الباب المخيف

الباب المخيف .
حقيقيه...
انا اسمى عمر عندى 23 سنه احداث القصه بدات معايا من شهر تقريبا
انا عايش مع والدى و والدتى و اخواتى ملك و ساره
فى شقه مكونه من 3 غرف و صاله غرفه لبابا و ماما و غرفه ليا و غرفه لاخواتى الاتنين ساره و ملك
المهم فى يوم كنت مع بابا نازلين نجيب طلبات للبيت و احنا ماشيين لاقيت بابا فجأه قالى تعالى كده و رجعنا
عند محل كنا عدينا من عليه لاقيته محل بيبيع و يشترى العفش المستعمل دخلنا انا و بابا المحل و بابا لفت نظره
باب كان الراجل عارضه قدام المحل و كان شكله نضيف عامل زى ابواب الفنادق
لمهم بابا سأل الراجل بكام الباب ده قاله ده بـ 100 ج من هنا لهنا بابا اخدوا منه بـ 80 ج
و طبعا كده سعره رخيص جدا سألت بابا هتعمل بيه ايه ؟ قالى هشيل باب اوضة اخواتك و هركب ده مكانه
لان فعلا باب اوضة اخواتى كان قديم جدا و كان مكسور
المهم اخدنا الباب و روحنا اول ما دخلنا الشقه بالباب امى و اخواتى سألوا بابا هتعمل بيه ايه ؟ قالهم هركبوا
مكان باب اوضتكم القديم اخواتى فرحوا جدا طبعا لانهم اخيرا هيركبوا باب غير الباب المكسور
تانى يوم بابا نزل يجيب نجار عشان يركب الباب و بعد ما نزل بساعه كده جيه و معاه نجار
دخل النجار و اخد واجبه و شاف الباب و بابا قاله هتركب الباب ده مكان الباب القديم
النجار قاله مفيش مشاكل المهم النجار بدأ شغله و فك الباب القديم و بأ يركب الباب و هو بيركبه قاله
على فكره يا استاذ الباب ده نضيف جدا هو حضرتك جبته بكام ؟ بابا قاله اديله سعر ؟
النجار قاله هو الباب بالكالون بتاعه ده ما يقلش عن 500 جنيه
بابا ضحك و قله انت مش هتصدق انا جايبه بكام
النجار قاله بكام ؟ رد بابا و قاله بـ 80 ج
النجار اتصدم طبعا من السعر و قاله ده لقطه و يستاهل اكتر من كده بكتيير ده فيه كالون بس يعدى ال 100 ج
المهم النجار ركب الباب و اخد حسابه و مشى و بصراحه الباب بعد ما ركب بقى شكله جميل و اخواتى فرحوا بيه جدا
امى حضرتلنا العشا و اكلنا و قعدنا شويه نتفرج على التليفزيون و بعد ساعه كده كل واحد دخل على اوضته
و نام تانى يوم الصبح سمعت اختى ملك بتقول لـ ماما انا حلمت بكابوس و حش اوى يا ماما و ساره قالتلها ايه ده انا كمان حلمت
بكابوس وحش اوى المهم ماما مهتمتش و قالتلهم عادى و عدى اليوم لحد ما جيه و قت العشا اكلنا و دخلت ملك الاوضه
عشان تنام و بعد نص ساعه تقريبا سمعنا صوت ملك بتصوت و تجرى ناحيتنا قومنا كلنا اتفزعنا و قولنالها فى ايه
قالت و انا نايمه سمعت صوت كركبه فى الاوضه افتكرت ساره بتعمل حاجه و فجأه بفتح عينيا عشان اشوفها بتعمل ايه لاقيت
واحده شكلها وحش اوى كأنها محروقه عماله تكركب فى الدولاب كأنها بتدور على حاجه و اول ما شفتها صوت و طلعت اجرى
دخلنا كلنا ع الاوضه مالاقيناش فيها اى حاجه و مفيش حاجه متكركبه بابا قالها فين ده اللى بتقولى عليه
الاوضه مش مكركبه ولا حاجه
بابا قالها خلاص مفيش حاجه اهدى انتى بس و اختك هتدخل تنام معاكى و متخافيش
دخلوا ناموا و صحينا الصبح ماما سالت ملك ها حصل حاجه تانى ؟ ردت ملك قالتلها لا بس حلمت بكابوس
