي بتعملي فيا مقلب
نور جريت و استخبت ورا ندي: والله ندوش هي اللي قالتلي اعمل كدا ماليش دعوة
ندي :سيبك من نور اخيرا قولتها بقى
اسلام : انتي في ايه ولا في ايه انتي كمان ..
و وجه كلامه ل نور : خدي يا بت هنا
نور خرجت من الأوضة و قفلت الباب وراها و ندي شدت اسلام
ندي :استني .. انا مصدقت سمعتها قولها تاني
اسلام : ندي اسكتي بقى انا متضايق
ندي : ماليش دعوة عايزة اسمعها تاني
اسلام : ندي مش وقته
ندي : لا ماليش دعوة انا عايزة اسمعها
اسلام :انتي يا بت مبتتقليش ليه؟ علي طول كدا مدلوقة اتقلي شوية مش كدا
ندي : و اتقل ليه مش بحبك وانت بتحبني يبقى ليه نتقل ما نقول كل اللي جوانا
اسلام : ايه ده ماما جت انا هطلع لاحسن تشك اننا لوحدنا يعني تقول حاجة
_____________________________________
عدي : هو المستشفي مالها متجمعين هناك كدا ليه
فاطمة بسعادة : اصل ظافر هنا
عدي : ظافر مين ؟
فاطمة: ظافر العابدين
عدي باستغراب: معقولة و بيعمل ايه هنا
فاطمة : جاي يصور تقريبا مسلسل هنا
عدي : امممم وانتي فرحانة كدا ليه
فاطمة : ايه ده الناس خفت شوية انا هروح بقي عشان الحق اتصور معاه
عدي مسك ايديها : استني تتصوري مع مين
فاطمة : مع مين ايه ده ظافر
عدي : أيوة مالو يعني شخص عادي زي اي حد
فاطمة : حرام عليك ده عادي يلهوي يخربيت جماله
عدي : ما تتلمي بقي انتي واقفة مع كيس جوافة
فاطمة : ماليش دعوة كلهم اتصوروا معاه انا لازم أتصور معاه
عدي : طيب خلاص تعالي هنتصور معاه
قربوا منه و عدي سلم عليه و فاطمة كانت لسة هتسلم عليه مسك ايديها عدي
فاطمة : ممكن اتصور معاك
ظافر : اه طبعا اتفضلي
عدي : وانا كمان .. يا محمد تعالي صورنا
فاطمة : صورنا كويس بقي ها
محمد التقط الصورة
فاطمة : واحدة بالطول بقي كمان
عدي: مش اتصورنا خلاص عشان منعطلهوش
ظافر : واحدة بالطول يا محمد
فاطمة طلعتله لسانها: خلاص هو موافق
_____________________________________
في المساء _ في السينما
نور :عارف وانا معاك بحس اني مش عايزة اي حاجة تاني من الدنيا
عمرو مسك ايديها و باسها: وانا بقي بحس بكدة علي طول
نور :بحبك
عمرو : ركزي في الفيلم بقي
نور بصوت عالي نسبيا : صحيح هتعمل ايه في الفلوس
عمرو : هششش وطي صوتك مش لازم السينما كلها يعرفوا انا هعمل ايه
نور مسكت الفشار خبطته بنرفزة طار علي كل الناس اللي قدامها و اللي وراها : مانا لازم اعرف انت ناوي علي ايه
عمرو : الله يخربيتك وقعتي الفشار علي الناس
شاب من اللي موجودين : جرا ايه يا عم انت و هي .. يعني بتحبوا في بعض و سكتنا و دلوقتي بترغوا و الهانم توقع علينا الفشار
نور : ممكن تاكلوا ده طعمه حلو والله بالجبنة
الشاب : و كمان بتهزري
نور : خلاص يا عم بقي ركز قدامك
بعد دقايق
نور بصوت منخفض: يعني انت ناوي تعمل ايه
عمرو : عايز اخد حقي الأول
نور :يا حبيبي سيبك منهم انت بالفلوس اللي معاك دي تقدر تفتح مصنع جديد او شركة و هتنجح اكتر من شركة سمر دي
عمرو :يا سلام ببساطة كدا انا مش هسكت
نور : يوووه بقي انا مش فاهمة انت عايز ايه
_____________________________________
خارج السينما
نور : عارف يا حبيبي بجد نفسي اوي اركب موتوسيكل
عمرو : اعتبري طلبك اتنفذ
نور : بجد هتركبني موتوسيكل
عمرو : أي حاجة انتي عايزاها
نور : طيب مش ناوي بقي تحط نقطة لكل اللي فات ده و تبدأ سطر جديد في حياتك
عمرو : ماهو الحبر نشف يا حبيبتي
نور : خلاص نشتري قلم جديد و نحط نقطة لكل الحزن و الوجع اللي حصلك عشان تبدأ بسطر جديد من الفرح بقي و التفاؤل
عمرو : اهي ضحكتك دي هي اكتر حاجة بتفائل بيها
نور ضحكت : أيوة ثبتني ثبتني
عمرو : اثبتك ايه بس هو انتي مسمار
نور : ايه يا بيبي الخفة دي بتكلم بجد بقي
عمرو : ايه
نور :يلا اشتري القلم الجديد
عمرو : ايدك علي 2 جنيه
