يكفي ان يحبك قلبها (الحلقه ١٧)❤❤
يكفي أن يحبك قلبها
بقلم_ولاءيحيي
الحلقه (١٧)
ميرنا فضلت مستنيه فايز...... بس الوقت اتاخر والمزاد هيبدأ.... وهو مجاش...... وبقيت مضايقه ومخنوقه انها هتدخل المزاد ......وهتقضي اليله مع الهيدفع فيها اكتر ..... سمر قربت منها
سمر بتريقه : متزعليش يا قطه هتتعوض
حازم بغضب :يلا يا حلوه منك ليها أوقفوا في الصف
ناني : يلا يا ميرنا اطلعي انت الاول
تطلع ميرنا وتوقف .....وعنيها كلها كره وغيظ....... ولسه ناني هتبدأ المزاد.... بس سمعت جرس الباب واتفتح ودخل فايز...... اللي اول ما شاف ميرنا واقفه في مكان العرض.... الغضب ظهر علي وشه ...... وميرنا اول ما شافته فرحت بس خبت الفرحه عن ملامحها وظهرت ملامح الحزن والبراءة والدموع المصطنعه وسمر ضحكت اول ما شافته وفرحت....... وتاكدت ان خطيتها هتتنفذ بسرعه
ناني راحت لفايز باستغراب وقلق : فايز باشا ايه المفاجأه دي
فايز بغضب : بدأ بدري ليه يا ناني
ناني بخوف : معرفش انك جي يا باشا.... معادك اول الشهر ....لو اعرف انك هتشرفني الليله ماكنتش ابدأ
فايز يطلع الشيك ويديه لناني : ميرنا معايا
حازم بضيق : احنا لسه هنعمل مزاد.... ونشوف من الهياخدها
فايز بغضب صوة عالي : انا قولت ميرنا معايا
ناني تخبط حازم في كتفها :معك طبعا يا باشا..... انزلي يا ميرنا مع فايز باشا
يقرب فايز من ميرنا ويمسك ايدها......وينزلها وهو شايف الدموع والخوف اللي رسمهم علي وشها .......وياخد ايدها ويدخل الفرندا .....مع استغراب الجميع ونظرت الحقد والغيره من البنات
فايز بغضب : ايه اللى طلعك المزاد
ميرنا بحزن مصطنع : كان دوري فطلعت
فايز مسك ايدها جامد بغضب وقربها منه : مافيش مزاد تاني ....انتي من الليله تخصيني انا وبس
ميرنا تبص في عينه ..... وهي عاوزه تمتلكوا اكتر لتوصل لخطيتها
ميرنا بابتسامه : يعني هتيجي كل ليلة
فايز بابتسامه : حتي لو ماجيتش ..... مش هتروحي مع حد غيري فاهمه..
ميرنا تبعد عنه بضيق : عندك ناني قولها انا مليش رائي هنا
فايز بنظره جريئه يقربها ...... ويبوسها جامد ..... فتبعد عنه وتقعد علي الكرسي.... وهو يفضل بصص عليها
ميرنا : هتفضل واقف كده
فايز بنظرة جرئيه : وهو احنا كل ليله هنقضيها هنا في الفرندا
ميرنا تقف وهي تصنع الغضب : اه سوري..... مهو مش معقول كل يوم تدفع فلوس كتير كده ....وماتخدش حقك اتفضل انا تحت امرك
فايز يقرب بضيق : وانا مش مش عاوزك علشان بدفع فلوس ....انا عاوزك علشان عاجبني ...بس كمان مش هلمسك اللي وانتي عاوزني وحبه تكوني معايا
ميرنا تبتسم ليه يغراء وتبعد عنه وتعقد : يبقي تصبر وتستحمل ...لاني عاوزه اكون ليك ... بس مش دلوقتي
فايز يعقد : نصبر بس مطوليش لصبر حدود
ويفضلو ياكلمه...... وميرنا تدلع وتزيد شوقه ورغبته فيها ..... وهو يتعلق بيها اكتر ....وكل شويه ينسي نفسه معاها اكتر ....بس هي ليها خطه وهدف.... رسمهم ليها الشيطان وعاوزه تنفذها
ويطلع النهار في الفيلا...... واليوم عماد هيروح يخطب هاله وكل مبسوط..... وبيتكلم وهم قاعدين علي الفطار
تقي بفرحه :انت هتجوز هنا واللي في البلد يا عماد
عماد ببتسامه : انا ليه شقتي في البلد ....بس شغلي هيبقي هنا في القاهره ...... فهشتري فيلا صغيره نعيش فيها هنا
