المهرج بهلول (الجزء الاول)

مش رعب
المهرج_بهلول
الجزء الأول
من غير مقدمات كتير انا خيرى زى ما تقولوا كده رجل اعمال بتاجر فى اى حاجه وكل حاجه مش متجوز وعايش لوحدى فى فيلا كبيره ..
فى يوم روحت متأخر من الشركه ودخلت الحمام علشان اخد دش بس طول ما انا فى الحمام كنت سامع صوت عمال يقول يا خيرى ويسكت وبعد كده يا خيرى ويسكت وفجأه وانا الصابون على عينى لقيت حاجه ملونه كده ظهرت فى نص الحمام غسلت عينى بسرعه بس ملقتش حاجه ..
خلصت وخرجت دخلت الاوضه لقيت واحد لابس لبس مهرج وقاعد على السرير حاطط رجل على رجل !
بقوله انت مين يا جدع انت وايه اللى جابك هنا ؟
قالى اهدى بس انا مش بنى ادم !
قولتله مش بنى ادم ازاى يعنى ؟!
قالى بص انا ساكن فى البيت من اول ما اتولدت وطول عمرى عايش فى الحمام علشانك لكن جه الوقت انى اظهر واعيش معاك بقى فى بيتنا !
قولتله بيتنا ايه ؟ ده بيتى انا وبعدين البيت ده بتاعى وبتاع ابويا الله يرحمه انت عشت فيه ازاى بقى ؟!
قالى ما هو انت مش لوحدك فى الدنيا انت معاك مخلوقات كتير وانا واحد منهم انا جنى بس متخفش طيب مش شرير !
قولتله طب وطالما انت جن مجتش لبستنى ليه زى ما بيحصل فى الافلام ؟!
قالى البسك ايه هو انت شراب !
قولتله لا انت جى تهزر بقى ! اخلص انت طالعلى دلوقتى ليه طالما ما انت ساكن البيت من زمان ؟
قالى لا انا ساكن الحمام من زمان بس جه الوقت بقى انى اخد ولو اوضه من البيت الطويل العريض ده ! حط نفسك مكانى لو انت كل يوم بتنام فى البانيو ويجى واحد كل يوم يرمى عليك ميه سخنه علشان تصحى !
قولتله مين اللى بيرمى عليك ميه سخنه كل يوم ؟
قالى انت يا حبيبى انت كل يوم اصحى وانت بتستحمى بميه سخنه بتسلخنى !
قولتله يعنى انت عاوز ايه دلوقتى ؟
قالى اوضه اعيش فيها وليك عليا مش هتشوفنى تانى !
قولتله ولا متر يا كلب تقعد فيه والبانيو اللى انت بتنام فيه ده انا هشيله من بكره وانقله اوضتى !
قالى يعنى انت عايش فى الفيلا ديه كلها ومش عاوز تدينى اوضه طب اعمل حسابك بقى انى هعيش فى الفيلا كلها وهتشوفنى كل يوم ..
وسابنى وخرج فتح التلفزيون وقعد على الكنبه حط رجل على رجل وجاب قناه اطفال وقعد يغنى ويحرك رأسه !
باين كده انى وقعت فى جنى اهبل !
دخلت نمت وقولت اكيد كل ده مش حقيقى اكيد مفيش جنى عبيط كده صحيت من النوم ولسه بفتح عينى لقيته نايم جمبى على السرير صرخت ورحت ضربه برجلى وقعته من على السرير
لقيته عمال يتوجع ويقولى انت غبى يا خيرى فى حد يعمل كده !
- انت متأكد ياعم الجنى انت انك حقيقى ؟!
- اه طبعا حقيقى امال انت فاكر ايه يعنى ؟ اوعى تكون فاكرنى جرافيك .
- لا ده انت ظريف بقى وبتستظرف عليا !
- اه بستظرف انت تعرف انا مسمينى ايه فى عالم الجن ؟!
- مسمينك ايه يعنى يا عم الجنى ؟
- بهلول الظريف .
معرفتش امسك نفسى من الضحك وقعدت اقوله يا بهلول يا بهلول .
قالى خلاص بقى يعنى انا الحق عليا انى عملتلك القهوه اللى انت بتحبها اصبح ، لقيته بيطلع فنجان قهوه من ورا ضهره وبيقولى اتفضل ..
اخدت بوق من الفنجان لقيته مظبوط زى ما بحبه ، قولتله خلاص يا بهلول انا هقعدك معايا وتعملى اى حاجه اطلبها منك ايه رأيك ؟
قالى ماشى ياعم اى حاجه احسن من نومه البانيو ده انا ضهرى بقاله سنين بيوجعنى وكل يوم اخد من الكريم اللى انت بتدهن بيه ضهرك كل يوم ..
قولتله يا جزمه ياابن الجزمه انت يلا اللى بتخلص الكريم كل يوم ده انا كل ماصحى الاقى نصها خلص !
قالى متأفورش بقى ياعم خيرى وخليك فريش كده اعتبرنى اخوك !
قولتله اخويا مين ، انت هتقعد هنا فى البيت بس اياك تاخد او تلمس حتى اى حاجه بتاعتى !
قالى خلاص يا خيرى قوم يالا نلبس علشان نروح الشغل .
قولتله شغل ايه اللى انت هتيجى معايا فيه بشعرك الاحمر ده ! انا هروح الشغل وارجع الافيك محضرلى الاكل .
قالى اكل ايه هو انت اشتريت فلبينى ، انا جنى محترم ....
سيبته ومشيت روحت الشركه ورجعت لقيته لابس مريله المطبخ وواقف بيعجن عجينه البيتزا ..
ضحكت بصوت عالى وقولتله اشتغل يا بهلول كويس عايز اكل بيتزا احلى من بيتزا هت ، بصلى ومردش عليا ..
قولتله ايه يلا انت مبتردش ليه ؟
بصلى برده ومردش ..
سيبته وروحت غيرت وقعدت اتفرج على التلفزيون لقيته جاى وماسك طبق عليه حاجه سوده غريبه كده ..
قولتله انت حرقتها ينهارك اسود ! سابنى وطلع شويه كور من جيبه وقعد يلعب بيهم ولا كأنه فى سيرك ..
انا وقعت فى متخلف !
قعد يتنطط ويتشقلب فى البيت وانا طلبت بيتزا وقعدت اكل لقيته جه وقعد جنبى على السفره وبيقولى ابوس ايدك هات مثلث انا بقالى كثير مأكلتش وجعان قولتله روح كل اللى انت حرقتها ..
لقيته قعد فى جنب وقعد يعيط الصراحه مكنتش عارف اضحك على شكله ولا اعيط !
ناديته وجيه قعد جنبى واكلنا سوى وقام دخل اوضتى ..
دخلت وراه لقيته نايم على بطنه وقاعد على اللاب بتاعى وبيكلم بنت فيديو شات ..
جريت عليه وقفلت اللاب ومسكته من قفاه ..
واخدته علقته بحبل من رجليه ، وهو قعد يصرخ ويقولى هو انا علشان جنى طيب ومش هعرف اضربك ولا اخوفك تعمل فيا كده وحياه امك نزلنى ..
انا متأكد انى هشوف ايام سوده مع الجنى الظريف ده !
يتبع.......
الباحث_عن_المتاعب
رونالدو