اومينيس 🙄الجزء الثامن و الاخير🙄 رايكم يهمنا❤

#اومينيس8 والاخيررررر

: بابا بيصرخ من الالم ف انظارنا كلنا اتجهت ناحيته بابا متعلق بسلاسل من نار في الهوا ساب مكانه تماما بيتألم ويصرخ اول م شوفت المنظر اتجننت مبقتش عارفه اعمل ايه ضرغام بصلي كأنه عارف اني هتحرك ناحية بابا هجري عليه ، صرخ فيا " اوعي تتحركي اياااكي تسيبي مكانك هو ده هدفه اصلا اننا نتحرك والدايره تتكسر ويتحرر ايااااكي يا راندا اياكي "
..مع كل صرخه منه جزء من روحي بيتحرق سبحان من ثبتني في مكاني سكت تماما بصاله وببكي دموعي نازله شلالات علي خدي ببكي بحرقه مش قادره اكمل قرايه
المارد انفجر صراخ فينا " توقفوا عن القراءه لا فائده من كل هذا انها مجرد البدايه وانت المسؤول يا ضرغام عن كل هذا انت المسؤول عن كل هذه الارواح التي ستهدر من اجل معركة انت تعرف نهايتها حتما! "
= محدش يسمعله اقرا التعويذه يا ابراهيم بسرعه ،ارجعي اقري ايات الحرق يا راندا مش وقته تسكتي خااالص فوقي
بدأ ابراهيم يقرا التعويذه المارد بمجرد م سمعها اتجنن وبدأ يصرخ ويصرخ البيت مش بيتهز البيت بدأ يتزلزل تماما ونائل صرخ في ميمونه الحراس اغلبهم مصاب لازم نتدخل احنا كمان كده الدروع هتقع كلها ولو وقعت كل الشياطين هتهجم عليهم ويكسروا الحلقه
بمجرد م خلص نائل كلامه ندهت عليه مش سامعاله صوت هو وميمونه زي الاول
المارد بيصرخ وعنيه بتتوهج نار اكتر واكتر والسلاسل علي بابا بدأت تضيق كلنا سمعنا عضم بيتكسر سكت مش عارفه اكمل قرايه من البكي قلبي واجعني عليه عاجزه مش عارفه اعمله حاجه فجأه سمعنا صرخه كبيره وصوت ميه كأنها بتطفي نار ودخان كبير ، بابا وقع علي الارض والسلاسل اتفكت الوقعه كانت جامده مش ناطق ولا متحرك.. المارد بص وراه لقي اسلام ماسك قزازة ميه دي قزازه الشيخ ربيع ميه مقري عليها قرءان رشها  عليه حب يتصرف عشان يسيب بابا مكنش بايده حاجه هو الاخر ببص عليه لقيت وشه كله دموع بينهج اول مره اشوفه في الحاله دي اسلام اخويا الصغير ابني وصاحبي روحي .. حزن وغضب علي وشه ملهومش نهايه صرخت :
اسلاااام متبصلهوووش !!!
لكنه كان مش سامعني تماما الغضب عامي عنيه ثابت في مكانه عنيه في عين المارد مثبتهم بكل جبروت
المارد بدأ يقرب منه " الصغير المسكين اخطئت بمشاركتك يا صغير  تري من سيتحمل ذنبك انت ايضا!  " فجأه وبدون مقدمات اسلام بحلق في السقف بأنين ألم مكتوم...  بحاول امسح دموعي مش شايفه حاجه منهم فركت عيني ولقيت الكارثه...
المارد غارز احد مخاالبه في قلب اسلام اسلام بيأن من الالم وبكل اللي باقي من قوته رش عليه الباقي من القزازه فصرخ المارد ورماه بعيد!!! 
كده بابا واسلام بره الدايره.. الدايره بتضعف بس مش ده المهم لأن انا كمان...  اتحركت!
: جريت علي اسلام نزلت علي رجلي واخدت راسه سندتها بين ايدي..
يا اسلاااام فوق والنبي اوعي تحرق قلبي عليك والنبي الا اسلام يا رب الا هو يا رب.. 
مش حاسه بحاجه كله ضباب في ضباب مش شايفه قدامي أصوات من بعيد يصرخوا فيا قومي قومي... متتضعفيش دلوقت ... راندااا...  وانا في دنيا غير الدنيا مين باقيلي من أهلي وعشان مين أقاوم روحي صغرت مبقتش تساعني عايزاها تخرج مني... قوومي اوعي تضعفي دلوقت!!  ..يا راندااا...  هو ازاي العالم كله ممكن يتلخص في الأشخاص اللي بنحبهم بس وباقي الكون بيروح فين!!  ... راندااا قوومي.... فجأه حسيت بأيدين مسكتني بقوه وبتهزني بعنف معرفش مين الرؤيه ضبابيه بس ده صوت.. صوووتك نـ...نائل ؟؟
نائل ولأول مره ظهرلي انا المفروض بسمعهم بسمعهممم بسس مبشوفهمش بس دلوقت ظهرلي نائل
"كل ده قرب ينتهي اوعي تفلتي ايدك دلوقت متصدقيش كل اللي حصلان خلي إيمانك قوي فوقي احنا جمبك.. استقوي.. ربنا معانا!  "
اشمرخ  لخ اصفد كليش كرير شهريش تتليه حام  اصفرخ
حام اصفرخ..حاام اصفررخ...!