شريف : طيب ما الفيلا اللي قدامنا بتتباع...... ايه رائيك تاخدها واهو كده نفضل جمب بعض
ماجده : ياريت والله....ابقي روح شوفها يا عماد ....ولو كويسه اشتريها...... اهو تفضلوا قريبين من بعض
عمر : الكلام لعماد بس يا عمتي .....هو ياخد الفيلا عشان يبقي قريب مننا ...... لكن حضرتك مش هتمشي من هنا وهتفضلي قعده معانا
عماد بضحك :ايه يا عم دي امي انا ... وهتعيش معايا
عمر يرفع حاجبه : دي امنا كلنا.....وجدة ساندي يعني احنا اغلبيه واكتر منك
ماجده بابتسامه : انا لا هعقد معاكم ولا معاه.... انا هطمن عليكم وارجع بيتي في البلد ....وانتم تبقي تيجوا تزورني
امل :و ليه يا ابله تعيشي لوحدك .....احنا عاوزين نفضل متجمعين سوا كلنا
ماجده : وانا نفسي افضل وسطكم..... بس البلد وبيتي وحشوني......عاوزه ارجع ليهم ولذكرياتي
ريم بابتسامه : احنا ممكن نبقي بين هنا والبلد يا عمتو ..... المهم منسيبش بعض....نعيش هنا وكل اسبوع نبقي نروح نغير جو في البلد
تقي بفرحه :صح كده ....احنا نبقي نروح كل اخر اسبوع البلد ونقضي الويك اند هناك
امل بابتسامه : ان شاء الله نجوز الولاد وكله هيستقر ..... ونرتب حياتنا..... المهم كلنا نفضل دايما نفضل متجمعين ومنتفرقش
ريم بابتسامه : اهو النهارده ان شاء الله نخطب لعماد...... وبكرا شريف .....
مايا بكسوف وهي بصه للارض : هو كلكم هتروحوا النهارده مع ابيه عماد ..... وانا هفضل هنا لوحدي...
شريف باستغراب : وتفضلي لوحدك ليه ...انتي هتيجي معانا
مايا بابتسامه وفرحة اطفال : بجد ياعني انتم هاتخدوني معاكم
عماد ببتسامه ونظرة حنينه : ايوه طبعا ... دا انتي هتروحي قبلهم كلهم ..... ولو العروسه معجبتكيش مش هخطبها
مايا بفرحه اطفال : اكيد هتعجبني اوي
عمر بابتسامه : طيب اجهزي عشان اخدك .....المول نشتري فستان حلو ...
مايا بكسوف : لا ميرسي مش عاوزه .... انا عندي
عمر بابتسامه : وانا عاوزك تلبسي حاجه جديده....علشان تبقي احلي واحده فيهم النهارده
ريم فهمت ان عمر عاوزها تغير طريقه لبسها
ريم تبص لمايا بحب : انا كمان هنزل معاكي .....عاوزه اشتري حاجه جديده ليه
هاجر : وانااااا اشتري فستان طوييييل
امل بضحك :كلكم هتشتروا فساتين جديده ....طيب في الفرح هتعملوا ايه
تقي بابتسامه :هنكسر الدنيا
عمر : طيب يلا اجهزو كلكم ..... عشان اوديكم واروح الشركه
وفعلا قاموا كلهم..... تقي وهاجر وريم ومايا رحوا مع عمر في عربيته .... وجريت هاجر وركبت قدام جمب عمر..... وتلاته ركبوا ورا..... وكل شويه ريم تبص لعمر ونفسها يرجع يكلمها..... وعاوزه تصالحوا بس مكسوفه ومش عاوزه تبدا بكلام ...... وهو فضل يكلم مع هاجر ويعكسها..... ومطنش ريم ....ودا كان هيجننها..... وصلوا المول ...... وراحوا لمحل كبير ......وريم وتقي فضلوا يختار لمايا لبس كتير اوي مناسب لسنها ومحترم ......ومايا كانت مبسوطه وهي حسه بهتمامهم بيها........ وماكنتش مهتم بشكل اللبس الا انه مختلف عن طريقه لبسها...... كان اللبس محترم ورقيق وشيك ......ومايا كانت حبه تغير من نفسها ......و تكون زيهم و يفضلوا يحبها ويدها الاهتمام...... اللي اتحرمت منه