بصيتلها ساره و قالتلها انا كمان حلمت بكابوس مش عارفه فيه ايه
المهم بابا و ماما و اخواتى نزلوا يشتروا هدوم لاخواتى و انا قعدت لوحدى فى الشقه
اتفرج ع التليفزيون و فجأه لاقيت باب اوضة اخواتى اتفتح لوحده و عمل صوت عالى جدا
انا اتفزعت و قمت ابص يمكن حد جيه بس ازاى باب الشقه ماتفتحش و محدش فى الشقه غيرى
روحت ابص ع الاوضه مالقيتش حد و رجعت تانى اتفرج ع التليفزيون شويه و حسيت بحاجه سوده جريت من قدامى
خفت و قولت انا هدخل انام احسن و دخلت نمت فى اوضتى بعد ما عينيا غفلت و روحت فى النوم
حلمت بكابوس فظيع و لاقيت اختى ملك بتصحينى و بتقولى ايه اللى نيمك هنا صحيت و استغربت وقولتلها هنا فين ؟
قالتلى فى اوضتنا اول ما سمعت كده قولتلها ايه اوضتكم !
و ببص لاقيت فعلا انا فى اوضتهم استغربت جدا و قولت طب ازاى انا كنت نايم فى اوضتى ايه اللى جابنى هنا ؟
فى حد منكم جابنى من اوضتى للاوضه دى ؟
ردت اختى و قالتلى ازاى يعنى احنا لسه جايين حالا و يا دوب انا لسه داخله الاوضه عشان اغير هدومى
لاقيتك نايم غاستغربت و قولت اصحيك
انا قمت و مش فاهم اى حاجه كأن كنت فى غيبوبه
دخلت اوضتى بحاول افسر اللى حصل و عمال افتكر يمكن انا نمت فى الاوضه التانيه فعلا
بس انا متأكد انى نمت فى اوضتى بس افتكرت انى حللمت بكابوس فظيع حاولت افتكر الحبم مفتكرتش منه اى حاجه
قولت يمكن انا تعبان شويه و متوتر حاولت اقنع نفسى انى فعلا نمت فى اوضة اخواتى
حكيت لبابا عن اللى حصل قعد يضحك قالى يبقى انت بتمشى وانت نايم و خدها بهزار من الاخر محدش صدقنى انا نفسى لو حد
قالى انه حصل معاه كده مش هصدق
المهم دخلت ملك عشان تنام و لسه بتغمض عينيها و يادوب هتنام حست بحاجه بتتحرك فوقيها
فتحت عينيها لاقيت حد واقف بين دماغها راحت مصوته و قعدت تقول الحقونى الحقونى دخلت جريت ع لاوضه لاقيتها بتصوت و منهاره و هى نايمه بقولها
فى ايه قالتلى كان فى واحد واقف بين دماغى و انا نايمه كان حاطط رجل ع اليمين و رجل ع الشمال و كان لابس
بياده زى اللى بيلبسوها فى الجيش و كانت كلها دم
قولتلها طب اهدى بس يمكن كان كابوس قالت والله ماكنش كابوس انا شفته بعينيا دخل بابا و ماما و اختى ساره و قالوا فى ايه يابنتى يمكن كنتى بتحلمى
قعدت تعيط و تقول والله ماكانش حلم محدش مصدنى ليه قولتلها خلاص قومى اتوضى و صلى و اقرائى قران و نامى و ان شاء الله مش هيحصل حاجه
ردت ملك لا انا مش هنام فى الاوضه دى انا خايفه
وساره قالت لا انا مش هنام لوحدى فى الاوضه دى بابا قالهم خلاص ناموا انتوا فى اوضة عمر
و عمر هينام فى اوضتكم قولتله ايه قالى انت راجل و مش هتخاف زيهم و استحمل يوم او يومين لحد ما اختك تهدى
و تنسى و يرجعوا يناموا تانى فى اوضتهم
انا بصراحه كنت خايف بس قولت هعمل ايه يعنى انا مش صغير بردو واخوهم الكبير
و فعلا اخواتى دخلوا و ناموا ف اوضتى و انا دخلت ونمت فى اوضتهم و يا دوب دخلت قعدت شويه ع السرير
قولت اشغل نفسى باى حاجه وانا قعاد مسكت كتاب و قريت فيه و بعد نص ساعه كده لاقيت نفسى عايز انام و فعلا نمت
بعد ما نمت بشويه صحيت على صوت رزع باب الاوضه كأن حد بيرزع باب الاوضه و بيقفله