"حضر الحظرد حضر سيدي ! "
بدأت هالة نار تكبر وتكبر وتظهر من العدم ومعاها ضرغام صرخ يا خدااام الصمديه اطفئوا الهاله بحول الله وقوته!
فجأه خرج من كل الزوايا هالات بيضه كبيره ممتد منها زي صولجانات من نور اتجمعوا فوق هاله النار اللي ظهرت وسلطوا كل الضوء عليها الضوء بيحاول يحتويها ويخمدها وهي بتقاوم وبتكبر اكتر واكتر
نائل يصرخ فيا ارجعي مكانك متضيعيش كله ده ع الفاضي انتي اقوي من كده
وابراهيم يصرخ قول اسمه يا ضرغام التعويذه مش نافعه من غيره انطق الاسم يا ضرغام
ميمونه بتستغيث بنائل وتصرخ الدروع بتقع الحراس اغلبهم جريح وقتيل الشياطين اكتر مننا
..عقلي مش مستوعب كل الاحداث دي ..مهزومه رجليا وايديا علي الارض.. قلبي نبضه ضعف " اوقف وخلصني" روحي مش سايعاني حرفيا.. عيوني تصلبت وتحجرت فيها الدموع تماما مبحلقه في الارض مش حاسه بحاجه كل الاحداث السريعه كأنها بالتصوير البطيء الزمن واقف بالنسبالي.. محستش غير بايد علي راسي غمضت عيني وسبت نفسي لقيتني في مكان تاني خالص قدام نهر وخضره طيور كتير شكلها عجيب لكن حلو وشلال اول النهر نازله منه الميه بسلاسه جميله كأنهم جزء واحد مش منفصلين وانا واقفه باصه علي الطيور اللي بتلعب في النهر واللي طايره ورا بعض وشكل الميه وقطراتها اللي بتترشق في كل حته زي قطع الالماس... " الطبيعه هنا هاديه وجميله مش كده ؟!"
جاني الصوت من ورايا مريح وهادي بصيت لقيته شيخ كبير في وشه نور مش طبيعي وفي نفس الوقت راحه مش طبيعيه كان نفسي ابصله وافضل ساكته من كتر منا مطمنه لملامحه بس رديت " جدااا ، كل حاجه هنا حلوه "
بصلي وابتسم وجه وقف جمبي..
تعرفي انك تقدري تقعدي هنا براحتك بس انا عارف انك لو قعدتي شهر اتنين ولا سنه مش هتقدري تمنعي احساس الفقد لاهلك ولاحبابك ، كل حاجه حلوه اللي بيديها قيمتها وجود الناس اللي بنحبهم فيها ‘‘تقدري تقوليلي فايده انك تفرحي ايه طالما مفيش حد تقدري تقوليله انك فرحانه ؟؟  ولا حاجه  مش هتحسي اصلا بانك فرحانه
ربنا بيدينا كل حاجه حلوه وفي المقابل بيطلب مننا اننا نؤمن بيه ونعبده ومنفقدش ايماننا مع اول ابتلاء يقابلنا بالعكس لازم نفتكره اكتر ونحاول نحسن الظن في حكمته الالهيه من كل اللي بيحصلنا..  لو حابه خليكي هنا ولو حابه ارجعي القرار الاول والاخير ليكي بس افتكري.. إن الله لا يعطي اصعب معاركه إلا لاقوي جنوده!
كان بيتكلم وانا بسمعله لا لا كان بيتكلم وكانت كل خليه فيا بتتشرب كلامه بهدوء تام.. بصيتله من غير م اتكلم فضحك وقالي " كنت عارف انك هتختاري الاختيار ده! "
مد ايده علي راسي ومسح عليها روحي راحت صحيت وشهقت لقيت كل حاجه زي م هي معرفش اذا كان ده حلم ولا رؤيه بس اللي اعرفه ان ركوعي في وقت م كان لازم اتحرك مش لايق عليا ،قومت وغضب الدنيا في روحي قومت وايماني بالله قواني كل دول خلق الله والقوه المطلقه للواحد القهار مش مخلوقاته وحزب الله هم الغالبون
رجعت مكاني واخدت نفس بصيت لهالة النار والمارد وباعلي صوت بدأت ارتل " يرسل عليكما شواظ من نار ونحاس فلا تنتصران .. يرسل عليكما شواظ من نار ونحاس فلا تنتصران... يرسل عليكما شواظ من نار ونحاس فلا تنتصران "
بدأ نائل يدور حول المارد ويسددله ضربات ومع كل ضربه المارد يزداد غضبه لكنه مش عارف يعمل حاجه القرءان والايات بتضعفه الشياطين بدأت تتراجع والدروع نورها بدأ يرجع بدل م كانت بهتت واغلبها انطفي
بدأت اعلي صوتي اكتر واكتر وصرخات المارد بتزيد فجأه سدد ضربه عشوائيه لنائل لكنها جت فيه..  نائل اتصاب ووقع ع الارض صرخ فيا متوقفيش كملي.. بدأت اعلي صوتي اكتر واكتر.. فلا تنتصرااان فلا تنتصراااان..
ضرغام صرخ " ناصووووووووور "
ابراهيم سمع الاسم وونطقه فورا اخر التعويذ بمجرد م نطقه الارض تشققت كلنا وقعنا بدأ المارد يطلع منه اشعه من الضوء وكأنه بيتحرق كل جزء فيه بيهلك رماد اسود فحم نازل والارض بتسحب الشياطين لتحت بؤره كبيره سوده ملهاش قرار لدرجة اني قولت هقع معاهم خلاص ، الخدام اللي كانوا مسلطين الصولجانات علي هالة النار فجأه الهاله انطفت واصبح مكانها زي فحم اسود ورماد غريب
انا كنت ع الارض حرفيا وسامعه نائل من بعيد بيناديني.. راندااا رانداااا
الرؤيه بدأت تبقي ضبابيه الاصوات بدأت تختفي حاسه اني عايزه انام سبت نفسي خالص...  وغمضت عيني!

