قصة اقتناص الجزء الثاني

اقتناص
الحلقة الثانية
تاني يوم رحت لصاحب المعرض عشان أرجع العربية لملكيتي,, وقلتله هجيبلك فلوسك وترجعلي العربية,, قاللي...العربية لازماك
قلتله...أه لازماني,,, فرد وقاللي...بس العربية زادت 10 الاف جنيه,, قلتله...من امبارح للنهارده زادت 10 الاف جنيه
قاللي...أه ,, ما هو أنا بردو صرفت عليها دي كانت ريحتها زي ريحة القبر,, فقلتله بتلقائيه...بس؟؟ مكنش فيها حاجة تانية؟؟
قاللي...كان فيها وبرة كلب مغرقة الأربع كراسي,, أنت مربي كلب عندك ولا أيه
قلتله...مفيش أي حاجة تانية
قاللي...أنت مالك ياعم في أيه, عايزها ولا لا,,
قلتله...عايزها,, هشتريها وهدفع  ال 10 الاف الزيادة بس هسيبها عندك في المعرض لغاية ما أجي أخدها,,, ممكن أشرب مياه,, فين التلاجه اللي هنا...
خلصت أتفاقي معاه ورحت على بيت العميل اللي كنت شاري العربيه دي منه بعد المغرب,, قعد على مكتبه وأنا قعدت قصاده  فقلتله...أنا هجيبلك عربيتك,, أنا مش عايزها والفلوس كلها هاتها بعد سنة مش 100 الف بس زي ما كنا متفقين
فقاللي...وأنا خلاص بيعتها ومعدتش عايزها
فانتفضت من مكاني وطلعت مسدسي ورفعته عليه....يبقى أنت اللي عاقدلي سحر عليها,, عايز تموتني يا ابراهيم,, دي أخرتها
لقيته رفع دراعاته لفوق...والله العظيم تلاته ما أعرف حاجة عن سحر ولا أعرف سحرة ولا أعرف أنت بتتكلم عن أيه,,المصحف أهوه على مكتبي أنا هوطي أمسكه,, أوعى تعمل حاجة يا منير بيه,,
مسك المصحف وقال...وحق هذا المصحف الشريف على عيني,, أتعمى لو كنت بكدب عليك ما أعرف حاجة عن سحر ولا سحرة ولا عقدت عليك سحر,, ساعتها لقيت العجوزة واقفه جنبه وبتقوللي...كداب هو اللي عقدهولك أقتله يا منير وأنت تطيب,, كانت أيدي بترتعش وجسمي بيتنفض والعرق مغطي جبهتي من السخونه اللي أنا فيها,, وأنا بنقل نظري بينها وبينه,, فأبص عليها الاقيها بتعدي صوباعها على رقبتها بعلامة الدبح وتميل راسها على كتفها وتطلع لسانها بما معناه أني أقتله وهو واقف ورا مكتبه مفزوع,, لغاية ما وقع المسدس من أيدي,, فجرى ابراهيم عليه مسكه,, لقيتها بتقوللي...أهو هو اللي هيقتلك,,
فلقيته حط المسدس في درج مكتبه وجه سندني وقومني,, قعدني على الكرسي وقعد جمبي وقاللي...مالك يا منير بيه
ابراهيم ده كان عميل عندي صاحب مشغل ملابس كبير يعتبر زي مصنع صغير,, حصلت عنده حريقة في المشغل وخسر مبلغ كبير جدا,, كان عليه ليا 200 الف جنيه تمن قماش واخده من مصنعي وكنت بطالبه بالفلوس دي من قبل الحريقة,, لأن كان آن أوانها خاصة أنه ماضيلي على شيك بنكي بضعف المبلغ ده,, المهم أنه لما حصلت الحريقة أُعسر بزيادة,, وكنت بدأت أقلق أن الداينين يتكاتروا عليه,, في حين أني أكبر الداينين لان أنا اللي بورد له القماش أما الزراير والخيط والاكسسوارات والكلام