ريم وهي واقفه معاهم ....... شافت صاحبه المحل بتكلم عمر..... وعمله تدلع عليه .....وهو متكنش مهتم بيها .....بس لما شاف ريم بتبص عليه وهي متغاظه ومضايقه.... بدأ يكلمها ويضحك ....عشان يغيظ ريم .... فريم رحت لعنده بضيق وغضب
ريم بعصبيه : عمر تعال شوف ال مايا اشتريته
عمر بابتسامه وهو بيبص لصاحبة المحل: مش مهم....انا عارف انكم هتختاره وهتجيبي المناسب ليها
ريم بضيق وعصبيه وهي بتبص لصاحبه المحل بغيظ : تعالي برده شوف....... واقف معانا هناك.....انت وقف هنا ليه اصلا
عمر يبتسم لغيرتها عليه : حاضر امري لله اتفضلي قدامي ( ويبص لصاحبه المحل ويبتسم) عن ازنك
ويمشي مع ريم اللي اضايقت منه جدا وغضبانه
ريم بضيق : ما تجيبها معانا ....شكلها عجبتك
عمر بيكتم ضحكته : هي مين دي يا دكتوره
ريم تقف قدمه بعصبيه : انت ايه حكايتك.... كل ما تكلمني تقولي دكتوره دكتوره
عمر بستهبال : هو مش انتي اللي طلبتي اني متكلمش معاكي تاني.....ولما اتكلم معاكي اتكلم رسمي وانا بعمل زاي ما طلبتي مضايقه ليه بقي
ريم بغضب : يعني ايه يعني.... هتفضل كده كتير
عمر بابتسامه : كده الهو ازاي
ريم متعرفش ترد.... وتتعصب وتضرب الارض برجلها بغضب وتمشي خطوتين .....بس تخاف عمر يرجع يقف مع صحابه المحل ....فترجع ليه بظهرها
ريم بغيظ : اتفضل قدامي علشان تشوف مايا
يمشي معاها وهو عمل يضحك..... ونفسه يحضنها ويخبيها جوه حضنه ....بس مستني يوم عيد ميلادها
مايا اشترت حاجات كتير اوي ...واخدها عمر راح علشان يحاسب....... وفضل يكلم مع صاحبه المحل ويضحك.....وريم كانت واقفه هطق وهتعيط من الغيظ..... وبعد ما خلصوا اخدهم وطلعوا ..... ووهم ماشين وريم مشيت لوحدها وهي مضايقه ومتغاظه ....فتكعبلت وكانت هتقع بس .. مسكة في واحد كان وقف جمبها.....وهو مسكها علشان متقعش
ريم بكسوف : اسفه ماكنش قصدي
الشخص بابتسامه :اسفه على ايه.. انتي كويسه حصلك حاجه
ريم تاخد بالها انه ماسكها من ايده.... فتبعد عنه بسرعه .... وطبعا عمر شافها .....وشافو وهو مسكها فضايق وتعصب ورح عليها
ريم بابتسامه : انا كويس الحمد الله متشكره جدا
عمر يقرب منها ويتكلم وهو متعصب : خير حصلك حاجه ( ويبص ليها بغيظ ) مش تاخدي بالك وانتي ماشيه
ريم تحس بغيرته فتنبسط وتستعبط : غصب عني اتكعبلت
عمر يجز علي سنانه : طيب اتفضلي قدامي....( ويبص لشخص اللي ساعدها ) متشكرين لحضرتك
ريم تمشي وهي مبسوطه.... فيقرب منها بغيظ
عمر بغيظ : امسك في ايد حد من البنات .....بدل ما انتي ماشيه تقعي وتسندي علي الناس .....وهم يمسكك ايدك
ريم تغيظوا : اتكعبلت غصب عني .....وهو كان زؤق ولحقني ....بصراحه شاب محترم
عمر بغضب : لا والله .....تحبي اروح اجيبلك رقمه انا في الخدمة
ريم تبتسم : لا متشكره..... شايلك للكبيره..... استاذ عمر عن اذنك
وتمشي وتبعد عنه وهي مبسوطه .....وهو هايتجنن..... يشتروا باقي حاجتهم وعمر يروحهم الفيلا
وبليل الكل يروحوا لبيت هاله..... ويكون في استقبالهم ابو هاله وعمها وخالها ومراته وابن خالها المهندس سليم
ابو هاله ببتسامه : اهلا وسهلا نورتنا
ماجده : دا نورك يا حج
ابو هاله يبص لريم : ازيك يا ريم يا بنتي.... وازي الحاجه فاطمه
