قصة قصر البا.... الروحاني 👻الجزء الثاني و الاخير👻

هقصر البا... الروحاني
الحلقة الثانية والأخيرة
الرسالة كان مكتوب فيها..أهرب بسرعة من عندك, المريض رووحه طلعت,, والساحر والاتنين اللي معاه هربوا وانا هربت وراهم
فتحت الرسالة وعينيا برقت,, أفتكرت أن أحمد كان واخد تليفونه ومحفظته تحت المخده,, كنت بفكر طب هو هرب أزاي؟؟بس مشغلتش بالي دول ممكن يدبحوني أنا, أستأذنت من الاتنين ولاد المريض على أساس أني هروح أفك نفسي بره ورحت اتسحبت ناحية باب القصر لقيته مش راضي يفتح مكنش في مكان أجري فيه غير الترقة الضلمه,, نورت الموبيل وطلعت أجري فيها ,, كان في آخرها مطبخ,, وفي باب للمطبخ لبره,, حاولت أفتحه مكنش راضي يفتح برده,, لما سمعت صوت الست العجوزة بتقول
...عايز تهرب دلوقتي؟؟ ما أنا ياما حذرتك قبل ما تدخل
اتلفت بنور الموبايل حواليا مكنتش شايفها,, وكنت بدأت أنهار من الخوف,, خطر في بالي ان السجن ده في خيالي انا,, لما افتكرت ان الحديد كله مصدي من سنين ففتحت شباك المطبخ بعد ما قفلت عليا بابه اللي موصل للترقه عشان محدش يسمعني,, كان متداعي فعلا فهزيت الحديد اللي برا الشيش بايديا فاتكسر معايا اكتر من وصله لكن وانا بنط من الشباك حته حديدة جرحتني جرح قطعي في جنبي قفلت الشيش ورايا عشان اعطلهم لما ييجوا يطلعوا بقدر الامكان وميخدوش بالهم من المنفذ ده,, وطلعت أجري وانا بتسحب,, لغاية ما وصلت عند البوابه الخارجيه كانت عربية ابراهيم مش موجودة,, وبمجرد ما وصلت عند صفين الشجر سمعت صوت زعيق جامد من ولاد المريض كانوا بينحبوا ابوهم,,
عرفت أني عمري ما هلحق أهرب منهم خاصة مع الخفافيش اللي كانت بتخبط في وشي وجسمي وعطشانه لدمي اللي بيسيل فقررت أعدي من وسط الشجر واجري في الصحرا بصورة عمودية وابعد عن صفين الشجر,, بعدت ييجي 500 متر في الظلام الحالك والبرد والريح واترميت على الارض لما معدتش قادر وضغطت على جرحي عشان يبطل ينزف,, فضلت اقاوم فقدان وعيي بشراسه وانا شايف الست العجوزه قاعده على مسافه قريبه مني على الرمل,, منتظراني,, مش عارف وصلتلي أزاي ومنتظرة ايه, منتظرة موتي ولا انهياري ولا فقدان وعيي ولا ايه مش عارف وانا بقاوم انا بقاااو انا بااااا
جاتلي وقربت وشها من وشي أوي حسيت ان وشها بيتغير ب 100 شكل من صبية صغيرة لواحده شباب لواحدة ست اربعينيه لواحده أكبر لست عجورزة وفي كل شكل من دول بشوف في عينيها ضحايا مختلفين بيصرخوا من الفزع قدامها لغاية ما شفت شفت نفسي وصرخت,, وفجأة صحيت على صوت معيز وخرفان ووش راعي غنم أخدني وربطلي جرحي وسقاني وقاللي انت ايه حكايتك؟؟ مكنتش عارف اللي حصللي مع الست العجوزه, كان قبل ما افقد الوعي ولا بعده وكان دا اللي شاغل تفكيري وانا ببص على البيت المهجور اللي في وسط الصحرا,,
فقاللي...أوعى تكون رحت هناك دا بيت مسكون من سنين
بعد ما استجمعت قوايا اخدني ووصلني للطريق ووقفت كتير لغاية ما عربيه وقفتلي رحت مستشفى كنا تقريبا بعد العصر غيرت عالجرح وحطيت تليفوني على الشحن وأول حد فكرت أتصل بيه كان احمد المتبرع