نور بجدية: بطل هزار بقي .. عشان تبدأ بسطر جديد فيه نجاح و إبداع و تبعد عن السلبيات دي
عمرو : مش قبل ما انهي و ادمر اللي كان السبب في وجعي
نور :و هتدمرهم ازاي
عمرو : لسة بفكر في حاجة كدا لو اللي في دماغي صح هكون قدرت اخد حقي منهم
_____________________________________
مر كام يوم
عدي أتعلم و درس كورسات جديدة و اشتغل علي برامج هكر اقوي تساعده في شغله و قدر يشتغل علي نفسه و يطور من نفسه طول فترة إقامته في المستشفي
فاطمة :مش يلا بقي عشان تاكل وقف شغل شوية
عدي: ماليش نفس
فاطمة: بس انت كدا هتموت من الجوع كل بقي و سيب اللاب ده شوية ولا اكلك؟
عدي : ااه اكليني
فاطمة ضحكت: ده انت بتتلكك
عدي : لا بجد اكليني
فاطمة مسكت ساندويتش الجبنة الكيري و قربته من شفايفه مرة واحدة و اكلته
عدي : تصدقي بقيت جعان
فاطمة :يلا بقي خد عيش كمان
عدي بيضحك و هو بياكل قطمة من الساندويش باس ايديها بتلقائية و اتوترت و حست ان قلبها بيدق جامد
فاطمة : اشرب العصير بقي
_____________________________________
دخلت شاهيناز غرفة نور
شاهيناز : نور .. يا نور اصحي بقي عشان منتأخرش علي عدي
نور : يا ماما حاضر قايمة
شاهيناز : يلا عشان تصحي اسلام ... محدش بيعرف يصحيه غيرك ؛ انا و باباكي جهزنا خلاص
_____________________________________
فاطمة بحزن : يعني خلاص هتخرج
عدي بيضحك : يا بنتي ما انا بقيت كويس ولا انتي عايزاني افضل مقيم هنا في المستشفي
فاطمة : اه ياريت
عدي : هنتقابل تاني كتير طبعا متقلقيش
فاطمة : هتوحشني جدا
عدي : وانتي كمان
_________________________________
في المستشفي
مكتب دكتور عمار
عمار : الفترة الجاية انا عايزكم تكونوا قريبين من عدي جدا و لازم يرجع يندمج تاني مع اللي حواليه و صحابه
شاهيناز : متقلقش يا دكتور
عمار : عدي بقي كويسة بنسبة كبيرة جدا لكن ضروري بلاش حد يعصبه عشان ميتعرض لانتكاسة و ميجيش هنا تاني
حسان : بإذن الله هيرجع احسن من الأول
عمار : انا قولتله و جهز شنطته و زمانه جاي دلوقتي
بعد لحظات الباب بيخبط
عمار : ادخل
دخل عدي و هو بيبص ل شاهيناز و حسان بندم و اسف .. كأنه بيندم علي كل لحظة زعلهم فيها .. و فيه عينيه نظرات اشتياق بيدخل ببطيء و ساب شنطته جنبه ، شاهيناز دموعها بتنزل بالبطيء .. قربت منه مرة واحدة و بصلها لحظات و حضنته من غير ما تتكلم
عدي : وحشتيني اوي
شاهيناز : وانت كمان وحشتني اوي يا حبيبي
عدي بيمسح دموعها :انتي لسة زعلانة مني ؟
شاهيناز بابتسامة : ايه اللي بتقوله ده يا حبيبي انا عمري ما ازعل منك هو فيه ام برضو تزعل من ابنها
عدي : انا اسف عشان كنت بزعلك .. بس خلاص انا بقيت كويس و اتعالجت و مش هكسر أطباق ولا حاجة و مش هزعقلك تاني انتي و بابا
قرب منهم حسان و حضنه : احنا عارفين يا حبيبي الحمد لله انك اتعالجت و بقيت كويس
عدي : وحشتني اوي يا بابا
حسان : وانت كمان يا حبيبي .. احنا مش عايزين نتكلم في اللي عدا ده خالص اللي فات ده مات انا عايز اشوف ضحكتك دي علي طول
اسلام قرب منهم هو و نور اللي كانت ماسكة بوكيه شوكلاتات أحجام كبيرة
اسلام و هو بيحضنه: وحشتني يا شقيق
عدي : وانت كمان يا لوما وحشتني اوي .. نوور
نور : وسع كدا يا عم اسلام الواد ده وحشني جدا
عدي : وحشتيني يا بنت الايه .. لو تعرفي كنتي وحشاني قد ايه بجد
نور :وانت كمان يا حبيبي والله البيت كان وحش من غيرك .. خد بقي بوكيه الشوكليت ده بس لعلمك انا دافعة فيه 100 جنيه يعني بالنص ها
عدي بيضحك :انتي لسة زي ما انتي
_____________________________________
تاني يوم
في السينما
ندي : ايه رأيك في الفيلم ! عجبك؟
اسلام : يعني حلو
ندي: علي فكرة ده تحفة جدا
اسلام : هو انتي بتحبي الافلام الرومانسي الأوفر دي
ندي : اه مالها يعني