ريم بهدوء : الحمد الله يا عمي.... وماما كويسه الحمد الله واقربت ترجع بسلامة
ام هاله : ترجع بسلامه ويتم شفها علي خير يارب ( وتبص لمرات اخوها ام سليم ) ريم ونعمه البنات .....من اول ما هاله دخلت الجامعه وهي وريم ونهي اصحاب واخوات ماشاء الله عليها ريم ....ونعمه التربيه
ام سليم باعجاب : باين عليها ....بسم الله ماشاء الله ....ربنا يحميكي يا حبيبتي
ريم بكسوف : تسلمي يا طنط ...ربنا يخليكي
امل بابتسامه : بصراحه التلات بنات ريم وهاله ونهي .....ونعمه التربيه والاخلاق
المهندس سليم اللي عينه منزلتش من علي ريم من وقت ما شافها ....وطبعا عمر كان واخد باله اوي وهيطق من الغيره
سليم: وحضرتك بتشتغلي يا دكتوره
ريم بكسوف وتبص للارض : ايوه....بشتغل مع هاله في نفس المستشفي
ام سليم وهي بتبص لسليم نظرة معينه : بسم الله ماشاء الله عليكي ادب واخلاق..... وجمال وتعليم .....عروسه كاملة ومكمله مافيش منك
طبعا عمر كان هيولع فيهم وشريف وعماد ....كاتمين الضحك
عمر يميل علي تقي اللي كانت قعده جمب ريم وريم شايفه وسامعه
عمر بغيظ لتقي وريم سامعه : قولي لدكتوره تتلم وتقوم تدخل لصحبتها ... بدل ما قوم اولع في سليم وامه
تقي تكتم ضحكتها هي وريم ..
ريم ببتسامه وتبص لام سليم : متشكره يا طنط ربنا يخليكي ( وتقوم تقف وتبص لام هاله) بعد اذنك يا طنط.... ممكن انا والبنات ندخل عند هاله
مامة هاله : ادخلوا يا حبيبتي هي في اوضتها
سليم عينه تفضل علي ريم وهي ماشيه ....وبيكلم مع مامته بصوت واطي.... وهي بتبتسم ليه.... وتفضل بصه علي ريم فعمر كان هيطق وبدأ يغضب
عمر بعصبيه : مش تكلم يا عماد في المهم
عماد بابتسامه ويبص لابو هاله : انا يا عمي يشرفني اطلب ايد الانسه هاله..... ويكون ليه الشرف لو حضرتك وافقت
ابو هاله : وانا يشرفني انك تكون جوز بنتي يا دكتور عماد ....انا لما سألت عليك الكل شكر فيك وفي اخلاقك....واهلك ونعم الناس والاهل .....وانا هكون مطمن علي بنتي وهي وسطيكم
ماجده بفرحه : علي خيرت الله..... احنا نقرأ الفاتحه دلوقتي والخطوبه وكتب الكتاب يبقوا الاسبوع الجاي..... والفرح بعد شهرين تكون هاله.... اخترت عفش بيتها علي زؤقها
ام هاله بصدمه : شهرين بسرعه كده
امل بابتسامه : خير البر عاجله والعريس جاهز
عمها : طيب مش نتفق علي الشكليات ....معلش يا دكتور علشان نعرف انتم عليكم ايه واحنا علينا ايه
عماد بابتسامه : انا مش عاوز غير هاله وبس..... وكل حاجه انا هجيبها..... وهتجهزه علي زؤقها
ابوه هاله : وانا مش هتاخر عن هاله بنتي وهجيبلها كل العاوزه ......انا الحمد الله ربنا رزقني .....ولازم اجهزها احسن جهاز
ماجده : حقك يا حج ....واللي عاوز تجيبه لبنتك هاته..... ماحدش هيقول هات ايه ومتجبش ايه
عماد بضيق : لا معلش يا ماما ....بعد ازنك ياعمي ..... حضرتك ممكن تحط لهاله فلوس جهزها في حساب ليها باسمها ..... بس انا حابب ان بيتي..... انا اللي اجهزه كلها ويبقي من فلوسي الخاصه
خال هاله : والله ونعم الرجال يا دكتور.... ماحدش بيعمل زيك كده دلوقتي
شريف بابتسامه : يبقي نقراء الفاتحه
ويقرأ الفاتحه..... وتخرج هاله وهي مكسوفه وكانت جميله ورقيقه...... و يخرجوا معاها البنات.... وريم تعقد جمب هاله وتبقي في النص بينها هي وام سليم فتقرب منه ام سليم وتفضل تكلمها..... وعمر كان قعد و هيتجنن