...الو ,, انت فين يابني؟؟
لقيت اللي بيرد صوت مختلف ...بتنصبوا بحياة الناس يا ولاد ال.......قريب أوي هتعرف أنتوا نصبتوا على مين ولما جيتوا تنصبوا قتلتوا مين,, انتوا حلال فيكم الحرق بالحيا ودا عدل ربنا اللي هننفذه فيكم,, وعامة احمد مشرفنا شوية
أه ونسيت أقولك المدام كمان مشرفانا هنا لغاية ماتيجي ومعاك بقية العصابة بتاعتك,, وقفل في وشي
عينيا برقت وقلبي كان هيقف,, مكنتش عارف اعمل ايه هبلغ المباحث اقولهم اني شريك في عملية نصب اتقلبت لجريمة قتل واهل القتيل خطفوا مراتي وواحد متبرع متبرعش,, المهم اني أخدت ال350 الف اللي وصلوني واتصلت بيهم واخدوني,, كانوا خاطفين مراتي واحمد في هنجر زي مخزن خردة مقفول
حاولت افهمهم بعد التشريفه المحترمه اللي عملوهالي من ضرب وتلطيش واستجواب ,, ان انا مليش دعوه انا راجل سمسار بجيب متبرعين لأي حد بمقابل ومعرفش الناس دي واول مره اتعامل معاهم,, دا انا حتى كنت واقف معاكم بره لغاية ما الواد احمد بعتلي رساله خوفت انكم تمسكوا في البردعه وتسيبوا الحمار زي ما بتعملوا دلوقتي ,, انا مالي ومال العملية,, طبعا مرضيتش أقولهم ان الراجل كان بيخلص اصلا وكده كده كان هيموت لأني حسيت أني بكده هستثيرهم اكتر,, بس هم كانوا مقتنعين ان احنا عصابة واحدة والشيء الوحيد اللي مبقيني حي اني اجيبلهم باقي التشكيل
عشان يخدوا حقهم من الكل,, وعرفت منهم ان الاتنين المساعدين بتوع الساحر تليفوناتهم اتقفلت ومش عارفين يوصلولهم
رموني للصبح مربوط جمب احمد ومراتي,,
أطمنت على مراتي وسألت أحمد... احكيلي ايه اللي حصل
قاللي..بص ياسيدي هم أدوني الحقنه عشان انام لكن ميعرفوش ولا انت حتى كنت تعرف ان انا الحاجات دي متاثرش في دمي من اللي بشربه واللي كنت وقفته في الفترة اللي كنت عملتلك فيها التحاليل من كام شهر,, المهم اني مكنتش نايم كنت مغيبب شويه بس,, لكن عامل نفسي نايم,, الشيخ ده قعد يقول تعاويذ وواحد من المساعدين راح رزع الشباك لما الشيخ نطق الجملة اللي نطقها بصوت عالي دي,, وقام مطلع من جيبه جهاز عامل زي الليزر وراح على بطن المريض وراح عامل فيه خط بالعرض,, تقريبا كده بيعمل زي علامه في الجلد,, بس تقريبا كان بيحرق,, وأكيد كانوا هيعملولي واحدة زيها عشان يقولوا ان الجن عمل العملية,, بس المفاجأة اللي حصلت ان المريض ساعتها شهق وقطع النفس,, تقريبا مستحملش الجو والحرق الخفيف اللي في بطنه والرعب اللي كنا عايشينه ده ,, وبعدين ما انت عارف انه كان مستني قضاه, فسمعت المساعد بيوشوش للشيخ وبيقوله دا باين الراجل فيّص,, قام الشيخ قاله... يا شوره منيله مكنش عارف يصبر يومين حتى,, طب يلا بينا نخلع,,... خوفت أفوق قدامهم يعملوا فيا حاجه,, فاستنيت اشوف هيهربوا منين,, كان في فتحة قد فتحة شباك مخفية ورا رسمة الشيطان عدوا منها فاستنيت لما طلعوا ورحت طالع وراهم كانت بتودي على سلم خلفي للقصر نزلت من عليه كانوا قدامي راحوا ركبوا العربيه بنت ال... أم صوت ناعم دي,, ومشوا وانا فضلت اجري وراهم لغاية ماطلعت بره عاللى الطريق الفرعي المتسفل ورحت باعتلك الرساله,,