اسلام : مالهاش بس رومانسي اوفر اوي
ندي :عادي بحبها بس يعني في المستقبل لو جوزي طلب مني مشوفهاش تاني مش هشوفها
اسلام : ايه ده انتي هتسمعي الكلام ؟
ندي : اه انا .. من الغباء اصلا ان واحد يكون معاه بنت حلوة و زي القمر كدا زيي و يقولها علي حاجة و هي متسمعش كلامه و لا تسعده
اسلام :ثانية واحدة معلش .. انتي مين قالك انك حلوة اساسا
ندي خبطته في كتفه : بطل رخامة بقي
اسلام ضحك :حاضر
ندي : بس تفتكر هو هيكون بيحبني
اسلام : مش عارف
ندي بحزن: طيب انا اسفة يعني .. لو كنت بضايقك بكلامي و بتصرفاتي بس ولله ... اسلام احنا ممكن نكون صحاب و خلاص وانا اسفة يعني عشان كل شوية بضايقك
اسلام قاطعها و حط ايديه علي بوقها : اسكتي شوية ... هو انتي مش اخدة بالك يعني
ندي : من ايه
اسلام :مش اخدة بالك ان انا بحبك و قولتها قبل كدا لنور
ندي صرخت بفرحة: وانا بعشقك والله
معظم الناس ركزت معاهم و كان ولد بيبص عليهم ووقف تنح قدامهم
اسلام :يخربيت سنينك و جنانك الناس كلها بتبص علينا
ندي : ايه يعني
اسلام لاحظ ان الشاب لسة واقف جنبهم و متنح و مركز معاهم
اسلام :بص قدامك يا حبيبي .. في حاجة يا بابا هي هبت معاك ولا ايه
ضربه علي قفاه و مشي
ندي ضحكت : ايه اللي عملته في الواد ده
اسلام :ينفع كدا المفروض حضرتك تفكري في تصرفاتك و كلامك قبل ما يطلع بدل ما تبوظي الدنيا كدا
ندي : مبعرفش افكر
اسلام :علميا اصلا لازم تفكري عشان
ندي قاطعته :احنا مش في حصة كيميا
اسلام : تيجي نجيب فشار
ندي : أيوة ياريت
_____________________________________
في المقطم
كان عدي و فاطمة قاعدين علي الارض و بيتكلموا
عدي :فاطمة .. انتي ليه مهتمة بيا كدا ؟
فاطمة بتوتر:عشان يعني ... عشان احنا اتفقنا نكون صحاب و ..
و هي بتتكلم عدي مسك ايديها و فاطمة تنحت لحظات
فاطمة : ايه ده ؟
عدي :مش عارف .. انا اسف
و سحب ايديه
فاطمة : عدي هو ليه بحس انك خايف مني او خايف تقرب مني
عدي : لأني خايف .. انا عامل زي الماية اللي دخلت الفريزر و اتجمدت و بقت تلجة و دلوقتي بقيت خايف اخرج من الفريز مع اني لو خرجت هرجع زي الأول بس خايف حابب اقفل علي نفسي ..
فاطمة : بس الشمس مش هتضرك بالعكس الشمس هترجعك ماية عادية زي الأول
عدي :انا خايف احبك
فاطمة اندهشت و قامت وقفت تتمشي بعيد :مش شايف انك اتسرعت في الخطوة دي
عدي وقف : مش مهم اكون اتسرعت او لا المهم ان انا مش عارف قولت كدا ازاي
فاطمة : طب خايف ليه
عدي : خايف الحب يموت
فاطمة :و ايه اللي يخليه يموت
عدي : القدر أو الأشخاص أو
فاطمة قاطعته : انا مقتنعة ان الحب بين اي اتنين مبينتهيش طالما الطرفين متمسكين ببعض و عايزين بعض ولا القدر يقدر يقف في طريقهم ولا الاشخاص طالما هما عايزين بعض
عدي : بس ممكن المشاكل تموته او تضعفه
فاطمة : ممكن جدا بس وقتها هيكون طرف منهم بطل يحب التاني
عدي :طب وانتي رأيك ايه ؟ خايفة تحبيني
فاطمة بكسوف :مش يلا نروح بقي
عدي ضحك :بابا رفع الشبشب ولا ايه
فاطمة ضحكت : لا بابا بيثق فيا جدا و مبيرفعش شباشب
___________________________________
في كافيه
علي : عدي حمدلله علي السلامة أخيرا رجعت من السفر
عدي: الله يسلمك يا علوش
علي : بص يا اسطى انت أخويا قبل ما تكون صاحبي برضو و عشان كدا لازم أعرفك كل حاجة
عدي: قول يا علي في ايه
علي : اختك نور .. بتروح شقة اللي اسمه عمرو جاركم
عدي مسكه من قميصه بعنف لدرجة ان علي كان هيتخنق
عدي : انت بتقول ايه يا ابن الكلب انت ازاي تتكلم كدا عن اختي
علي بيكح: ابعد ايدك بقي انا لولا اني مقدر اللي انت فيه دلوقتي كنت ضربتك عموما لو مش مصدقني يعني هتلاقي معاها مفتاح شقته في حاجتها لان انا شوفتها كذا مرة او حتي راقبها هتلاقيها بتروحله
عدي : بس اقسم بالله يا علي لو كلامك طلع غلط ما هسيبك