عمر يقوم يقف بغيظ : مش يلا احنا يا جماعه .....ونسيب العريس هو العروسه يتكلموا لوحدهم
ابو هاله : لسه بدري .....مستعجل ليه يا عمر يابني
عمر بابتسامه بيداري بيها ضيقوا وغضبه : الايام جايه ان شاء الله .....واحنا خالص بقينا اهل ....وهنتقابل كتير
ويقومه يقف و كلهم يقوفوا معاه علشان يروحوا
سليم بأعجاب : طيب ما تخليك انتي يا دكتوره ريم.... قعده معانا ....وابقي روحي مع دكتور عماد
وهنا بقي عمر ماقدرش يمسك نفسه......ورح مقرب من ريم ووقف جمبها
عمر بعصبيه: لا معلش يا بشمهندس...... خطيبتي هتمشي معايا.......مش هقدر اسيبها......اصل ورنا تجهيزات كتير علشان فرحنا قرب
ريم تكسف..... وتفرح جدا وتحط وشها في الارض..... والكل بقي عاوز يضحك علي عمر .....وسليم وامه واهل هاله..... اتصدموا لما عرفوه ..... ان ريم مخطوبه
ام هاله باستغراب : مبروك يا ريم.... مش تقولي يا بنتي... انا ماعرفش انك انخطبتي
امل بابتسامه وهي بتحط ايدها علي كتف ريم : اصل احنا لسه معملناش حاجه رسمي .....احنا كلمنا عمها ومامتها ......و مستنينهم لما يرجعوا بسلامه ان شاء الله .......وهنجوز ريم وعمر علي طول
عمر يبص بغيظ لسليم ..... اللي عينه مش نزله من علي ريم وفيها حزن
عمر بغضب : عقبالك يا بشمهندس
ينتبه سليم ويبعد نظره عن ريم : متشكر
عمر لريم بصوة واطي :ريم امشي قدمي واللي حبه اعمل جريمه النهارده هنا
ريم بابتسامه وبصوة واطي تغيظه : ريم كده من غير دكتوره ....مش قولنا نتكلم رسمي
عمر يجز علي سنانه بغيظ : امشي يا دكتوره قدامي... بدل ما اموتلك سليم وأمه
ويمشوا كلهم ويسيبه عماد مع هاله
.اهل هاله سابوهم قاعدين مع بعض ...... وقعدوا جمبهم بس بعيد شويه
عماد بابتسامه : مبروك عليه
هاله مكسوفه : مبروك علينا احنا الاتنين
عماد بهدوء : انا فيه كلام كتير اوي نفسي اقوله..... بس لازم استنا كتب كتبنا ....علشان تبقي مراتي ...ويبقي من حقي اقول كل الانا حاسس بيه ...... لاني عاوز ربنا يبركلي فيكي وفي حياتنا(ويبصلها بحب )هاله لو عاوزك تسالي عن اي حاجه او عاوزه تعرفي عني حاجه ....اسالي عن كل اللي في بالك ...... انا ليكي كتاب مفتوح
هاله برقه وابتسامة : انا عرفت حاجات كتير من ريم وصليت استخاره...... واكيد مع الوقت هعرفك وتعرفني..... انا بس ليه طلب عندك .....انا عاوزك لو عملت حاجه تضايق تقولي عليها في الاول .....وبرحه ومتزعلش..... لحد ما افهمك واعرف طبعك.... وبعدها اكيد مش هعمل اي حاجه تضيقك
عماد بابتسامه : متخافيش انا مش صعب .....ولا عصبي وسهل جدا وبسيط ........وانتي اي حاجه تضيق او تزعلك سوا مني او من اي حد .......عاوزك تيجي وتشتكيلي انا .... حتي لو اللي مزعلك دا انا ......وانا اوعدك اني هجيبلك حقك وعمري ما هاجي عليكي .....بس اهم حاجه ان اسرار بيتنا وحياتنا تبقي بينا ....وماتخرجش بره لاي حد
هاله ببتسامه : حاضر
عماد يبتسم ويتنهد بحب : لا انا هقوم امشي.... ومش هجي تاني غير بعد كتب الكتاب
هاله باستغراب : ليه هو انا قولت حاجه زعلتك
عماد بابتسامه : لا انا اللي مش هستحمل.....انك تبقي قدامي وافضل ساكت.... ومقولش كل الجويه