قلتله... بقا يابن ال... متبعتليش الرسالة الا بعد كل ده
فقاللي... انا مكنتش في وعيي كنت بجري ببدلة العمليات والتليفون زي الاهبل,, المهم اني روحت,, خدني ابن حلال في عربيه ملاكي من عالطريق الرئيسي والصبح لما نزلت عشان اجيب سجايري كانوا راصدني,, تقريبا كان في ورق ليا في هدومي اللي في الاوضه
بس والمصحف ما وزيت على مكان بيتك
كان واضح انه بيكدب في المقطع الاخير خاصة مع العلامات اللي واضحه في وشه
وعرفت ان الجماعه التانيين تلفوناتهم اتقفلت واختفوا, فص ملح وداب
اقنعت اهل الميت أنهم لازم يساعدوني عشان نعرف نوصل لباقي العصابة على امل ان خلال الفترة دي,, يكتشفوا اني مليش ذنب,, خبرتي في المجال ده بتقول أن مادام وصل للنصابين دول علم أن في حالة خلصانة في المستشفى دي يبقى أكيد ليهم عين فيها,, العين دي بتتصل بيهم,, فيقوموا ينصبوا شبكهم ويدخلوا دخلتهم,, كان طرف الخيط ده هو اللي هبدأ منه,, المستشفي دي كان ليا فيها اتنين حبايبي ممرضة واداري,, كانوا بيحدفوا عليا شغل,, القصة أني وصيتهم يعرفولي مين اللي بيروح قسم ملفات مرضى الكبد اللي في مرحلة التهيئة لعمليات الزرع ومبيسألش الا على الحالات الخلصانه واللي ممنهاش أمل,, بصفه دايمة ومتواتره
وراضيتهم مراضيه كويسه,, بس كان شرطي أن الممرضة نفسها اللي في قسم الملفات متحسش بحاجة
يوم في التاني مع تعنت الممرضة دي في السؤال ده بالذات مع صاحبتنا اللي بعتهالها وكل ماتحاول تقربلها من الموضوع من بعيد تصدها على الرغم من ان الحاجات دي ممكن تبقى دردشة ممرضات,,كانت تسألها مثلا... مين اللي قارفك طلبات واستفسارات يابت يا هند من الدكاتره بخصوص الملفات ؟؟
..تقولها الدكتور فلان بتاع التخدير والدكتور علان بتاع الباطنة والجراح الفلاني,,
دول كلهم طبيعي انهم يسالوا عن الملفات,, شغلتهم
...فكانت لما تيجي تسألها في وسط كلام كتير...ومين بقا من التمريض والفنيين والاداريين بييجي يسالك؟؟
تروح قافلاها في الكلام وتلف وتدور,, ومن ملابسات تانية كتير عرفنا انها هي نفسها اللي كانت دليلهم,,
وشقطناها في يوم وهي خارجه من المستشفى ومن اول قلمين اعترفت باللي عندها,, واقسمت بالايمانات المغلظة ان دي اول عملية تعملها معاهم,, المهم عرفنا منها المساعد اللي كان أسمه فتحي اللي بيحدف على أهل المريض ناس يوقعوه وقفشناه,,
وبعد ما كيفناه على الاخر مطلعناش منه بمكان ابراهيم والساحر
كان بيقول أنه ميعرفش لابراهيم ده مكان ولا الشيخ  ومبيشوفهمش الا يوم العملية في القصر المهجور,, وانه غلبان طبعا ومغلوب على امره وشغال معاهم اما هم الاتنين اللي في ايدهم كل حاجه كان بيقول انه بيبلغ الشيخ ان في زبون والشيخ بيبلغ ابراهيم ان في عملية فيقوم ابراهيم يظبط متبرع من خلال سمسار,, ولو حاول أنه يخلف اسلوب الشغل هيفهموا على طول ان في حاجه غلط وان في حد من ضحاياهم السابقين او الحكومة وراه واحنا كمان كنا مايلين للرأي ده لازم نوقعهم بنفس الاسلوب عشان يقعوا كلهم مره واحده