انا قمت و اتخضيت ببص ع الباب لاقيته اتقفل قمت عشان افتحه لاقيته علق و مش عايز يفتح
سمعت صوت ورايا و انا بحاول افتح الباب ببص لاقيت واحده شكلها يخوف جدا جسمها كله كأنه محروق
لاقيتها بتكركب و بتدور على حاجه فى الدولاب انا خفت منها جدا و مبقتش عارف اعمل ايه فضلت احاول افتح الباب
بردو مش عارف ببص تانى وريا لاقيت واحد لابس لبس عساكر الجيش ووشه وهدومه كلها دم وواقف بيبصلى
انا خفت اكتر و مابقتش عارف اتكلم او اتحرك شايف الاتنين قدامى و مرعوب و مصدوم من مناظرهم و خايف حد فيهم يقربلى او يعملى حاجه
فى اللحظه دى انا وقعت ع الارصو فقدت الوعى محستش غير لما لاقيت حد بيفوقنى و بيقولى عمر قوم انت
ايه اللى منيمك ع الارض كده و كانت امى قولتلها انا اخر حاجه فاكرها انى كنت بحاول افتح الباب و مكنتش عارف افتحه ماما قالتلى ازاى يابنى انا فتحت الباب عادى و دخلت لاقيتك نايم ع ارض
قولتلها انا مكنتش نايم ع الارض انا كنت فاقد الوعى من اللى شفته ماما قالتلى و شفت ايه بقى ؟
قولتلها واحده شكلها وحش كانها محروقه و شفت واحد كان لابس لبس عسكرى فى الجيش و جسمه كله مليان دم
امى قالتلى يابنى يكمن كنت بتحلم ولا حاجه قولتلها والله العظيم ده اللى حصل و شفته بعييا
دخلت ملك علينا و سمعتنى وانا بكلم ماما و قالتلها دول نفس اللى انا شفتهم يا ماما
والله انا كمان شفتهم اهو عمر كمان شافهم يعنى انا مكنتش بحلم ولا حاجه
ماما قالت لا انتوا هتجننونى وراحت ندهت بابا و حكيتله ع اللى حصل و انا و ملك قعدنا نحلف له ان ده حصل
بابا قالنا طب اشمعنا انتوا اللى بتشوفوا الحاجات دى و احنا لا ؟
قولتله يا بابا الحاجات دى مش بتظهر غير فى الاوضه دى اكيد الاوضه دى فيها حاجه مش طبيعيه
بابا قالى ما اخواتك من يوم ما اتولدوا و هما بيناموا فيها و محصلش حاجه
راح بابا قايل عموما محدش ينام فى الاوضه دى تانى لحد ما نشوف حل يمكن الاوضه دى مسكونه و انا هجيب شيخ
عشان يشوفلنا فى ايه بالظبط
تانى يوم بابا جاب شيخ و الشيخ دخل الاوضه و قعد يقرا فى قران و بعد ما خلص بابا سالوا
الشيخ قالو مفيش حاجه بابا استغرب اومال ايه اللى بيحصل لولادى ده
المهم انا قعدت مع نفسى و قولتل لازم الاقى حل و قررت انى هنام تانى فى الاوضه دى و فعلا دخلت الاوضه و قفلت الباب و نمت
صحيت على صوت كركبه فى الاوضه المره دى قمت لاقيت الاوضه مليانه ناس اشكالهاتخوف جدا
شفت اللى شفتهم اول مره اللى هى كانت كأنها محروقه و شفت اللى كان لابس زى عسكرى و جسمه كله دم و شفت اللى جسمه متقطع و اللى ايدها مقطوعه
و اللى من غير راس كلهم كانوا اشكالهم ترعب انا فضلت فى مكانى ع السرير مقدرتش اتحرك لحد ما عينى غفلت و نمت و حلمت بكابوس
حلمت انى فى مكان زى طرقه ماشى فيها و كان كلها دم فضلت ماشى لحد ما لاقيت باب فتحته و دخلت لاقيت نفس الناس اللى شفتهم فى الاوضه
و قمت من النوم مفزوع بس المره دى افتكرت الحلم و حكيت لباب ع اللى شفته فى الاوضه و حكيتله الحلم و انا بحكى الحلم لبابا
افتكرت و قولتله ان الباب اللى شفته فى الحلم كان نفس باب الاوضه !