علي : مش دي المشكلة يا عدي المشكلة ان الواد ده محدش عارفله اصل من فصل من ساعة ما جه و محدش عارف هو مين ولا اهله فين ده غير أنه كان بيشتغل ميكانيكي مع الاسطي مشمش
_____________________________________
في فيلا سمر
نور : متنسيش تحفظي الكلمات دي يا جوجو
جوري : حاضر
و هي خارجة كان حسام و سمر داخلين الفيلا و سمر سلمت عليها و حسام تنح لحظات بيستوعب
نور: طيب انا همشي بقي عشان اتأخرت
سمر :ماشي يا حبيبتي
خرجت نور و جوري طلعت اوضتها
سمر :مالك بتبصلها كدا ليه ؟
حسام :هي مين دي ؟ وتعرفيها منين اصلا
سمر :دي نور مدرسة الفرينش لجوري
حسام :ازاي دي هي البنت اللي مرتبطة ب عمرو
سمر بصدمة : نعم ! ازاي
حسام ضحك: يابن الايه يا عمور .. يعني هو جابها هنا
سمر :و هيستفاد ايه
حسام : مش عارف دلوقتي هي اشتغلت ازاي اصلا هنا
سمر : جوري فضلت تزن عليا اجيبها و أنها مدرسة شاطرة عندها في المدرسة
حسام : لو هي مدرسة قديمة او جديدة نتأكد بس لو طلع عمرو هو اللي مسلطها تيجي هنا
سمر : هنعمل ايه
حسام : هقولك تعملي ايه بس نتأكد الاول
_____________________________________
روح البيت و دماغه هتتشل من التفكير هو واثق فيها و كان بيدعي ان كلام علي يكون غلط .. دخل اوضة نور و هو هيتجنن من اللي سمعه بيدور في كل حاجتها وقع في ايديه مفتاح شقة .. اخده و كان معاه صلصال طبع رسمة المفتاح عليه و رجعه مكانه و رجع كل حاجة مكانها و قرر يعمل نسخة من المفتاح و يتأكد و يراقبها تاني يوم لان لو واجهها هتنكر
_____________________________________
تاني يوم
في فصل 2 إعدادي
مدرسة إللي بتشتغل فيها نور
نور : حد يقولي تصريف verb Etre
دخل عمرو الفصل و معاه علبة هدية مربعة و الكل كان مركز معاه و معجبين بيه
نور : طيب ثواني و راجعة
خرجت نور من الفصل و هي متغاظة منه
نور بضيق : علي فكرة كان باين اوي عليك وانت بتبص علي البنات و شكلك كان وحش
عمرو : ولله كنت ببصلك انتي
نور بنرفزة: كدا هتخلي شكلي وحش قدامهم
عمرو بغيظ: طب ايه اللي يرضي حضرتك و اعمله و بعدين انا ابص عليهم ليه ده انا عينيا مش شايفة غيرك حتي
نور : أيوة ثبتني ثبتني
عمرو : طيب وحشتيني
نور : ايه البوكس ده
عمرو :هدية
نور : ايوة فيها ايه
عمرو : لما تفتحيها هتعرفي
نور : طيب هكمل الحصة و هخرج استناني انت في الكافتيريا
عمرو :حاضر
نور :استني هنا مش العلبة دي بتاعتي برضو
عمرو : اقسم بالله ليكي اومال يعني لامي
نور : امك ماتت علي فكرة من زمان
عمرو بغيظ : انتي يا بنتي علي طول كدا
نور ضحكت : لا انهاردة عاملة اوكازيون
عمرو : هستناكي برة بقي متتأخريش
نور : اوعي تبص علي حد ها
عمرو : يا باشا انا مش هبص علي حد والله
نور :يارب انت عارف ان انا بغير عليه .. خليه في عين اي بنت غيري ضفدع
عمرو : حرام عليكي ملقتيش غير الضفدع
نور : اه عشان اتقلب انا كمان ضفدعة ونحب بعض زي الكارتون كداا
عمرو : صبرني يا رب
نور : عمور خد الهدية خليها معاك افتحها عندك عشان مش هعرف اروح البيت بيها
_____________________________________
نور دخلت مع عمرو شقته
نور : يلا نفتح الهدية هموت و اعرف فيها ايه !
عمرو : لالا خمني الأول
نور :اممممم فيها هدية
عمرو ضحك و صفقلها: شابوه لا بجد شابوه ليكي يا حبيبتي
نور :بطل تريقة طيب و ساعدني
عمرو :حاجة كان نفسك فيها
نور :موتوسيكل
عمرو بصلها لحظات :هو انا فعلا كنت هجيب موتوسيكل بس البوكس مجاش علي قده
نور ضحكت : تصدق فعلا
عمرو :يلا غيره بقي
نور : امممم مش عارفة
عمرو :طب غمضي عينيكي
نور غمضت عينيها : اهو
عمرو : اوعي تفتحي
نور : حاضر
طلع فستان لونه بنفسجي من البوكس و وقف وراء ظهرها و مسك الفستان قدام عينيها
عمرو : فتحي .. هو الفستان ده مكنش عاجبك خالص
نور بسعادة : الله ميرسي اوي يا عمرو ..
