قصة سري مغلق (الجزء الثاني)

سري مغلق
الحلقة التانية
....أفتح أنا سيد,, رحت وقفت ورا الباب وانا برتعش مش ملموم على اعصابي  كمية اندهاش وخوف وهلع محسيتهمش قبل كده,, قلتله...عايز ايه يا سيد أرجع سطوحكم لو مرجعتش هتصل باخوك
...كان بيتكلم بصوت واطي أوي.. افتح لمصلحتك,, متخافش احنا بقينا في مركب واحد,,, كان داير في خيالي أنه عايز يقتلني زي ما حاول يقتل أبوه كنت بفكر أصرخ ولا أتصل بحد من أخواتي
لقيته بيقوللي...أنت أخترقت الحُجُب وانا عايز الحقك قبل ما يبقى مصيرك أصعب من مصيري,, قلت في دماغي هو في أصعب من مصيره,, دا عايش زي الحيوانات تقريبا,
... هفتح,, بس هفتشك يا سيد قبل ما تدخل عندي
...افتح ياعم وفتشني زي ما أنت عايز
ساعتها فتحتله فدخل بسرعه كان خايف حد على الاسطح اللي جمبنا يشوفه ورفع ايديه وقاللي...فتش

فتشته بسرعه كنت خايف يكون مخبي سكينة ولا اي حاجه يقتلني بيها بس طلع معهوش,, هو ك جسم ميتخافش منه خاصة أنه بقا هزيل جدا وعينيه مبرقه من بعد ما اتحبس حبسته دي
قعد على طرف السرير وسحبت كرسي المكتب وقعدت قصاده,, كانت راسه فيها هزه كده بس هزه خفيفه لفوق ولتحت وايديه فيها رعشه,, تقريبا دا بقا العادي بتاعه,, فقاللي...أنت عملت أيه؟؟
لغاية دلوقتي مكنتش مترجم ازاي سيد بيتكلم طبيعي وبيقدر يتواصل مع الناس بس فهمت هو يقصد أيه بسؤاله,, ماهو مش هيسألني عالميدترم يعني أكيد على البلوه اللي أنا فيها,, فحكيتله على حكايتي,,فزوا شفايفه بعلامة الأسف مع هز لراسه يمين وشمال وقاللي... انت غلطت نفس غلطتنا أنا وحسام وجمال,, فهمت أن حسام وجمال دول أصحابه اللي ماتوا غرقانين فقلتلو كانت ايه غلطتكم؟؟
قاللي أحنا كنا تلاته مبنفارقش بعض,, كنا دايسين في كل حاجه مع بعض,, خروجات, رحلات, حشيش, كحول, كل حاجة,, لغاية ما وقعنا في اللي سكته رايح مفيهاش جاي
عدلت نفسي على الكرسي وقلتله.. اللي هو؟؟
قاللي..جايلك في الكلام اللي محدش سمعه ولا عرفه قبلك,,
لما كنا في مطروح في السنه اللي قبل سنة الحادثة قررنا نطلع في الخلا يوم بليلته,, كنا رايحين نعمل كامبينج ,, بعد ما تقطع مسافه على الدولي الساحلي اتجاه السلوم,, بتسيب الطريق وتنزل الصحرا وتبعد لغاية ما تبقى في الليل مش شايف نور, وتعيش بقا حياتك,, طلعنا بعد العصر نصبنا خيمتين وظبطنا قعدتنا وشوينا عالفحم وأكلنا ورلّينا وشربنا ورلّينا تاني وتالت, وسكرنا ورقصنا على اغاني شعبي,, ولما همدنا وقعدنا جمب النار في الليل ,, كنا بنحس بالعفاريت حوالينا,, خيالات في الافق المظلم البعيد بتجري أو بتطير أو بتزحف عالارض عيون باينه في الضلمه كأنها بؤبؤين نار اصوات وشوشه في ودانك ,,كان احساس مخيف بس كان أحساس فوق الخيالي متعرفش بقا هو السُكر والجو والضلمة اللامتناهيه ولا كانت عفاريت بجد,,
أنت عارف أقوى أحساس في الدنيا احساس ايه,,

