المهرج بهلول (الجزء الثالث و الاخير)

المهرج_بهلول
الجزء الأخير
مابين الحقيقه والخيال تاه عقلى ، اتلغبطت كل المفاهيم ومبقاش فيه غير مفهوم واحد ..
ان الشيطان عايزنى اغلط واعصى ، عايز يدمرنى ويقتل جوايا الايمان وانا بدل ما اتجه لربى واقتل الشيطان ..
مشيت وراه ..
انا دلوقتى هعرض عليكوا الجزء الاسود من حياتى ، كل اللى فات كانت كوميديا بس جيه وقت انكم تعرفونى على حقيقتى ..
انا خيرى طبعا عرفتونى كلكوا انى راجل اعمال طيب وكوميديان وبيهزر مع جنى ..
لكن معرفتوش انى تاجرت فى السلاح والمخدرات ويمكن الاثار واديت رشاوى وسرقت وقتلت وعملت كل واى حاجه ممكن تتخيلوها !
وطلعلى الجنى اللى كان بالنسبه ليا علامه المفروض ابدأ ارجع واحظر ..
لكن لا فضلت بهزر لغايه لما الموضوع قلب جد !
لغايه لما الشيطان كشف عن وشه وعرفنى انه مش صاحبى ولا عمره هيبقى صاحبى لانه عدوى الاول والاخير !
وقفت قدام الجنى وابتديت اعاتبه كأنه من البشر واقوله ايه انت نويت تبوظلى حياتى ولا ايه ؟!
رد عليا وقالى انت لسه مشوفتش منى حاجه ، اوعى تكون فاكر انى صحبك او حتى حابب اعيش معاك ! جدك اخد منى كل حاجه زمان ! بس جدك كان قوى مش ضعيف زيكوا دلوقتى !
قولتله انت ليك حياتك وانا ليا حياتى .
قالى بس انا عايز حياتك !
قولتله قصدك ايه ؟!
قالى عايز تموت نفسك !
قولتله اه انت عايزنى اموت كافر علشان انفذ اللى فى دماغك لا مش هحققلك اللى انت عايزه !
قالى غصب عنك مش برضاك !
لقيت صوت فى ودانى بيقولى "الحل فى القرأن"
والكلمه عماله تتردد جوه ودانى ولقيت الجنى شكله بيتحول ما بين كلب وقطه وقرد ..
كان بيتغير بطريقه غريبه وعماله تطلع منه اصوات ..
اصوات صريخ كأن فيه ناس بتتعذب ، كأنهم فى الجحيم والجمله عماله تتردد فى ودانى ..
جريت على اوضه المكتب ودورت لغايه لما لقيت مصحف وخرجت وابتديت اقرأ بصوت عالى :-
( وَاتَّبَعُوا مَا تَتْلُوا الشَّيَاطِينُ عَلَى مُلْكِ سُلَيْمَانَ وَمَا كَفَرَ سُلَيْمَانُ وَلَكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ وَمَا يُعَلِّمَانِ مِنْ أَحَدٍ حَتَّى يَقُولا إِنَّمَا نَحْنُ فِتْنَةٌ فَلا تَكْفُرْ فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ وَمَا هُمْ بِضَارِّينَ بِهِ مِنْ أَحَدٍ إِلا بِإِذْنِ اللَّهِ وَيَتَعَلَّمُونَ مَا يَضُرُّهُمْ وَلا يَنفَعُهُمْ وَلَقَدْ عَلِمُوا لَمَنْ اشْتَرَاهُ مَا لَهُ فِى الآخِرَةِ مِنْ خَلاقٍ وَلَبِئْسَ مَا شَرَوْا بِهِ أَنفُسَهُمْ لَوْ كَانُوا يَعْلَمُونَ )
فى وسط ما انا بقرأ كان الصراخ والاصوات بتزيد وحسيت انه بيتبخر ..
صحيت اليوم التانى ..
وجبت شويه ورق وقلم وكتبت ..
كتبت كل حاجه حصلت فى الايام اللى فاتت من اول ما بهلول ظهر لغايه لما قضيت عليه ..
وبعتها لمنتج افلام كنت اعرفه ..
وعجبته جدا وبعد ايام بدأ يشتغل على تصوير الفيلم وممثلين كبار جدا شاركوه فيه والفيلم نجح جدا وعجب الجمهور ..
وفى يوم وليله بقيت مشهور وصفيت كل الشركات وابتدت ألف وكتبت فيلم ورا فيلم ورا فيلم لغايه لما اسمى اتشهر واتعرفت والناس بقوا بيتصورو معايا ..
ممكن يكون كل ده علشان انا لجئت لربنا ، ممكن كل ده علشان مشيت فى الطريق الصح ..
عدت الايام وزادت الافلام والايرادات وخرجت فى يوم اتمشى ..
وانا ماشى فى الشارع لقيت بهلول !
اه هو بنفس لبس المهرج ..
رحت ناحيته وقولتله ازيك يا بهلول ..
مردش ..
قولتله ايه يا بهلول مبتردش ليه ؟
بصلى وابتسم ابتسامه مخيفه .
وفجأه ببص حواليا لقيت كل الناس بهلول ، كل الناس بقوا مهرجين !
والابتسامه المخيفه على وشهم و بدأت الدنيا تسود قدام عينى ووقعت على الارض ..
فوقت بعديها لقيت نفسى نايم على الكنبه وبهلول قاعد بيتفرج على التلفزيون !
قولتله انت بتعمل ايه هنا ؟!
قالى اهدى يا خيرى فيه ايه ؟
قولتله انت بتعمل ايه هنا يا بهلول ؟!
قالى بهلول مين انا مش بهلول انا عزت اخوك يابنى ادم .
قولتله عزت اه عزت مين ؟! انا مليش اخوات !
قالى لا انا عزت اخوك يا خيرى بس من ام تانيه وعشت فى فرنسا طول عمرى وكنت اعرف ان انت اخويا بس عمرى ما شوفتك واول لما لقيت اسمك على فيلم المهرج قولت لازم اجيلك واعرف انت عايش فين وازاى ؟
قولتله امال مين اللى قدامى ده !
قالى انا يا خيرى .. انا اللى واقف قدامك !
قولتله لا ده بهلول !
فضلت اصرخ وهو بيحاول يهدينى وجريت فتحت الباب وخرجت وكل الناس بهلول ملامحه على كل الناس !
كل الناس بقوا مهرجين كلهم بقوا فسده ! كلهم بعدوا عن ربنا ، كلهم بقوا شياطين ،كل واحد عايز يخلص من التانى ، كلهم بقوا بهلول !
افيقوا يرحمكم الله.
إنتهت
نلتقي ف قصه جديده
رونالدو