ده كله كلام فاضي,, فاتفقت معاه أني هخد عربيته,, العربية كانت قيمتها بعد ما تمنّاها بتاع 240 ألف فقلتله أني هخدها ب 220 ,, ال200 اللي عليه وهديلو عليهم 20 الف جنيه بضاعه وأعطي له بعدها بضاعه تانية ب 100 الف جنيه يسد فلوسها بعد سنه,, يعني تمن العربية نزل من 240 الف ل 220 الف بقيمة 20 الف جنية عشان هصبر عليه في 100 الف جنيه لمدة سنة كان اتفاق بالكلمة كده وبالفعل طمعته ووصلته شغل ب20 ألف كبداية قبل ما يمضيلي عقد العربية,, وبعدها راح مضالي العقد,,سلمته شيكاته وأستلمت العربيه أحلوت في عيني فبيعت عربيتي القديمة وسيبت دي,, وبعدها ب 20 يوم بدأ يطلب مني بضاعه,, فأنا رفضت وقلتله في آخر مكالمة تليفونية بينا اللي كانت قبل ما انذار العربية يضرب في الليل ويحصل اللي حصل...أنت كده وصلك 220 ألف بضاعه وأنا وصلتني العربية,, والعربيه متسواش اكتر من كده وحتى لو كانت تسوى أكتر فاعتبره حق صبري عليك طول الفترة اللي فاتت وبعدين مش عجبك هاتلي ال220 دلوقتي كاش وخد عربيتك,, فطبعا قاللي وقتها...حسبي الله ونعم الوكيل,, أنت كده سرقتني,,أنا كنت عامل حسابي أن البضاعة اللي هخدها منك هي اللي هقف بيها على رجلي من تاني,, ودا كان أتفاق على بعضه مينفعش تخد منه حته وتسيب منه حته,, وختم كلامه بأنه قال لي...أنا مش مسامح,,
كان كل تفكيري وقتها أن أخد الحق صنعة,, وأني بكده أخدت حقي
لقيت ابراهيم بيقول...مالك يا منير بيه؟ وأيه حكاية السحر دي؟؟
قلتله...ناولني كوباية المية اللي على المكتب دي,, فناولهالي فخدتها منه بأيد مرعوشة وشربت بنهم وكانت المياة بتنزل على صدري وانا بشرب, ومحسيتش أني أرتويت فقلتله...أبوس أيدك يا ابراهيم,, ارحمني,, أنا عارف أني مرحمتكش بس أرحمني أنت
...وحياة عيالي ما سحرت لك ولا أعرف حاجه عن السحر,, وأنا بعد ما أنت عملت الموقف ده معايا ربنا كرمني بمصنع تاني خدت منه شغل وممضنيش على ورقه,, وعشان ميبقاش في قلبي أي غضاضه,, أنا هخد منك ال 20 الف اللي كانوا فاضلين من تمن العربية وأسامحك وأبريك ويمكن بعدها تزول مصيبتك
كتبتله شيك بالفلوس وسبته ونزلت,, عرض عليا يوصلني قلتله أنا محتاج اتمشى شوية,, مكنتش عارف أصدق انه مسحرليش ولا مصدقوش,, نزلت من عنده مشيت في الشارع زي التايه حاسس اني بشوف العجوزة بسنانها الدهب وتجاعيدها اللي حفظتها في وشوش الناس حواليا وحاسس أني على طول عطشان,, ضحكتها بتتردد في ودني ولمعة سنانها بتضرب في عيني,, قعدت في مكاني على الارض جمب شجره في الجزيرة اللي في نص الشارع وطلعت الموبايل بايدي المرعوشة واتصلت بمراتي لقيتها بترد عليا وتقول...المعقود معقود طالما حل أوانه,, جسد بلا سيطرة على روح وروحين في جسد
رميت التليفون من أيدي وانا عينيا مبرقة سمعت صوت مراتي في التليفون عماله تقول ألو ألو أنت فين يا منير ألو ألو
