قصة رعب👻

مبقتش عارف اروح فين ولا اجى منين كل الابواب اتقفلت فى وشى حبيبتى سابتنى وشغل ومش لاقى وابويا وامى مش طايقنى فى البيت كل احلامهم الى معلقينها فيا احققهالهم اتكسرت حتى صاحب القهوة مش طايقنى عشان الفلوس الى ليه عليا ، كنت عايز افضل لوحدى مكان بعيد انفصل فيه عن كل حاجه.. فضلت اتمشى فى الشارع حيران تايه ودماغى بتودى وتجيب ، فضلت ماشى ومع ذلك مش لوحدى الشوارع دايماً مليانه ناس ، الساعه دلوقتى 2:00 الضهر ، فضلت ماشى فى توهانى وهمومى تناوبت عليا لحد ما لقيت نفسى عند المقابر ...
الباب مفتوح وفيه يافطه كبيره مكتوب عليها (مقابر عائله زينهم ) .
معرفش ليه لاقيت نفسى ميال لانى ادخل جوه وفعلاً دخلت اتمشيت وسط القبور وقعدت على مسطبه ، بصيت حوليا وبدأت افتكر حبيبتى الى اتخطبت وسابتنى والبلد الى مش طيقانى دى، والدموع نزلت من عنيا وبدأت اعيط وطيت وضميت اديا على وشى وبكيت.
سمعت صوت جمبى بيقول : انت بتعمل ايه هنا يا ابنى .
بصيتلو بعنيا المرغرغه ، كان راجل لابس جلباب ودقنه سوده تتخللها شعيرات بيضاء  .
قالى :
= مالك بس يا ابنى ايه الى مزعلك انا عمك (الفقى) " التربى "حارس المقبره هنا اعتبرنى زى ابوك واحكيلى .
قلتله بأنفعال :
_ انا عايز اموت قرفت من حالى .
وعيطت فقام حاضنى بحنان كبير محستوش قبل كده.
وقال :
=فضفض يا ابنى فضفض وطلع الى فى قلبك
اتكلمت وانا بعيط :
_ انا تعبت وشقيت من صغرى وطلع عينى وطلع عين اهلى وفى الاخر طلعت عاطل وقاعد ع القهوة .. مش مصدق الكذب الى كذبوه عليا طول عمرى اتعب فى الاعدادى عشان تجيب مجموع كويس وترتاح فى الثانوى ... اتعب فى الثانوى عشان تدخل جامعه كويسه وترتاح ... دخلت الجامعة بقو يقولو خلص يا ابنى عشان تشتغل وتصرف على نفسك  ، لكن كل ده محصلش كله فشينك ... حياتى كلها مراحل وكل مرحله عايز اخلص منها عشان ارتاح فى المرحله الجايه  .. وبعد الجامعه بقيت عضو منتدب فى القهوه عندنا فى الحاره هه ؛ ..قلت اخر كلمتين بنبرة سخريه .
بعدت عن حضنه وكملت :
_ انا مش هرتاح غير لما اموت وابعد عن الخلايق كلها وعن التعب والقرف والعذاب الى انا فيه ده انا هرتاح لما اموت .
رد :
=ومين قالك يا ابنى ان الموت سهل .
=ولا مين قالك انك هترتاح .
قلتله:
_ والله ما عدت قادر اعيش يا  عم .
_نفسى ربنا ياخدنى   .
_انا حاسس ان ربنا بيكرهنى .
قال هو :
=صل ع النبى يا ابنى بس واستهدى بالله .ولكن اوعى  تفتكر ان ضيق الرزق يعنى ان ربنا بيكرهك لا يا ابنى ، ولكنه يعطى لحكمه ويمنع لحكمه.
=ما كن لك سيتبعك ولو هربت منه
وما لم يكن لن تناله ولو ركضت ورائه
انظر لحبه البن
تزرع فى بلد
وتطحن فى بلد
وتغلف فى بلد
ويشتريها تاجر من بلد
ويبعها لتاجر من بلد اخر
ثم تصل اليك وتكون قهوتك لانها منذ البدايه قد كتبت لك
مزارعون وتجار وباعه يعملون ليصل رزقك اليك
ومره اخرى تعمل وتشترى وتبيع وتكد وتشقى
ويصير المال فى جيبك ثم تفقده
ذلك لانه لم يكن لك منذ البدايه .
