ادانة قاتل برئ (الجزء الثالث)

#ادانة_قاتل_بريء
الحلقة الثالثة
بقلمي

بعد ما فتشنا الشركة حته حته وفتشنا شقة الطلبه والسطح والاوضتين بتوع البواب,
أقتحمنا شقة الجار عشان معرفناش نوصل لزوجته لغاية وقتنا هذا وأكتشفنا أن فعلا كالون البلكونه مفتوح وكأن الباب كان مفتوح بس الهوا اللي ردو, كمان كانت الحاجه اللي في طريق الباب متشاله أو منقوله في جنب, حتى الستاره كان مربطها مشدود في جنب بس الهوا هو اللي حركها, وكأنه فعلا نط منها لبلكونة الحادثة
بس لا لقينا أثر لشنطه ولا لقينا دليل جديد في القضية
شوفنا تسجيلات الكاميرات اللي ممكن تكون جايبه قدام العماره مفيش شيء غريب أو يسترعي الأنتباه
أخدنا الطالب اللي اسمه اسلام وسبنا صاحبه واخدنا سيد ابن البواب وجبنا جمال السكرتير عشان نكمل تحقيقات في المركز باعتبار ان دول هم اللي مشكوك فيهم ووكيل النيابة رزع كل واحد فيهم تلت أيام على ذمة التحقيق دا قتل مش هزار, لازم حد يلبسها والا انا بقا اللي البس طرحه وأقعد في البيت أو أروح أنفخ الكونترباص في موسيقى الشرطه
على الساعة 12 الضهر خدت موافقة من المستشفى باستجواب الزوجة, كل اللي طلعنا بيه منها انهم وهم نايمين سمعت صوت حركة في الصالة فصحّت جوزها فطلع بره وفي ايده سكينه كانت في أوضة النوم ووقفت هي ورا باب الأوضه من الرعب, ماهي الحاجات دي مفيهاش لايدس فيرست, فيها أتقدم يا أبو الرجاله, المهم أنها سمعت خبط وصوت جوزها وهو  بيقع عالارض فطلعت تجري على بره فضربها الحرامي ضربه على وشها محستش بالدنيا واغمى عليها, صحيت تاني تقريبا بعدها بدقايق لقيت جارهم ده مقتول هو كمان وصوت الحرامي كان جوه بيقلب في الأوض قامت تتسحب من غير ما تصرخ عشان تعرف تهرب جه من وراها وغرز السكينة في ضهرها,
بعد كده جبنا المتهمين التلاته واحد ورا التاني الاول كان سيد ابن البواب,
....في البداية كده يا سيد وقبل أي حاجه أنا ممكن أطلب يحللو دمك الحلو ده واخبطك سنه حبس عشان التعاطي, أنت بتضرب أيه يا......؟؟ ..أبترل ولا أوميترل ولا أكس أي ولا أيه ظروفك ولا ملكش في الغشيم وبتخد الحنين ترمادول وتراما اس جاك والحاجات الحلوه دي
عامة مش موضوعنا,كنت فين وقت الحادثه يا حلو؟؟
أقسم بالله كنت نايم عند ستي أم أمي يا باشا, حتى يومها أصحابي جولي وكنا سهرانين عندها عشان هي بتتونس بينا, أصلها عايشه لوحدها وبتفرح لما أبويا يكرشني وحالتها تصعب عالكافر وممكن أقولك أسماء أصحابي كلهم
وكنت بتطلع شقه البشمهندس أحمد دونا عن باقي السكان ليه ؟؟
من غير لف ودوران كده ياباشا,عشان مراته كانت عاجباني أوي مع أنها مش أحلى واحده في العمارة بس كل فوله وليها كيال, كنت بطلع عشان أشوفها بس, أو أيدي تلمس في أيدها وأنا بديها الأكياس, أقسم بالله ما سرقت من هناك قشاية ولا من الشقة اللي جنبها ولا قتلت حد, ميغركش ياباشا التشرد اللي احنا فيه ده, دا كله عالفاضي وربنا 
....طب وال 200 جنيه اللي كانت فوق الجزامه يا ......؟؟
...أه دي سرقتها, كانت الحالة ضنك ومعاييش أجيب سجاير فرط حتى, بس مكنتش عالجزامه كانت واقعه عالارض بعدين ال200 جنيه مش هتفرق معاهم دا جوزها بيقبض ولا 20 الف جنيه في الشهر
قلبت الواد كتير في الكلام مفيش فايده, الواد ماسك في الكلمتين بتوعه... أقسم بالله ما سرقت ولا قتلت
رجعلي عماد تاني ... احساسي يا باشا ان الواد ده مش هو اللي عاملها..عارف لو كان أنكر ال 200 جنيه كنت قلتلك هو, الواد باين على وشه
جبت السكرتير جمال, سألته مطلعتش على طول يوم الحادثه ليه رد أنه كان بيتكلم في التليفون وحاطط السماعات في ودنه حتى المكالمه كانت متسجله, عنده برنامج تسجيل وبتاع , مكالمات زفت على دماغهم دا المتجوزين مبيقولوش الكلام ده وأكيد نقدر  نتأكد من الشركة من صحة وقت المحادثة وحتى لو ليه شريك هو اللي بينفذ محدش هيبقى شريكه بيقتل وهو بيعطف ويلطف في التليفون كده
فسألته عن ال200 ألف دولار
فقاللي... أقسم بالله ما أعرف عنهم حاجه يا سعادة البيه, هو أه بيبقا معاه شنطه بس أنا أوفيس بوي مش سكرتير زي العماره كلها ماهي فاهمه هييجي يقول لأوفيس بوي أنا شايل 200 الف دولار
جبنا الأخير الطالب أسلام, أولا الكلام بتاع أستاذ حسين بتاع قبل الحادثه بربع ساعه سمع صوت عندهم ميدخلش الدماغ, يعني هو سمع تكة الباب اللي هتبقى بهدوء, عشان دا حرامي نازل ومش هيسمع العركة اللي كانت تحت, وميطلعش الا على صوت مرات الدكتور اشرف بعد ما الحرامي يخلص, ثانيا بينه وبينهم شكوى كيديه, ثالثا لو سيد يعرف يسلك الشنطه او السكرتير فدول ميلحقوش لانه بمجرد الكارثه ما حصلت كانوا موجودين محدش منهم ساب العماره والشنطه مالهاش اثر عندهم
نطلي عماد...مايمكن كان معاهم شريك تالت غير الاتنين اللي مسافرين عند اهلهم وهرب من عالسطوح او من بوابة العمارة
نفضت لعماد وكملت مع اسلام اللي كان عيل ينفع معاون مباحث أحسن مني, الواد عنده ثبات أنفعالي غريب متعرفش تقرا في سطور وشه اي انفعال او تعبير, اللي زي ده عمره ما يبقى حرامي, دي كانت قناعتي بيه, بس بردو حاولت أهزه
وطبعا أتمسك بكلامه..كنت بذاكر وسمعت صريخ  
بعد تحقيقات طول الليل مع التلت شباب موصلناش لاي حاجه مفيش لحد منهم بصمات في الشقه سلاح الجريمه سكينه مقتول بيها الزوج والجار اللي مش عارفينلو اي محل للاعراب, ومطعونه بيها الزوجه وفضلت في ضهرها لغاية ما راحت بيه المستشفى
أيه ده ؟؟
ازاي فاتتني دي؟؟
البحث الجنائي مضطلعش على السكينه
يتبع