عمرو : ها ايه رأيك
نور : بجد وحش اوي
عمرو : نعم
نور ضحكت : بهزر والله بجد حلو اوي يعني
عمرو باسها من خدها : حلو يعني
نور : اوي
الجرس رن في اللحظة دي
نور :انت مستني حد ؟
عمرو : لا هشوف مين ..
بص من العين السحرية كان عدي
عمرو بدهشة : ايه ده ده عدي اخوكي
نور :يلهوي طب عايز ايه هو متعود يجيلك هنا
عمرو : لا دي اول مرة يجيلي
نور : طيب اعمل ايه انا خايفة
عمرو: ادخلي جوة الأوضة انتي ..هو اكيد هيسألني علي حاجة او فيه حاجة مثلا عادية بس ادخلي الأوضة
دخلت نور الأوضة و عمرو فتح الباب
عدي دخل علي طول :ازيك يا عمرو .. مش تقولي اتفضل
عمرو :ها اه طبعا اتفضل يا عدي
عدي :اومال انت قاعد لوحدك يا عمرو
عمرو : اكيد قاعد لوحدي يعني يا عدي اومال مين هيقعد معايا
عدي : اومال ايه ده يا معلم
عمرو : ايه ؟
عدي : طبقين و معلقتين بتاكل في طبقين لوحدك ؟
عمرو : ااه انا كدا يا عدي بحب اكل في طبقين
عدي :اه معلش يا معلم مكنتش اعرف
عمرو : تؤمرني بحاجة يا عدي
عدي : لا يا حبيبي كنت عايز اطمن عليك بس
عمرو : تنور في اي وقت
عدي : طيب انا همشي
كان داخل أوضة النوم عمرو شده
عمرو : ايه يا عدي الباب من هنا يابني
عدي : اه معلش مأخدتش بالي
خرج عدي من الشقة
عمرو :اطلعي خرج
نور قلبها بيدق و خايفة : عدي شاكك ان انا هنا
عمرو :مش عارف بس هو زي ما يكون حاسس بحاجة
نور :طب اعمل ايه و عرف ازاي اصلا
فجأة الباب اتفتح بالمفتاح اللي كان مع عدي
عدي : انا هقولكم عرفت ازاي .. بالمفتاح اللي معايا ده يا حبيبتي
نور اترعبت: عدي ..
عدي شدها من شعرها بعنف: قدامي
عمرو : بالراحة عليها يا عدي نتفاهم مش كدا
عدي زقه علي الحيطة :ملكش دعوة وانت بقي حسابك معايا بعدين بس لما اربيها الأول
عمرو :يا عدي قولتلك ملكش دعوة بيها متلمسهاش حقك خده مني انا مش منها
عدي شدها من ايديها و دخل شقته و عمرو دخل وراهم و نور فلتت منه و جريت علي مامتها
عدي: اطلع برة
عمرو : خلينا نتكلم بهدوء
عدي بعصبية : وانت خليت فيها هدوء
عمرو : متلمسهاش قولتلك
عدي : لا راجل يلا
و قفل الباب في وشه
_____________________________________
عمرو بيتصل باسلام
عمرو : أيوة يا اسلام .. انت فين ؟.. طيب تعالي بسرعة
_____________________________________
عدي : انتي يا بت خدي هنا
نور : والنبي يا ماما هيضربني
شاهيناز : في ايه فهمني
عدي :بنتك كانت بتروح للباشا اللي اسمه عمرو شقته و عرفت من علي يا ماما و دلوقتي لسة جايبها من عنده
شاهيناز بعتاب: بتروحيله شقته ؟ يعني كنتي بتكدبي عليا
عدي مسكها من شعرها و ضربها : انا بقي هربيكي من اول و جديد
بعد 10 دقايق كان اسلام لسة داخل الشقة و جري علي نور شدها من عدي و هو بيضربها بالقلم و مامته بتحاول تشدها منه مش عارفة لكن اسلام اخدها ووقفت وراءه و هي بتعيط و بتترعش و ماسكة في قميصه
اسلام : ملكش دعوة بيها .. ولا من حقك اصلا تمد ايدك عليها
عدي:وانت مال أهلك انت عارف هي عملت ايه
اسلام قعد جنبها و بيحاول يهديها: مهما عملت تضربها كدا ليه حرام عليك
عدي: بقولك ايه سيبها و غور من وشي الهانم اختك اللي بتدافع عنها دي يا باشا كانت بتروح لعمرو شقته و لسة جايبها من عنده و علي هو اللي قالي
اسلام بيزعقله : حتي لو عملت ايه اسمعها الأول اعرف هي عملت كدا ليه مش يمكن سوء تفاهم
عدي شدها من شعرها :و المفتاح ده كان بيعمل
اسلام شدها من ايديها و دخلها اوضته و قفل بالمفتاح وراه و عدي بيخبط عليه يفتحله
اسلام قرب منها و قعد جنبها و هي اترمت في حضنه و بتعيط
اسلام :بتخبي عليا يا نور كل ده مخبية عليا
نور : والله كنت هقولك
اسلام : انتي بتحبيه ؟
نور هزت رأسها : اه
اسلام : طب مش غلط انك تروحيله بيته
نور : والله العظيم ما عملت حاجة غلط عمرو محترم جدا و كنا بنتقابل عادي
اسلام : أيوة بس ده غلط وجودك معاه في مكان لوحدكم غلط .. كدبك علينا غلط من امتي وانتي بتخبي و بتكدبي يا نور
نور: انا اسفة بس والله وحياتك عندي ما عملت حاجة غلط
اسلام:مصدقك بس المبدأ نفسه غلط
نور :هو عدي هيضربني تاني
اسلام باسها من راسها : متخافيش منه طول مانا معاكى
نور بتنهيدة:انا خايفة منه ضربني جامد
اسلام : يا حبيبتي متخافيش هو ميقدرش يعملك حاجة وانا موجود و معاكي
_____________________________________
فضل اسلام قاعد جنبها و بيسمعها و هي جسمها بيترعش من الخوف لكن وجوده معاها مطمنها .. خرج من الأوضة لما راحت في النوم و باسها من رأسها و مسح علي شعرها ، كان عدي منتظره في الصالون
عدي بعصبية :بتدافعلي عنها انت مش راجل يلا ده بدل ما تمسكها من شعرها و تضربها
اسلام بهدوء:هي الرجولة بالنسبة ليك اني اضربها ..