: صحيت علي صوت ماما بتناديني : انا مش عارفه هتفتحي بيت ازاي انتي وبتناميلنا للضهر كده قووومي كفاياكي نوم ماما فتحت الشباك وطلعت تاني
فركت عيوني وقعدت اتاوب... يا نهاااااار اسوووود انا فين واسلاااام وبابااا جريت بره اللاوضه لقيت اسلام قدام التلفزيون وبابا وريتاج وعامر بياكلوا ع السفره ،وقفت في مكاني للحظه بستوعب طب ده كابووس يعني ولا حلم ولا افلام الفانتزيا اثرت علي عقلي بس لاا لالالالااا عقلي الباطن اغبي من انه يخلق الاحداث دي بكل التفاصيل الدقيقه دي
= بتكلمي نفسك يا راندا ولا ايه ؟
-ايه ده راندا هانم صحيت اخيراا مش قايلك من امبارح في مسأله فيزيا مش فاهمها وقولتي هشرحهالك وربنا لو نقصت درجه تبقي هي السبب خليك شاهد ياا حاج اهو
= واقفه ليه عندك تعالي كلي
-ريتاج انتي كويسه ؟؟
=كويسه ايه دنا هتنفخ ورايا سكشن مايكرو والدكتور هينفخني عشان اتأخرت
-يبقي كويسه، شويه وهاجي اكل يبابا وانت يا اسلام بالليل هشرحهالك معلش
دخلت اوضتي وقفلت الباب ورايا وناديت بصوت واطي... نائل... ميمونه..  مفيش صوت محدش بيرد
بابا دخل الاوضه لقيني واقفه وبمسح الدموع من عيني
اتنهد وجه وقف جمبي
-كل حاجه خلصت وكل حاجه بقت كويسه بس عشان كل حاجه ترجع لطبيعتها كان لازم شوية تضحيات صغيره ..كنتي اشجع بنت شوفتها في حياتي وانا فخور بيكي جدا
حاولي تنسي كل حاجه عدت وعيشي حياتك طبيعي جدا وبره ولا حد فيهم فاكر حاجه فمتحاوليش تفتحي الموضوع حتي بينك وبين نفسك كده احسنلك واسلم
مسحت اخر دمعه مني وقولتله حاضر بس عندي سؤال اخير..  " مين اللي جالي في الرؤيه ده ؟! "
بابا ضحك..  " في حد ميعرفش جده الكبير يا بنت, يلا قومي اتوضي وصلي الصبح وتعالي كلي مع اخواتك
=الصبح!!  هي مش ماما بتقول الضهر
-هههههههه م انتي عارفه مامتك بقي الساعه تسعه بالنسبالها الضهر عشان تقوموا
ضحكنا سوا وبابا خرج فضلت قاعده شويه ع السرير متملكني حزن مقدرش امنعه.. يعني مش هسمع كلامهم وصوتهم تاني ميمونه ونائل وهما بيضحكوا وهما بيتخانقوا وهما بيهزروا معايا ؟!
واضح ان الدمعه اللي مسحتها وبابا موجود مكنتش الاخيره

خرجت من الاوضه اكلت واتوضيت وصليت قعدت ع المصليه حمدت ربنا واثنيت عليه وفضلت ادعي كتير لحد م روحي اتغسلت تماما
قومت افتح الدولاب عشان البس اخرج اقابل ريم صحبتي حاسه بقالي قرن مقابلتهاش اكتر حد محتاجه اقابله واحكي معاه دلوقت
بفتح الدولاب وبنقي.. النقاب الاسود ولا الكحلي يا تري ؟؟
=ده كلاام الاسود طبعا من امتي بتلبسي الكحلي ان شاء الله
-اخراااس يا وجه البرص انت الكحلي بيلبقلها اكتر شو دراك انت بالالوان
بصيت ورايا... ناااااائل ميمونه!!!!!!
تمت