قلتله... ايه؟؟   فقاللي... الخوف,, الرعب الحقيقي,, هرمون الادرينالين من أقوى هرمونات الجسم,, هرمون الحفاظ على الحياة,, وانت خايف قواك بتضاعف ممكن تعمل حاجة جسمك بفسيولوجيته الطبيعيه ميقدرش يعملها,,احساس لذيذ وليه نشوه,,بيوت الرعب روايات الجن وما وراء الطبيعه, افلام الرعب والدم, دا نوع جديد من الادمان في وقت من الاوقات هيسبب كوارث لو متشافلوش حل, بص حواليك وشوف النهاردة الاقبال على افلام الرعب وعلى أدب الرعب,, تعرف كام واحد حاول يقرأ تعاويذ,,,  قلتله...اعرف نفسي,,
فكمل كلامه... المهم عشان متفلسفش عليك كتير,, قضينا ليلتنا ونمنا في خيامنا وصحينا الصبح رجعنا مطروح ,, ومحصلش حاجه غريبه بعدها,, في السنة التانية رحنا نفس المكان بس كنا في ليلة 14 من الشهر العربي منظر القمر في الصحرا يهوس,, وكررنا نفس الليله بتاعت السنه اللي قبلها بس المرة دي تقلنا العيار شويه,, وشربنا لحد ما سكرنا احنا التلاته,, جمال كان أكتر واحد شرب وكان ضايع تقريبا,, فقال أنا معايا كام ورقة بي دي اف كلهم تعاويذ تحضير على التليفون, ما تيجو نقرأ تعويذه يمكن يطلعلنا تلت جنيات حلوين بدل الخيالات اللي حوالينا دي وقعد يضحك أوي ,, لقيت حسام مشجع الموضوع وقال هيحصل ايه يعني أكتر من اللي بنشوفه,, كانت قناعتهم أن دي حاجة هتعلي المود ومش هيحصل حاجة, أما أنا فكنت رافض وقعدت أقولهم دا كله تخاريف وكلام فاضي قالولي مادام تخاريف تعالى,, شدوني من ايدي وقعدنا حوالين النار,, وقرأناها,,محصلش أي حاجه بعدها,, الخيالات هي هي وكل حاجه زي ماهي,, الحاجة الوحيده اللي حصلت بعد ما خلصنا قراية,, أن كلنا اتاوبنا [تثائبنا] واحد بعد التاني وكان اللي بيتتاوب بينام بعدها بشوية في مكانه,,

قطعت انا كلام سيد بأني اتاوبت فقاللي... هاتلي كوباية وحط نصها سكر ونصها ميه ودوبهالي ,,,رحت أعمله اللي هو عايزه وهو جمبي و بيكمل حكايته كان بيتكلم بمنطقيه وتلقائيه مش متناسبه مع التفاتاته شمال ويمين وفوق وتحت ومع رعشة أيده وراسه
وكمل وقال... نمنا احنا التلاته بعدها في اماكنا حوالين النار وحلمنا نفس الحلم كان حلم واضح كأنك لامسه,, كل واحد فينا شاف نفسه في مكان مظلم بس فيه نور خافت,, كان زي جبل بركاني خامد من الاف السنين وانا جواه ببص على فوهة الجبل البعيده شايف فوقها القمر, هو اللي عامل الاضاءة الخافتة,, فضلت معلق عينيا عليه متشبث بالنور اللي بيعني الامل الوحيد في عز الخوف الدامس,, لغاية ما جات سحابة سوده غطته وعم الظلام وفلت آخر خيط أمل,, ظلام دامس مكنتش شايف ايدي فيه,, ساعتها اتلفت حواليا لقيت كهف او نفق جوه الجبل جاي منه بصيص نور وفيه خيالات على جدرانه بتتراقص مشيت ناحيته وانا مرعوب لقيت نار وتلاته قاعدين حواليها زي ما كنا قاعدين,, قربت اكتر لقيتهم احنا,, بس واقف ورا كل واحد مننا شيطان بقرن واحد هيئته من دخان ومقرب راسه من راس اللي واقف وراه وخياله بيتراقص على جدار الكهف ومجرد ما بنخلص التعويذة بيدخل الشيطان اللي فوق كل واحد جواه من فمه وهو بيتثائب,, وتختفي الخيالات,, قمنا احنا التلاته  من نومنا مفزوعين واحد ورا التاني كان الصبح شقشق مكناش نمنا بتاع ساعتين,, فرجعنا على مطروح وكانت الدنيا بدأت تتغير معانا ميه وتمانين درجة من النقيض الى النقيض,, انا عن نفسي دخلت في حالة أكتئاب وزهقان ومكنتش عايز اتكلم مع حد ولا أشوف حد,, جمال كان اسرع واحد تاثرا فينا,, من تاني يوم لما روحنا الشاليه بتاعنا كان بيشوف حاجات ويشاور عليها وهي مش موجوده,, كان يتخض جامد ويبان على وشه الفزع زي ما كنا قاعدين في البرنده ولقيته بيقوللي...أضرب التعبان ده,, وقام رجع بضهره عند بابها وهو مبرق عينيه وبيرتعش,,انا اتنفضت من مكاني من منظره وقولتله... فين التعبان ياجمال ,, قاللي... تعبان كبير اهوه جاي بيزحف علينا من البلكونه,,...