مكنتش قادر أرد عليها ولا قادر أقوم من مكاني ولا قادر أمد أيدي حتى,, وحاسس أن تشبثي بالحياة بيضيع
صحيت في المستشفى,,البلد لسه فيها خير لسه فيها ناس أحسن مني وممكن تساعد اللي واقع في ضيق,, شاب سمع تليفوني اللي واقع جمبي عمال يرن وأنا مغمى عليا رد على مراتي فجات وأخدتني على المستشفى,, كل حاجه ضايعه كوليسترول عالي انزيمات كبد شايطه ضغط رافع وبلاوي تانيه كتير,, قضيت ليلتي في المستشفى ومراتي جنبي,, شربت في الليلة دي 7 لتر مياة والصبح حد أتصل بيا ...ها أيه الأخبار يا منير بيه؟؟
...مين
قال لي...مين أزاي؟؟ أنا ابراهيم
...مسامحني يا ابراهيم
قال لي...مسامحك والله,, أنت متحسنتش
...أنا خلاص يا ابراهيم,,
قال لي..أنت فين؟؟
...في مستشفى[......]
قال لي...طب أنا جايلك
خدني ورحنا لراقي شرعي,, مراتي كانت معترضه بس أنا صممت,, ومجرد ما وصلنا حسيت براحه حتى النار جوايا هديت شويه
دخلنا له وحكيت له حكايتي كلها من الألف للياء أنا وابراهيم
فبدأ كلامه بذكر الله والصلاة والسلام على رسول الله وقال..إن دخول الجن في بدن الإنسان ثابت باتفاق أهل السنة والجماعة ومن أدّعى غير ذلك فهو يكذب على الشرع كما قال شيخ الإسلام ابن تيميه,, كما السحر فهو ثابت في كتاب الله,, ولكن يسبق كل هذا قوله تعالى وما هم بضارين به من أحد إلا بإذن الله,,
وهناك من النفوس الخبيثة من يتجرأ على الله ويظن الحماية والأمان فيمن سواه,, فيفعلها عامدا متعمدا وهذا شرك بالله,, ومنهم من يفعلها عن جهل,, فيقوم بعمل سحر أو تعويذة أو ما يسمى حجاب من أجل حراسه أو حماية أو حفظ,, فيقوم الساحر بعقد ذلك العمل على منشأة أو سيارة أو ما خلافه من الممتلكات,, بقصد حمايتها من السرقة أو الضرر أو الاستيلاء عليها بدون حق,, وقد ينتقل هذا الشيء المعقود عليه ذلك السحر من يد الى يد دون أن يقوم عاقد السحر بحل رباط سحره,, فتلك السيارة انتقلت بين عدة أيادي وجاءت أشراط التعويذة فيك يا أستاذ منير لأنك كنت بمثابة سارق لها ,, فالبيع ايجاب وقبول,, وقد عقدتم عقدا خالفت بنوده فكنت بمثابة سارق جزئيا لها,, فألتبس بك ذلك الجني المقيد لتلك التعويذة,, ولكن دعني أخبرك شيئا...قل لن يصيبنا الا ما كتب الله لنا,, فقد يكون ما قد أصابك أقل وطئة مما كان قد يصيبك اذا أمتنعت عن رد الحق لأهله,, أفلا تدري أن دعوة المظلوم ليس بينها وبين الله حجاب
القصد بالنهاية أن الجن والأنس عالمان متوازيان لا يتقاطعان الا باسباب سواء سحر أو أذى أو غيرها من المسببات لكن إذا استعنت بالله وعصمت نفسك عن الذلل وحصنتها بطاعة الله فلن يؤذيك كيد السحرة مهما بلغت شدتهم,, أنت كنت على معصية حين أخلفت عهدك وسرقت تلك السيارة أو سرقت ما هو جزء منها والمعصية تهون الطريق على الشيطان وقبيله ولكنك الآن رددت الحق إلى أهله وسنرقيك بإذن الله ونحاول أن نرفع عنك الأذى