عدي : انت عايز تجنني هي اللي عملته ده يستحق ايه غير الضرب
اسلام : أيوة و بعدين ؟ ! و لما تضربها كدا خلاص هي مش هتكرر غلطها هه تبقي غلطان الضرب بيخلي البنت تعند اكتر
عدي : و لما واحد زبالة زي علي يجي يقولك اختك في شقة جارك عايزني اعمل ايه اروح اطبطب عليها و اقولها برافو يا حبيبتي متعمليش كدا تاني
اسلام :لا نسمعها ده اولا .. و ثانيا انا لو واحد زي علي جه قالي كدا اقسم بالله ما اخليه يكمل الجملة و اكون معرفه يقول كدا ازاي
عدي: وانت فكرك يعني مستنيك تقول كدا .. بس انا اتأكدت
اسلام : طيب تمام اتاكدت يبقي تسمعها مش تجرها من شعرها و تضربها
عدي : عشان اللي عملته ميستحقش غير كدا .. وجود بنت مع راجل في شقة لوحدهم صح ولا غلط يا اسلام ؟ رد انت
اسلام :نور غلطت لما عملت كدا لكن هي لما كانت معاه معملتش اي حاجة غلط
عدي بسخرية : وانت بقي صدقتها مش يمكن
اسلام قاطعه بنبرة حادة:لا مش يمكن .. انا واثق فيها اكتر من اي حد .. نور لو كدبت عليكم كلكم عمرها ما تكدب عليا .. أيوة عارف أنها كدبت و مش صارحتني من الأول لكن دلوقتي حكتلي كل حاجة لأني وعدتها مش هعملها حاجة .. المبدأ نفسه غلط لكن هي معملتلش اي حاجة من الي جت في دماغكم
شاهيناز :بس بقي كفاية انت و هو .. ابوكم زمانه جاي انا هدخلها
اسلام : هي نامت دلوقتي يا ماما
شاهيناز : هدخل اشوفها
___________________________________
دخلت شاهيناز اوضة بنتها ، كانت نور صحيت من صوتهم و لما شافتها بصت الناحية التانية
شاهيناز قربت منها و قعدت قدامها علي السرير
شاهيناز: ايه خايفة تبصيلي ؟! ولا مكسوفة .. انا حقيقي مش عارفة اعاتبك ازاي
نور دموعها نزلت : انا آسفة
شاهيناز : كنتي بتكدبي عليا يا نور
نور : ماما انا كنت خايفة اقولك
شاهيناز : عشان ده غلط ماهو لو صح مكنتيش كدبتي
نور بصتلها : ولو كنت صارحتك كنتي
شاهيناز : مكنتش هضربك بس كنت هعرفك غلطك .. مفيش حد في الدنيا كلها ممكن يخاف عليكي قدي انا امك مش عدوتك يا نور
نور قربت منها و هي خايفة تحضنها من غير ما تتكلم أخدتها شاهيناز في حضنها و طبطت عليها
شاهيناز : لو كنتي جيتي صارحتيني علي الاقل لما عدي يجي يقول كدا كنت انا اللي هقفله و هقوله ملكش دعوة بيها انا عارفة و هي حكتلي و فهمتها غلطها على الاقل مكنش حد يقدر يمد ايديه عليكي .. ليه كدبتي عليا انا معودتكيش تكدبي.. انتي من يوم ما قولتيلي انه بقي يشتري اكل جاهز و رفض ياخد اكل منك وانا قولت هعزمه كل فترة و خلاص الحوار اتقفل مكنتش اعرف انك بتكدبي عليا
نور : انا مش هكدب عليكي تاني يا ماما
شاهيناز : بجد
نور :مهما حصل مش هكدب عليكي تاني حتى لو ايه
___________________________________
مر يومين و نور مبتروحش المدرسة و قاعدة في اوضتها بتعيط دخلت عندها والدتها
شاهيناز: نور كلمي مس تيسير قاعدة برة عايزة تطمن عليكي
نور باستغراب : معقولة اول مرة تجيلي
شاهيناز :طب اغسلي وشك و تعالي
نور:حاضر
بعد 5 دقايق كانت نور غسلت وشها و سرحت شعرها و خرجت لمديرة مدرستها (تيسير )
تيسير : ازيك يا نور عاملة ايه دلوقتي
نور: الحمدلله يا مس
تيسير: بصراحة انا جيت اتطمن عليكي و عشان طلب تاني برضو
شاهيناز :اتفضلي
تيسير : عندي ابن نور طبعا عارفاه ياسين بيشتغل محامي و عنده مكتب .. عنده 27 سنة و بصراحة هو اعجب بنور و عايز يجي يتقدملها بس قولت اخد رأيكم و رأي نور الأول
نور كانت لسة هترد عدي دخل في اللحظة دي و قاطع كلامها
عدي :خليه طبعا يشرفنا في اي وقت و نتعرف عليه
