قصة الميراث الجزء الثامن

الميراث "
(مستوحاه من احداث حقيقية )
- الجزء الثامن -

بصيت جوه الصندوق لقيت كتاب شكله غريب مكتوب عليه ( ميراث الانيس لخدمة اولاد ابليس ) ، انا مكدبتش خبر و اخدت الصندوق وروحت جررري علي بيت الشيخ منسي و حكيتله و انا بترعش قالي متخفش انا هبعت حد للشيخ المملوكي و هو هيجي يعرفلنا ايه الكتاب ده لأن انا نفسي مش عارف الكتاب ده بتاع ايه ، فعلا بعت حد من ولاده و رجع و معاه الشيخ المملوكي و مسك الكتاب و قال لنا ان الصندوق ده هو بتاع فقيه زي ما قال و لما حكتله الحلم قال لنا انه غالبا كان بيمارس السحر و ان الوالي أمر بقطع رقبته عقابا علي كده بس الغريبة ان الشيخ المملوكي قالنا ان الصندوق ده مش جواه كتاب و بس و مسك الصندوق و بدأ يقلب فيه و ف جوانبه و لقيته بيشيل القماش اللي ف جوانب الصندوق و قوم نلاقي ايه ؟
- ايه ؟
- لفة جلد شبه جلد الحيوانات بس رقيقة اوووي مسكها الشيخ المملوكي و اول ما فتحها كان جواها سلالسل و اساور دهب ، بصينا لبعض و انا ضحكت ضحكة خبيثة كده و قولت للمنسي ها هنقسم الكنز ده ازاي بصلي الشيخ المملوكي و قالي انت هتاخد الدهب و انا هاخد الكتاب و المنسي هياخد البردية بالصندوق ، بصله المنسي باستغراب و قاله ده ازاي ده يا شيخنا رد المملوكي و قاله انت مش من زمان نفسك تعرف تفك رصد المقابر قاله اه طبعا قاله خلاص الورقة اللي معاك دي هتعرف عن طريقها و عن طريق خدامك انك تعرف اماكن الرواصد و تفكها كمان و انا هحتاج الكتاب ده ف علمي و ف شغلي و العيل الاهبل ده سيبله الدهب لأنه مش هيعرف يعمل حاجة بالكتاب او بالبردية رديت وقولتله طب و اشمعنى الصندوق يفضل مع المنسي رد و قالي علشان خدام البردية بيحموا الصندوق و مينفعش نبعد الصندوق عن البردية دي والا هتحصل كوارث ،وفعلا كل واحد خد نصيبه و كان الاتفاق ان كل واحد خد حاجة يحافظ عليها بمعنى ان انا مش هبيع الدهب انا هروح اخطب بيه البت حفيظة و اتجوزها و اعيش معاها ف بيت ابويا و كذلك جدك يا بت يا حكمت يحافظ ع الصندوق و ع البردية بحياته اما الشيخ المملوكي فهو هيعرف يحافظ علي الكتاب كويس .
- و بعدين يا عم بسطاويسي ما انا كده ما استفدتش حاجة و معرفتش هعمل ايه ؟
- لا تعرف ، لما هكملك .
- طب كمل .
- المهم بقى الحال علي ما هو عليه لحد ما الشيخ المملوكي مات و وقتها كان ابنه ابراهيم اللي هو جدك صغير ، بس قبل ما يموت ادى الكتاب للمنسي و بكده بقي المنسي معاه الكتاب و البردية و الصندوق و انا لسه الدهب معايا بعد ما اتجوزت و دهب مراتي بقى دهبي .
- حلو و بعدين ؟
- ولا قبلين زي ما حكمت قالتلك جدها مات و ساب الميراث ل ابوها اللي مقدرش يتحمله و اداه ل ابراهيم و يومها انا كنت موجود بس حبيت اقولك ان ابراهيم لما خد العهد مكنش فيه البردية .
- يعني ايه وضح .
- يعني كل المصايب اللي بتحصلكم دي بسبب ان البردية لسه ف بيت المنسي و الصندوق و الكتاب معاك .
- طب و الحل اييييه ؟
- انتوا تدورا ف بيت المنسي علي البردية و تحطوها جوه الصندوق و تاخدوا ميراثكم و محدش يموت بس خلي بالك لازم لاااازم حد يكمل اللي اجدادكم عملوه و يكمل حراسة الميراث كله .
- يعني علشان نوقف اللي بيحصل لازم نلاقي البردية و نحطها مع الصندوق و نبقي انا و ولاد عمي زي جدي اللي مات منتحر !
- لا خد بالك انت جدك مات منتحر لانه مأخدش البردية و عمل عك كتير كده عرفته من كلامك و لأنه مخدش الميراث كامل و حاول يدخل عالم الاموات من غير حماية ف اتأذى .
- طب و احنا مستنين ايه يلا يا استاذة حكمت نجيب البردية .
- و دي اجبهالك منين ان شاء الله ده انا شيلت البيت كله و ....
قطع كلامها البسطاويسي لما قال .
- لا يا بنتي جدك غالبا غالبا هيكون مخبي البرديه تحت اخر بلاطه ناحية الشمال ف اوضته .
انا مستنتش و خدتني حكمت و روحنا جري علي بيت المنسي و فعلا طلع كلام البسطاويسي صح و لقينا البردية و اخدتها و حطتها جوه الصندوق مع الكتاب و معاهم مذكرات جدي و رجعت جرررري للقصر بيهم لكن لما روحت لقيت القصر فاضي مفيهوش حد ، طلعت فوق و دورت ف كل مكان مفيش حد ، لحد ما قطع صوت الهدوء صوت فريد خارج من الأوضة اللي كانت مقفولة و فتحها هو .
- انت جيت يا محمود؟
- اه انت بتعمل ايه جوه الاوضة ؟
- مفيش كنت بدور علي اي حاجة تخلصنا من اللي احنا فيه .
- اومال بقية ولاد عمي فين ؟
- ولاد عمك !
- اه ولاد عمي يا فريد هو في ايه ؟؟؟
- احنا روحنا ندفن عزت و بعد ما خلصنا الدفنة روحنا لبدير المحامي علشان نحكيله اللي حصل و اثناء ما احنا بنتكلم سجايري خلصت ف نزلت اشتري سجاير و لما رجعت لقيت الاسانسير واقع و ولاد عمك كلهم ... جو جو جواه و ميتين كلهم .
- ميتين كلهم .... جوه الاسانسير !!!!
- اه والله يا محمود .
- و انت ازاي تسيبهم يا فريد .
- نصيبي يا أخي ان انا افضل عايش هتدخل ف ترتيب ربنا بقى !
- لأ بس يموتوا ازاي ، و ليه يموتوا لما انا لقيت الحل و جبته معايا.
- لقيت البردية ؟؟؟؟؟
- بردية !!!!! ، انت عرفت منين ان في بردية ؟؟؟؟

فجأة سمعت صوت رجل كبير جاي من ورايا بيقولي .

( اهلاً بالحفيد الاصغر ..... اهلاً بيك يا ابن ابني ..... يتبع😍😍
بقلم
محمد_شعبان
العارف