هاله تكسف وتبص للارض ....وعماد يبصلها بحب ...وبعدها يستاذن ويمشي
اول ما الكل وصل الفيلا..... ريم كانت مبسوطه ومستنيه عمر يكلمها..... بس هو هرب وطلع شقتهم بحجه انه عاوز ينام .......فهو مش عاوز مفاجأته تفشل ..... وريم بقيت هتجنن مش فهمه تصرفاته .... ويقعدوا كلهم في الجنينه وهم فرحانين
شريف بفرحه : النهارده خطينا لعماد .....وبكرا انا ....(ويرقص بفرحه )وهتجوز هتجواز ....هتجوز هتجوز
الكل يضحك
امل بسعاده :الحمدلله عيشت وشوفتك عريس .يا شريف....انا نفسي نعمل فرحكم كلكم في ليله واحده ....ايه رائيكم
تقي بفرحه : اااه ياااريت يا طنط ...... فرح التلاته سوا دا يبقي حلو اوي
ريم بزعل : هم فين التلاته دول .....شكلهم هيبقي اتنين بس
امل باستغراب : ليه كده يا رورو بس ......مش خلاص سامحتي عمر
ريم بنرفزه وغيظ : المصيبه ان هو اللي زعلان ......يعني هو اللي غلطان ويزعل ..... وشويه يقولي دكتوره ....وشويه يقول لناس دي خطبيتي....... هيجنن والله
الكل يكتم ضحكته وميردش عليها
وفي الهرم ......فايز يجي لتالت يوم ......ودا خلي الكي يستغرب .... وخصوصا انه بيقضي اليله بيتكلم مع ميرنا ....في الفرندا
فايز بغيره وغضب : انتي ايه اللي مقعدك هنا.... قومي نمشي من هنا وانا مش هسيبك وهساعدك تبدأ حياتك
ميرنا : همشي اروح فين .....انا مبقاش ليه حد ....بقيت لوحدي
فايز باهتمام : انتي ايه قصتك وحكايتك .....انا عرفت انك بنت راجل أعمال...بس معرفتش ايه اللي جابك هنا
ميرنا بتصنع الحزن : ايوه بابي رجال اعمال كبير....وكان عنده شركة...... بس للاسف جيه اللي دمروه ودمرني...... وضيعنا كلنا ....حتي اختي الصغيره مرحمهاش وطردها من الفيلا ومش عارفه طريقها والا هي فين
فايز بضيق : مين دا .....وعملوا فيكم ايه
ميرنا تتنهد بحزن : انا كنت عيشه في الفيلا مع بابي ومامي..... واختي.....كنا عيله جميله ومبسوطين جدا ....بس كان ليه عمتي منها لله .....بتكره بابي وبتحقد عليه علشان جدي كان كتب كل حاجه باسمه.....وكتبلها هي حاجه بسيطه.....ابنها بقي حب ينتقم ...... فرسم عليا الحب. وانه عاوز يتجوزني..... وبابي كان رافض وخايف عليه منه بس لما لقي اني بحبه و متعلق بيه وافق ....واتخطبنا ..... وفضل يتقرب مني ويرسم عليه الطيبه والحب ....وهو بيضرب بابي في السوق من تحت لتحت ....لحد ما بوظ ليه كل شغلوا ......وبقي عليه ديون كتير اوي ..... جريت عليه وطلبت منه يساعد بابي قبل ما يتسجن .....قالي علشان اساعد ابوكي لازم اسلم نفسي ليه .(وتبص في الارض بتصنع الحزن) وانه بيحيني ... بس خايف ان بابي يقف في طريقنا ... فعاوز يتاكد اني ملكه ومش هسيبه ( وسكت ودمعت دموع كدابه ...وتصنعت الكسوف عشان يصدق كدبتها وافترائها ) وصدقتوا لم قالي ان احنا هنتجوز..... واني اصلا خطيبته.... ولما حصل اللي هو عاوزه ..... سبيني وراح خطب واحده تانيه..... ولما صعبت عليا وقولت لازم إنقاذها منه ورحت ليها علشان احذرها منه ......رحت اتفقت عليا هي وواحده صاحبتها وعملت انها مصدقاني..... وبعتولي رساله اني اقبلها هنا في الشقه دي ..... علشان يجبولي حقي...وحق بابي ... وانا كنت طيبه وصدقتهم .......