قيس على كده بقا,, غربان كان يداري وشو عشان متخربشوش وكلاب وخفافيش واشخاص غريبه وظلال وكان دايما حاسس أن حد مراقبه بيتلفت وراه بصفه دايمه,, وبيسمع أصوات خطوات وخربشه على البيبان,, كان يدخل ينام في أوضته,, نسمع صواته وصريخه نجري عليه ونقيد النور كان يتفزع  من دخلتنا عليه  ويقعد يقول سيبوني أبعدوا عني ابعدوا عني وهو مكور نفسه في السرير,, حسام بردو كان بدأ يظهر عليه التأثر أكتر مني وأنا كمان بدأت أحس بحاجات زي كده بس حالة جمال كانت مخليانا ملهيين فيه اكتر من نفسنا ,, مكناش عارفين هيرجع لأهله دا ازاي,, لكن في اخر يوم لينا في مطروح وقبل المغرب بشوية كنا عالبحر,,قلنا نخده ونفك زهق يمكن يفوق,, كنت أنا وحسام بنشتري درة مشوي,, فجمال غفلنا وطلع جرى على البحر على ما وعينالو كانت  الميه وصلت عند رقبته واحنا لسه عالشط نزلت أنا وحسام وراه  جري,, كان دخل في الغريق وهو مبيعرفش يعوم,, كان رايح ينتحر,, كان يومها السحب [جذر البحر] عالي جدا كان بدأ يطفو ويغطس لما حسام وصلو فأتشعلق فيه وبقا السحب بيخدهم سوا وهما بيطفو ويغطسوا وانا شفت المنظر رجعت,, المنقذين ملحقوهمش والبحر اخدهم وانا طلعت أتصلت بأهلهم من تليفون حد عالشط بعد ماتليفوني باظ في الميه,, الجثث طلعت بعد 12 ساعه منفوخه جدا كان جسمهم ازرق وبهتان وشعرهم كله منحول,, كان منظر صعب جدا خصوصا مع وصول اهلهم ,,  وبكده كان أنتهى عذابهم,, اما أنا دخلت في حالة اكتئاب حاد مقرونه بزيادة ظهور ا الاعراض عليا بعد ما رجعت مع أهلي اللي كانوا جم على مطروح لما عرفوا باللي حصل اللي هو الغرق بس,, كل اللي كان بيعمله جمال بدأت أعمله وأفظع كمان,, بس الميول الانتحاريه كانت قليله,, متهيألي من كمية الرعب اللي حصلتلي من منظرهم قدامي وجثثهم منفوخه,, حادثة أبويا مثلا انا مكنتش بحاول أقتله أنا كنت بحاول أحميه من تعبان كان طالع على سريره وهو نايم في الليل,, مسكت السكينه وجريت بيها عليه, لو كنت هموته كنت غرزتها بس انا جرحته بس لاني كنت بضرب التعبان بس هم أفتكروني أني بقتله,, الكل كان فاكر أني مصدوم من موت أصحابي وفترة وهتعدي,, لكن الحقيقة كانت أصعب,, مع الوقت قرروا أنهم يعملوا فيا زي ما انت شايف,, زي كلب مربوط عالسطوح,, ودا كان أسلم حل,, أتعلمت بعدها أسيطر على مخاوفي وهلاوسي اللي بقيت بشوفها نتيجة المس اللي حصلنا,, اتعودت عالخيالات والوشوشات وصوت الصراخ وصوت الاقدام والخبط,, أتعودت على التمثل في صور الحيوانات,, لكن كل ده كان بسبب الانعزال وقلة الاختلاط بالناس وقراري بأني أظهر فاقد للنطق عشان أي حاجه هنطقها هظهر كمجنون, أما لو نزلت للحياة تاني أكيد هنتحر