فسألته على الكلب والست العجوزه فقال لي أن الجن بيتشكل فممكن يكون كان متشكل في هيئة كلب قبل ما يلبسني وممكن بعدها بقا يظهرلي في صورة الست العجوزة,, وبعدها بدأ يرقيني  وعلى كلام ابراهيم أنه كان كل ما يرقيني أنام,, وأصحى بعدها وأنا بشهق,, وفي النهاية قال لي أنه هيحاول معايا بجلسات كتير وأني لازم أحافظ على الاذكار وعلى الصلوات طول ما بيحاول يحل السحر من عليا,, وأداني ماية مقري عليها سورة البقرة وقاللي استحمى بيها وأرش منها على قد ما أقدر في أركان العربية,, وفي النهاية قاللي احاول أني أوصل لمالك العربية اللي عمل السحر ده لأن ده اقصر الطرق ونحرق السحر المعمول عليها,, لأن واضح أنه سحر مستعصي,, وأنه هيحاول معايا بكل طاقته
خدني ابراهيم بعدها وروّحني على البيت كانت مراتي لسه في عيادتها,, فضل معايا شوية وبعد كده سابني على انه يجيني تاني يوم نروح المرور نشوف ملاك العربية السابقين,, مجرد ما قفلت الباب بعد ما ابراهيم خرج لقيت العجوزه ورايا,, بس كانت خالعه غطا راسها كان شعرها كله أبيض وبتبصلي وكأن النار هتشتعل في عينيها وقالت...أنت اللي أبتديت الحرب وقيدت النار,, والمعقود معقود
ساعتها حسيت النار جوايا ولعت تاني وحسيت بالحر والعطش فدخلت شربت وبعدها قلت معوذة دخول الحمام اللي عمري ما كنت بقولها واخدت دش وطلعت أتحممت بالمية اللي مقروء عليها سورة البقرة برشها على جسمي وأتوضيت بيها و قرأت أذكار المساء وصليت المغرب,,تقريبا دا اول فرض أصليه من زمان أوي,, كنت بحس أني بتوه في الصلاة ومش فاكر صليت كام ركعه ووساوس الدنيا كلها بتجيلي لكن كنت بقاوم وقمت من الصلاة أهدى,, ,, تاني يوم خدني أبراهيم ورحنا المرور,, العربية كانت موديل 2011 كانت دارت بين أيدين خمس ملاك من الوقت ده,, خدنا بياناتهم وبدانا نتواصل معاهم ونقابلهم واحد ورا التاني لغاية ما قابناهم كلهم,, والكل كان بيقسم أنه ما يعرف حاجة عن الموضوع ده
في الوقت ده كنت رحت للراقي تلت أيام وكنت بتحسن شوية وأرجع انتكس تاني,, زي ما تكون العجوزة بتنسحب وترجع تهاجم بعنف,, لكن بعد ما فشلنا في الوصول للمالك اللي عقد السحر,, بطلت أروح للراقي وبطلت أقرأ أذكار وسبت نفسي للنار والخيالات والوساوس وسلمت نفسي للعجوزه اللي بقت تتواصل معايا أكتر من الاول,, أتعودت على وجودها,, اللي بره دايرتنا أنا وهي يشوفني مجنون أما أنا فكنت معاها,, وبعد ما كانت تحاليلي بدات تتحسن رجعت تنتكس تاني ومصنعي وقف,, وبدأت أفقد الأمل أني أرجع منير بتاع زمان,, وأقتنع أن أخرتي يا اما هتكون مصحة نفسية أو هموت لما جسمي ميستحملش الضغط النفسي والعصبي اللي أنا فيه وينهار كلية
لغاية ما في يوم جالي تليفون
يتبع...بقلم/عبدالفتاح عبدالعزيز