وجيت اقبلها هنا ولما جيت لقيت حازم صاحبها..وكان بيساعدها فاعتدي عليه..... ولما حاولت امشي من هنا ... لقيت حازم غضابنا وبيتخانق وقالي انهم غدروا بيه وبيا .....و انهم بلغوا عنا و افترت عليه هي وصاحبتها .....وقدموا فيا بلاغ اني كنت بساعد حازم عاشان يغتصبها..... كلمت بابي علشان ينقذني بس هم سجنوا علشان ما يساعدنيش واخده الفيلا واختي الصغيره ماعرفش راحت فين ( ميرنا كانت بتكلم بدموع وانكسار ) خدوا مني كل حاجه حلوه في حياتي ....خدوا شرفي وبرائتي وطيبتي ... خلوني ابقي كلي كره وحقد ....خدوا مني اهلي وضيعوا بتنا الجميل
فايز بغضب وحزن لحالها لانه صدق كدبتها : طيب تعالي معايا .....وانا هجيبلك فيلا.... وهعملك مشروع ليكي...وهساعدك تاخدي حقك
ميرنا بدموع كذابه : مش همشي من هنا .....قبل ما انتقم منهم واشوفها هي وصاحبتها في الشقه دي.....ومعمول عليهم مزاد زي ما حصل ليا .... ( وتبصله بحب وانكسار )وقتها بس همشي معك... وكون ليك وارجع ميرنا البرىئه ...... لو عاوزني ليك ساعدني انتقم منهم ...وانا امشي من هنا معك
فايز يقرب منها بحب : عاوزني اعمل ايه ... اخرب بيتهم اولعلك في شركتهم هعمل ليكي اللي انتي عاوزه
ميرنا بنظرت كره : عاوزه اجيب الاسمها ريم هي وصاحبتها هنا .... وشوفهم في المزاد ... وتضيع سمعتها وسمعت خطبها ... زاي ما ضيعوا سمعتي انا واهلي
فايز بغضب : انتي عاوزني اخطف بنات.... وجيبهم هنا الظهر انك ماتعرفيش انا مين ...انا عمري ما هفضح وحدة ست مهم كانت قذرتها
ميرنا تقف بغضب : وانا مش همشي من هنا.... غير لما انتقم واخد حقي .... واشوفهم هنا في المزاد
تمشي ففايز يشد ايدها بضيق : انتي راحه فين
ميرنا بدموع كدابه وغضب : مالكش دعوي بيا.... ومتجيش هنا تاني..... وسيبني في حالي....
( وتمشي خطوتين وتبصله بدموع ) وانا اللي افتكرت انك حبيتني ... زاي ما حبيتك ... وانك انت الهتساعدني علشان ارجع نظيفه وخرج معاك من هنا ونعيش سوا ... ضحكت انت... كمان عليه زيهم بظبط
تدخل وتسيبه لوحده في الفيرندا ..... وهو مضايق وجوه مشاعر مختلفها... بس اللي متاكد منه انه حبها ..... فهي قدرت تدخل لقلبه.... بكدبها ورسمها دور البريئه المظلموه.
ويطلع النهار والكل فرحان بخطوبه شريف.... الهتكون بليل واكترهم فرحه هو شريف.... اللي نهي خطفت قلبه برقتها وبرائتها .....وعمر كان غيران جدا وخايف يحصل نفس الحصل في خطوبه عماد....وحد يعجب بريم .... فبعد الفطار وكلهم قاعدين في الجنينه
عمر بضيق : انا بقول النهارده نروح انا وشريف وعماد وماما و عمتي ماجده بس.....ماحدش تاني يجي معانا كفايه احنا
تقي بعترض : لا طبعا....ازي يعني انت مش عاوزنا نحضر خطوبه شريف
عمر بغيظ : ما هي مش خطوبه.... دا اتفاق وقرات فاتحه ..... في الخطوبه ابقو احضروا...