_والموت وعذاب القبر مش ساهلين متتمناش حاجه كده .
كنت هقله على اساس انك موت قبل كده بس ؛كلامه حسسنى براحه شويه هدى من روعى كلامه فيه تعزيه لحالى.. لمسنى ، وقد ضرب مثل باللبن بحاجه انا مبيدخلش جوفى اكتر منها
قلت :
_انت مش عارف قد ايه انا ارتاحت بالكلام معاك انا نفسى اقدملك اى حاجه يا عم (الفقى) يا راجل يا طيب .
قال هو بصوت مبحوح ونبرته توحى بالنهايات وانتهاء الحديث:
_اقرالى الفاتحه .
قلت: ايه !
وفجأه ببص حوليا ملقتهوش .
جى عليا شاب فى سنى كده او اكبر لابس جلباب وفيه شبه من عم الفقى وقال لى:
=انت بتعمل ايه هنا ؟؟
قلت :
_كنت قاعد مع عم (الفقى) حارس المقابر هنا .
زعقلى وقال : انت بتهزر يا جدع انتا (الفقى) ده ابويا الله يرحمه ومات من سنتين وهو بيعمل الشاى والانبوبه فرقعت فى وشه وانا حارس المقابر دلوقتى .....
قلت بتوتر وتهته:
_ازاى ده كان ..كان قاعد معايا دلوقتى والله والله العظيم كان معايا وبكلمه انت اكيد غلطان حتى بالاماره كان لابس جلباب اسود ..
_زى الى انت لابسه بالظبط كمان .
رد هو وبدأ يستوعب انى بتكلم جد :
=هو فعلاً ده الجلباب بتاعه .
=اعوذ بالله من الشيطان الرجيم الله يرحمك يابا ..
= يا ابنى الى انت شفته ده قرينه او روحه لكن مش هو انا ابقى ابنه (ضاحى) ..(ضاحى الفقى) .
جحظت عنيا وبحلقت فيه انا كنت قاعد مع راجل ميت من سنتين والى قدامى يبقى ابنه ..
سبت الراجل ومشيت من غير ولا كلمه .
خرجت من المقابر لسه ماشى لقيت ، كوره اتحدفت ناحيتى قرب عليا ولد فى ال ٥ خمس سنين وقال لى :
=عمو انت كنت جوه ازاى .
_يعنى هيكون ازاى دخلت م الباب  .
= طب انا اسف خلاص مش عايز الكوره .
بعد عنى وهو خايف ، ايه الى يخليه يسيب الكوره بتاعته؟ .
_استنى بس قولى فى ايه .
=انت بنى ادم .
_ايوه ياد امال ايه انطق!!= طب نصيحة يا عمو اوعى تدخل هناك تانى ، من ساعة ما (الفقى) حارس الترب و(ضاحى) ابنه وحفيده الى عنده خمس سنين (مازن) فرقعت الامبوبه فى وشهم والناس دايما تشوفهم بيحومو ويلفو فى المقابر الناس خافت وبطلت تزور هناك  .... نصيحه يا عمو لو ليك حد ميت جوه اقرأ له الفاتحه من بره بلاش تدخل .
_فتحت بوقى  وافتكرت .
*
لما زعقلى وقال : انت بتهزر يا جدع انتا (الفقى) ده ابويا الله يرحمه ومات من سنتين وهو بيعمل الشاى والانبوبه فرقعت فى وشه وانا حارس المقابر دلوقتى .....
*
قطع تفكيرى مثانتى واحساسى بالرغبه فى تلبيه نداء الطبيعه .
_بقلك هو فى حمام هنا يا ..
= مازن ياعمو اسمى (مازن ضاحى الفقى).
_خلاص مش عايز حمام راحت راحت .
ودى تقريباً كانت اول مره اعرف معنى التبول اللإرادى  .
قصه قصيره من تأليفى .
الشبه كاتب حسين_البوليس