وأول ما شفتك النهارده عرفت أنك ممسوس كانت أول مره أشوف هيئتك بالسواد ده ,, بعد سنتين قضيتهم لوحدي أكتشفت ان حالتنا دي زي اللي رقص عالسلم لا اللي فوق شافوه ولا اللي تحت سمعوه يعني ولا هو حاول يتواصل فعلا بصورة حقيقية مع الجن او يتعلم السحر ويبقى مشعوذ أو ساحر ودي قصة كبيرة جدا وليها طقوسها وقرابينها وده شرك بيّن,, ولا فضل طبيعي,, احنا اللي بينطبق عليهم بالظبط نص الآيه... وأنه كان رجال من الأنس يعوذون برجال من الجن فزادوهم رهقا,, اللي بيحصل ده رهق بمعنى أذى منهم لينا,, لأننا أستعذنا بيهم,, التمثل وسحر الحواس ده كله أذى مفيش منه أي نفع,, هم مش سحرة فرعون سحروا أعين الناس فشافوا الحبال والعصيان تعابين أمتلأ بها الوادي
السيد خلص كلامه كنت أنا في قمة ضياعي خاصة بعد ما بدأت فعلا أحس أني بشوف قزم بيظهر ويختفي في أركان الاوضه وأسمع صوت طفل جاي من تحت سريري وسيد لاحظ التفاتاتي
فقاللي.. الأمور هتبدأ معاك واحده واحده بالقدر اللي يتحمله عقلك ومتحصلكش سكته قلبيه,, ممكن تتجنن بس وغالبا مادام هي مجموعه وتنظيم مش هتبقى زي أعراضنا هتبقى أقل وطأه عشان تفضلوا عايشين منصاعين واكيد ليهم منكم غرض
كان هاين عليا اقوله لا فيك الخير يا سيد والله, طمنت قلبي الله يريح قلبك أو أرميه من عالسطح وأخلص, فقلتله..والعمل يا سيد
فقاللي قدامك حل من اتنين...يا اما تعمل زيي وتتربط عالسطح,, يا اما تعمل زي جمال وتنتحر,,,قلتله...مفيش تالت؟؟

فقاللي..في تالت ورابع بس صعبين,, قلتله... الحقني بيهم,,
قاللي التالت ومنصحكش بيه أنك تخاوي بجد يعني تكمل السلم ومتقفش عليه,, يعني تقدم قرابين وتعمل طقوس لغاية ما تخاوي,, ساعتها عقدتك هتتحل,, وأكيد كل العيال اللي في المجموعة دي متعشمين بكده,,بس صدقني لو شافوا حلمة ودنهم لا حد هينولك ولا هينولهم السر ولو فرض واحد في المليار نولتوه, كده تبقى  خسرتها دنيا وآخره وكفرت بالله
قلتله...طب والرابع؟؟ فقاللي الرابع ده ينفع في حالتك أنت مش في حالتي,, لأن أنت أو المجموعة اللي أنت ألتحقت بيها عارفين الجني اللي بيستعيذوا بيه ,, وأكيد عارفين طريقة خلاصك أما أحنا رحنا رمينا تعويذة في الصحرا أرض الجن 
كنت عايز أقوله أوعى تنزل الشارع يا سيد عشان لو حد سمع كلامك ده مش هيطلعوك من مستشفى المجانين طول عمرك
سابني سيد ومشى وطلع على سور سطحنا ومنه أتعلق في سور سطحهم وراح اوضته,, ونزلت أنا عشان أنام تحت في شقتنا جمب أخواتي لأني مكنتش هقدر أنام لوحدي بس وانا نازل عالسلم لقيت جاتلي رسالة بتفيد أجتماع للمجموعه بتاعتنا اللي على جروب المسنجر المكونه من خمسين فرد بعد يومين,, في ليلة أكتمال القمر
يتبع,,,,
بقلم عبدالفتاح عبدالعزيز