تيسير :وانتي ايه رأيك يا نور
نور سكتت
عدي : خليه يجي طبعا و ينورنا
___________________________________
نور اتصلت ب عمرو
نور : ياسين اتقدملي و عدي مصمم يوافق عليه
عمرو : ارفضيه
نور : وانت هتيجي امتي
عمرو :اصبري شوية و بعدين ما انتي شايفة اخوكي رافض اي كلام اصلا
نور : يعني عدي كلامه صح .. انت بتضحك عليا و مبتحبنيش
عمرو :يووه بقي انتي كل شوية بتقولي نفس الكلام ده خلاص عايزة تصدقيه صدقيه
نور دموعها نزلت : مانا شكلي هصدقه فعلا .. باي
_____________________________________
مر كام يوم و هي و عمرو مبيتكلموش
و في يوم الساعة 8 الصبح
كانت واقفة علي اول الشارع مستنية تاكسي
عمرو : بيتهيألي لو وقفتي هنا هيكون فيه تاكسي
نور بصتله : نعم عايز ايه تاني حضرتك
عمرو : هقولك عايز ايه بس مينفعش نتكلم هنا في الشارع تعالي معايا البيت
نور : لا انا خايفة
عمرو : متخافيش عدي مش هنا راح شغله و غير كدا مش هيحصل حاجة يعني انا عايز اقولك حاجة بس
نور بتردد : طيب انا هروح وانت تعالي ورايا
عمرو : ماشي
_____________________________________
في شقة عمرو
كانت قاعدة في الصالون و هو جنبها و هي مكشرة و بتبص الناحية التانية و بتتجنب نظراته
عمرو : انتي ضايع منك حاجة هنا بتدوري عليها
نور كتمت ضحكتها و كشرت تاني و لمس بايديه دقنها و رفع وشها ناحيته تبصله
عمرو : طب هحكيلك قصة كدا
نور : ايه هي
عمرو : كان فيه زمان واحد كان بيعدي الشارع و هو بيعدي عربية جت فجأة و فرملت علي اخر لحظة و ربنا كتبله انه يعيش مع انه كان ممكن يموت و حب واحدة زي القمر بس ياريته كان مات احسن ما يزعل القمر ده و يشوف التكشيرة دي
نور ضحكت نص ضحكة و رجعت غضبت تاني
عمرو : ايه ده هونت عليكي برضو طب يارب كانت العربية مفرملتش و
نور حطت ايديها علي شفايفه: هشششش بعد الشر عليك
مسك ايديها و باسها
عمرو : بقولك ايه مش هتلبسي الفستان ده بقي اللي كنت جايبه
نور : هلبسه فين بس
عمرو : انتي تاخدي اجازة انهاردة لان انا هخرجك
نور : فين ؟
عمرو: هتعرفي لما نروح
نور: طيب انا لازم اكلم ماما اقولها
عمرو باستغراب:نعم!؟ ده ازاي انتي بتهزري
نور : لا بس انا قولتلها انا مش هخبي عليكي حاجة بعد كدا حتي لو كانت غلط او هي مش هتوافق عليها
عمرو بابتسامة :تمام كلميها
نور اتصلت بشاهيناز
نور : أيوة يا ماما
شاهيناز : ايه يا حبيبتي في حاجة ؟
نور بتوتر: ماما انا .. انا .. بصي بصراحة كدا انتي قولتيلي مخبيش عنك حاجة و انا و عمرو اتقابلنا في الشارع و طلب مني يعني نخرج هن روح مطعم .. و صدقيني والله مش هتأخر
شاهيناز بدهشة: كلمك ازاي ؟و بعدين تعالي هنا مش قولتى انكم اتخانقتوا لما حكيتيله على موضوع ياسين
نور : أيوة هحكيلك بعدين بس قولتي ايه؟
شاهيناز : و المدرسة ؟
نور : ماهو انا هكلم دينا و هقولها تاخد حصتي مكاني و بعدين متقلقيش يعني مش هتأخر وانا كان ممكن اعمل كدا من وراكي لكن كلمتك و قولتلك
شاهيناز : طيب بس لوحدكم
نور :يا ماما ده مطعم يعني فيه ناس كتير هناكل بس و متقلقيش مش هياكلني والله
شاهيناز : ماشي بس كلميني كل شوية طمنيني عليكي و ردي علي طول مش لازم اتصل 9 مرات يعني
نور بسعادة:حاضر حاضر يا ماما هعمل كل ده .. بحبك اوي علي فكرة
شاهيناز:بس اسمعي دي اخر مرة يا نور و بعد كدا مفيش خروج غير لما يكون بينكم حاجة رسمي
نور : آخر مرة يا ماما ولله
شاهيناز : خلي بالك من نفسك
نور:حاضر متقلقيش عليا مش هياكلني والله