ماجده : وليه يابني ما نروح كلنا ....زي ما رحنا امبارح
عمر بغيره :مافيش دعي يا عمتو.... هيروحوا يعملوا ايه
...
تقي بضيق تبص لريم : انتي سكته ليه يا ريم..... عجبك الكلام دا
ريم كانت عارفه عمر غيران فحبت تغيظه اكتر
ريم بستعباط : هو يقصدكم انتم .... لكن انا عن نفسي هروح
عمر بنرفزه : انا اقصد الكل مش هم بس .... وانت اولهم
ريم ببرود: وانا مش هاجي معاكم مدام مش عاوزنا نروح مع شريف......بس انا بقي هروح لصحبتي لوحدي
تقي بتصميم : وانا هروح معاكي ....مليش دعوي زي ما ريم هتروح انا كمان رايحه
هاجر بغضب : جوجو عاوز روح شوف عروسه .....انت احش عمر
عمر يقوم يقف وهو متعصب ومتغاظ : ماشي روحوا ( ويبص لريم بغيظ .... ويقولها بصابعه بتحذير ) بس والله لو حصل زي اللي حصل امبارح ما هسكت المره دي يا ريم ..... وهضرب اي حد ويحاول يستظرف دموا .... وهبوظلكم الليله
ويمشي وهو غضبان ...... والكل بعد ما يمشي يضحكوا عليه وعل غيرته
شريف بضحك : دا هيضربلي الليله ....ويبوظ الجوازه
امل بضحك: جننتي الواد يا ريم
ريم بضحك : دا هو اللي جنني والله يا طنط ..... شويه يقولي يا دكتوره ريم .....وشويه خطيبتي وغيران...... دا محتاج يكشف دا مش طبيعي
الكل يفضل يضحك ويكمل.... اليوم بسعاده وهدوء
والساعه 6 الكل استعد علشان يروحوا يخطبوا لشريف.....وشريف وعمر وعماد كانوا واقفين جمب عربيتهم ....ومستنين الكل ينزلوا ...... ريم كانت نزله مع حسن...... و لبسه دريس اخضر لون عنيها..... وطرحه طويله حمراء.... وشوز بكعب عالي احمر .....وكان شكلها ولا اروع.....
وكان وقف شريف وعماد مع عمر قدم عربية عمر وماجده ركبه عربيه عماد وامل راكبه في العربيه شريف ومعتها وساندي... اللي صممت تركب عربية العريس..... عمر اول ما شاف ريم نزله واقف متنح..... وفضل يبص عليهاريم وهي نزله
عماد بضحك : ايه يابني متنح ليه كده
عمر بغيظ: والله العظيم هي قصده اني اعمل جريمه واتسجن وتخلص مني...... دي بتنتقم مني يا عم
شريف وعماد يضحك..... وريم كانت قربت عليهم فاستغربت ضحكهم وتكسف
ريم بكسوف : خير ان شاء الله بتضحكوا ليه
شريف يغيظ عمر : ايه القمر دا يا ريم ....انا كده هغير رائي
عمر يخبطه علي راسه بقوه وغيظ : تعالي يا حبيبي وانا .....اعدلك رائيك تاني
شريف يمسك راسه بألم : اتعدلت خلاص .... يخرب بيت ايدك التقيله يا اخي .... ام اركب عربيتي احسن لي ...(ويمسك حسن وياخده ويمشي )
عماد بضحك : وانا كمان هروح عربيتي
وكل واحد يروح عربيته ....فريم لسه هتمشي عشان تركب مع حد فيهم
عمر يقف قدامها بغيظ: علي فين يا دكتوره
ريم برخمه : هركب مع شريف
عمر يجز علي سنانه : حضرتك هتركبي هنا معايا.... و علي الكرسي اللي قدم هنا جمبي
ريم ببرود : لااأاااا .....انا هركب مع طنط امل.... او عمتو ماجده ...انت اخر حد انا ممكن اركب معاه
عمر يقرب منها بغيظ وهي تخاف وتبعد خطوتين : هتركب معايا يا ريم ..... و الا والله...ما هنروح الميعاد وتكوني انتي السبب...
ريم بغيظ وعند : مش راكبه
بقلم (#ولاءيحيي)
تفتكرو كلمته اللي هتتنفذ .... واخرتهم هتكون دا ايه ... وياتري فايز هيعمل ايه مع ميرنا نعرف الحلقه الجايه
واظن اهو واقفه من غير تشويق
التعليقات على الموضوع