طبعا خليناه يظبط لعمليه كل دا وهو تحت ايدينا وقلناله يفهمهم انها لازم تكون في اسرع وقت,, وعشان اثبت حسن نيتي مع اهل الميت,,هم كانوا رافضين يدفعوا جنيه تاني طبعا فرحت مع واحد من عياله جبت 800 الف جنيه من حسابي انا,, اللي هيخدهم فتحي يحولهم 350 الف لابراهيم عشان يظبط المتبرع,, و450 الف للشيخ حق ايده ,, كان طعم كبير اوي بس لازم ادفع عشان افلت من ايديهم ومن قضية القتل اللي كنت هبقى شريك فيها
ورجعت ربطوني تاني جمب احمد والمدام  
عدى ييجي ست ساعات ومحدش دخل علينا, قعدنا نحاول نفك في بعض وطلعنا ملقيناش حد,, كلمت ارقام ولاد الميت كلها اتقفلت
اول حاجه جات في بالي كلمت الممرضة اللي كانت عطت رقمي لابراهيم في الاول خالص وسألتها على الحالة اللي كنت سألتها عليها في الاول,, قالتلي فعلا الراجل اللي خد رقمك مني ده كان جالي على انه شغال مع اهل الحالة دي,, زي ما قالك بالظبط كنت بشوفه بيقف معاهم احيانا وسألني على سمسار في الخباثه وقلتله رقمك وبعدها انت مكلمتنيش تاني وفعلا الحالة اللي كانت عندي بعدها اتنقلت مستشفى تانيه كانت جات الاسعاف وخدتها ومعرفش حصل معاها ايه قلت اكيد انت هتظبطلهم متبرع في المستشفى التانيه دي طالما لضموا معاك
جرى الفلاش باك على راسي... [انا شغال معاهم] اللي قالهالي ابراهيم في اول لقاء,,,عشان هيبقى اسمه مختلف عن اسم الحاله,, العربية الكيا الاسبورتاج,,
دلوقتي فهمت,, ابراهيم والساحر وفتحي والمريض وعياله الاتنين هم اللي عصابه ونصبوا عليا في 800 الف جنيه
خطه محبوكة ابراهيم لضم في المستشفى مع الممرضة اللي شغاله في ملفات حالات الكبد اللي في فترة التهيئة ورضاها وفعلا كلامها كده انها اول مره تشتغل معاهم حقيقي.. وعرف منها بعد كده ان في حاله تعبانه وهتتنقل مستشفى تانية,, كان بيروح يقف يدردش مع اهل الحاله دردشه عادية بأي مدخل كأنه قريب لحالة تانية في المستشفى لا وممكن كمان بعد الدردشه يدخل يطمن كمان,, وبعدها سأل الممرضة اللي تبعي على سمسار وعارفين اننا كسماسره مبسوطين ومعانا قرش,, جالي وقاللي مكان روحاني وانا اتاكدت ان في حالة عيانه وبتموت وهتتنقل بعد ما اهلها فقدوا الامل, وايه يعني ما ياما ناس بتفقد الامل في مستشفي فتنقل لمستشفى تانيه,, لعبها عليا صح,, قاللي مكان روحاني واغراني بالفلوس المقدم,, وكان طبيعي ان يوم العمليه اوصل الاول واترعب وميجيش في بالي اني اتصل بالممرضة اتاكد ان الحالة دي هي اللي طلعت في اليوم ده,, سواء اترعبت ولا لا انا كنت اديت الامان خلاص وقابض فلوسي,, ويمكن كانوا مظبطين العمليه على يوم خروج الحالة الحقيقية,,
يدخلوا الاوضه عند الساحر وميخدروش احمد المتبرع اصلا ويعملوا عليه الفيلم ده ان الراجل مات ويهربوا وانا اهرب انا كمان,, ممكن تكون كانت مسبوكه اني اتقفش في ساعتها ومهربش اصلا بس احمد اللي هربني برسالته  
وبعدها يدخلوا يشيلوا الميت اللي مماتش ويكملوا عملية النصب عليا وادفع زي الحمار 800 الف عشان اهرب من قضية قتل ونصب اتعملت عليا
ومينوبنيش غير الجنية اللي بتطلعلي كل ليلة في الاحلام بعبايتها السمره وليلة مرعبه عيشتها
تمت.... 😍
بقلم عبدالفتاح عبدالعزيز