قالى قصدك ايه انه ممكن يكون الباب ده هو السبب قولتله ممكن
بابا قالى يابنى مش معقول الباب هيكون فى ايه يعنى قولتله ممكن يكون هو السبب ليه لا
قولتله احنا لازم نرجع للراجل اللى اشترينا منه البابو نعرف حكاية الباب ده ايه قالى ماشى يالا نروح لصاحب الباب و فعلا روحنا للراجل اللى اشترينا منه الباب
اول ما دخلنا عليه الراجل وشه اتقلب و قالنا خير قولتله احنا كنا عايزين نعرف انت جبت الباب ده منين قالى و هيفيدك فى ايه لما تعرف
قولتله عايزين نعرف عشان الباب ده فيه حاجه مش طبيعيه
الراجل قالى بص يابنى انا الباب ده اخدته مع بيعه كنت شاريها من مستشفى و كان رخيص جدا قولت اخده ابيعه بسعر حلو اكسب فيه
و عرضت الباب فى المحل عندى و جيه واحد اشتراه منى ب 300 ج و بعدها بفتره لاقيت الراجل اللى اشتراه منى جايبلى الباب و جاى
بيقولى خد الباب اللى اشتريته منك اهو و مش عايز فلوسه كمان
انا استغربت و قولتله ازاى يعنى فى ايه قالى مفيش بس انا مش عايزه قولتله اصبر بس وفهمنى فى ايه عشان مش هاخده الا لما تفهمنى الحكايه
الراجل حكاللى و قالى انه من يوم ما اخد الباب و ركبه عنده بقى هو و مراته يشوفه حاجات غريبه زى ناس شكلها تخوف و الباب بيفتح و يقفل لوحده
انا قولت يمكن الراجل ده دماغه تعبانه و فعلا اخدت الباب بس المره دى اخدته ركبته عندى فى الشقه و من يوم ما ركبته
و فعلا شفت كل اللى حكالى عليه الراجل و صدقت كلامه و فكيت الباب و عرضته تانى فى المحل عندى و قولت هبيعه باى تمن
بس انا اكتشفت ان الباب ده طول ما هو مش متركب مش بيظهر اى حاجه ولا بيحصل اى حاجه لكن لما بيتركب بيظهر الناس دى و يفضل
يفتح و يقفل لوحده و فى حاجه كمان انا مقولتلكش عليها
انى لما اشتريت الباب ده كان فى زى يافطه حديه كده متركبه ع الباب و مكتوب عليها ( المشرحه ) انا فكيتها و عرضته
انا اول ما سمعت منه كلمة مشرحه اترعبت و عرفت سر الباب ده ايه
خلصنا الكلام مع الراجل و اخدنا بعضنا و روحت انا و بابا فكينا الباب و اخدناه و روحنا بيه على الراجل اللى اشتريناه منه
و اديتهوله و شينا و اشترينا باب جديد للاوضه و ركبناه و محصلش اى حاجه تانى من بعد ما شيلنا باب المشرحه ده
و بابا اقتنع ان الباب كان السبب فى كل ده
و على فكره انا كنت معدى من عند الراجل صاحب الباب و لاقيت الباب لسه معروض لحد الان
عشان لو حد فيكم حب يشتريه و يركبه عند ...
. انتهت
محمد