_____________________________________
في مطعم شيك جدا بترقص نور مع عمرو علي اغنية ( احضني نفسي اضمك )
نور : هو انت ممكن تسيبني تاني ؟
عمرو : انا اصلا مسبتكيش اولاني .. انتي اللي سيبتيني .. و بعدين انا مقدرش ابعد عنك مجرد اني تخيلت حياتي من غيرك لقيتها مالهاش اي لازمة ولا اي طعم
نور : تفتكر كل الحلو ده هيدوم و يستمر
عمرو :اكيد هيستمر لو احنا عايزينه يستمر
نور : انا حاسة كل الناس بتبص عليا
عمرو : ليه؟
نور :انا الوحيدة اللي لابسة فستان سواريه و حاطة ميكب سواريه و احنا اصلا بالنهار
عمرو : لا ده زمانهم دلوقتي مبهورين بجمالك اصل انتي حلوة اوي انهاردة
الأغنية خلصت و عمرو و نور رجعوا الترابيزة إلى كانت متزينة بالورد البنفسجي و الأحمر
الجرسون راحلهم و معاه زجاجة شمبانيا و بيصبها في الكاسات بتاعتهم
نور : ايه ده انت هتشربنا شمبانيا يا عمرو
عمرو : و هو احنا وش كدا برضو .. ده فيروز اناناس لزوم الرومانسية بقي عشان نكون زي الافلام و كدا
نور ضحكت : يخرب عقلك
عمرو : اشربي .. بصحتك يا نوري
نور ضحكت و بتشرب: والله هصدق أنها شمبانيا بجد
عمرو : احم الواحد حاسس انه هيسكر
نور ضحكت : أيوة الفيروز بيسكر
عمرو : متزعليش مني علي إللى حصل .. سامحيني
نور : انا اصلا مبزعلش منك عشان اسامحك
عمرو : ربنا يخليكي ليا
نور : بحبك
عمرو ابتسم و سكت
نور: ايه يا عمرو مسمعتنيش
عمرو :انتي كنتي بتقولي حاجة
نور بضيق : اه كنت بقول حاجة بس هي بتتقال مرة واحدة
عمرو قرب منها : طب بصراحة انا سمعتها بس عايز اسمعها تاني
نور : بحبك
عمرو اتنهد بفرحة
نور : مالك
عمرو :بدور علي حاجة تعبر عن اللي جوايا
نور : يا سيدي انا راضية قولها
عمرو : لا ماهو اللي انا عايز اقولها دي مش كلمة ده فعل
نور : طب ايه هو
عمرو غمزلها: قدام الناس كدا
نور : هو ايه ده يعني ما تقول
عمرو قرب الكرسي بتاعه جنبها و كان لسة هيبوسها هي صدته و بعدت
نور :ها ايه ده ارجع مكانك
عمرو : الله مش انتي اللي عملتي فيها وحش
نور :رجعت في كلامي و مكنتش اعرف ان هي بوسة
عمرو : طب انا عاملك مفاجأة
نور : بجد ايه هي
عمرو : هتعرفيها شوية كدا بس لازم الأول قبلها نروح البيوتي سنتر اللي لبستي فيه الفستان تغيري لبسك الأول
نور :طب و الفستان
عمرو :هجيبه بكرة منهم
_____________________________________
بعد ما نور خرجت من البيوتي سنتر و غيرت الفستان و لبست بنطلون جينز و شيميز
عمرو : تعالي بقي عشان اوريكي المفاجأة
نور :فين
عمرو بيشاورلها علي موتوسيكل:يلا اركبي
نور بدهشة: الله جبته امتي ده
عمرو :اشتريته انهاردة يلا اركبي بقي
ركبت نور خلفه علي الموتوسيكل و مسكت الخوذة لبستها
نور :عارف لو وقعتني هضربك بالخوذة دي
عمرو ضحك :طب امسكي كويس عشان متقعيش
_____________________________________
نور رأسها علي كتفه و حضناه من ضهره جامد: زود سرعة
عمرو : زودت .. حاسة بإيه
نور : حاسة اني طايرة زود كمان
عمرو : مش حاسة أننا اتاخرنا الوقت اتأخر و خايف يقلقوا عليكي
نور: نرجع ايه بس انا مفيش حاجة هتاخدك مني انهاردة
عمرو : امسكي كويس
نور : متقلقش .. زود سرعة كمان
عمرو زود السرعة اكتر و الموتوسيكل ارتفع بسرعة جنونية و نور شعرها الطويل بيرفرف حواليها
عمرو : مبسوطة
نور حضنته اكتر و بصوت عالي : مبسوطة اوووي يا حبيبي
و فجأة انزلقت احدي عجلات الموتوسيكل و اتصدم الموتوسيكل بأسفلت و هو بيميل و نور طارت من علي الموتوسيكل و وقعت علي الرصيف و عمرو اتصدم علي الرصيف و الموتوسيكل اتقلب كذا مرة ورا بعض
يتبع......
التعليقات على الموضوع