قصة الروح الثالثة كاملة 👻

قصة ( الروح الثالثة ) كاملة
الموضوع بدأ لما أتصورت ولقيت خيال شخص أسود واقف ورايه في الصورة
أنا نورهان عبدالغني ..عندي 33 سنة ..
متزوجه بقى لي سبع سنين وما خلفتش عيال لحد دلوقتي..
وكشفت كتير عند الدكاترة بس العيب ماطلعش فيا
أنا بشتغل عشان مابحبش أقعد لوحدي فالبيت وعشان أغير جو
مع ان جوزي حاتم .. حاول يقنعني أسيب شغلي أكتر من مرة وانا رفضت ده
حاتم بيتشغل في شركة مالتي ناشونال فسعات بيضطر يسافر بالاسبوع بره وبقعد لوحدي في البيت
فمتعودة لما يسافر بجيب فيروز صحبتي الانتيم من أيام الجامعة تبات معايه كام يوم ..
بدل ما اقعد لوحدي وادينا نونس بعض
لانها مطلقة وعايشه لوحدها فسهل تيجي تبات معايه اسبوع كل فترة
المهم فيروز مثقفه جدا وبحب أخد رأيها ي حاجات كتير
المهم انها في يوم قالتلي أن خالتها تعرف ست مبروكة أوي
ست واصله زي ما بيقولوا .. قالتلي ليها كلام مع الاسياد وعمر ما حد راحلها ورجع حاجته مش مقضية
قولتلها يابنتي دا كله كلام فاضي.. قالتلي حاولي وتبقي عملتي اللي عليكي ..بصراحه انا كت مستنيه الرد ده منها لاني كنت هموت واروح فعلا
انا في عرض أي حاجه اتشعلق فيها .. أي أمل ولو كداب.. نفسي اخلف عيل صغير يملى حياتي وحياة جوزي
ونربيه سوى ونشوفه وهوا بيكبر .. انا عندي أختين تانين أصغر مني واكبر مني الاثنين عندهم عيال
المشكلة مش عندي .. عند حاتم بس انا مفهمه الكل ان المشكله عندي انا .. الا فيروز الوحيده اللي عارفه الحقيقه
المهم قولتلها ماشي نبقى نروحلها.. لقيتها رفعت سماعه التلفون وبتكلم خالتها تحجزلنا معاد عند الحجة " تهاني "
وفعلا روحنا وقعدنا معاها .. وطلبت اسمي واسم جوزي وتاريخ جوازنا وتاريخ ميلادنا ..وجبتلها حاجه من أدواته زي ما طلبت من خاله فيروز في التلفون لما اتصلنا نحجز
الحجه تهاني شكلها يقرف بصراحه مش عارفه بيقولوا عليها حجه ازاي؟؟! .. البيت مكمكم وريحة البخور تحرق العين ولابسه جلبيه سودا وطرحه سوده رابطه بيها شعرها الابيض ومركبه سنه فضه
ولابسه خرز كتير .. ومولعه صنيه فيها بخور كتير
المهم فضلت تتمتم بكلام وترمي حاجات عالبخور تولعه أكتر وتعلي صوتها أنا اتوترت .. بعدها جابت فرخه دبحتها على شويه ورق وطلاسم وخرز ولفتهم في قماشه وقالتلي حطيها جوة مخدته
وبعد شهرين أبقي طمنيني .. رجعنا البيت وفعلا حطيت الحاجه في مخدة حاتم .. وكنت متوترة جدا لدرجه اني عيطت
وفيروز فضلت تهدي فيا .. وبعد كام يوم حاتم رجع من السفر واتعشينا مع بعض عشوة جميله .. ودخلنا ننام
حاتم لو عدى عليه نص ساعه نايم جنبي من غير ما يتكلم يبقى راح في النوم خلاص فبطفي النور
وفعلا عدت نص ساعه وحاتم راح في سابع نومه أبتسمت وقومت قافله النور وسبت نور الابجوره ..
وفجأة لقيت حاتم قام من نومته وقعد على السرير في حركة سريعه جدا.. أتخضيت خضه كنت هموت فيها
قولتله حاتم مالك؟.. انت كويس ؟؟!
قام لف وشه بالراحه وبصلي وأبتسم وقالي ..
=================================================
قولتله حاتم مالك؟.. انت كويس ؟؟!
قام لف وشه بالراحه وبصلي وأبتسم وقالي ..أنا كويس .. بنبرة هادية جدا .. ولقيته ماسك أيدي وباسها ..وطفى نور الابجورة
تاني يوم صحيت مستغربه من تصرفات حاتم اللي حصلت أمبارح .. حسيت من ساعه ما صحي من نومه في نص الليل
انه شخص تاني مش حاتم جوزي .. مانمتش غير ساعتين تقريبا طول الليل بعدها لأني متوتره وخايفه منه
المهم عدت الايام .. وماشوفتش حاتم بنفس الشكل اللي شوفته فيها الليله دي.. كان طبيعي بعدها جدا
وبعد أقل من شهرين تقريبا بعد ما حسيت حاجات غريبه بتحصلي كشفت وخدت فيروز معايه وفعلا طلعت حامل
انا عيطت ساعتها من الفرحة وروحنا نشتري هدوم للبيبي انا وفيروز .. وحطيت هدوم البيبي على السرير في المكان اللي بينام فيه حاتم وغطيتها بالبطانيه
فضلت نايمة مستنيه حاتم يرجع من الشغل ولما رجع ودخل ينام رفع البطانيه وسمعت صوته بيكتم بكائه .. دمعتي نزلت بصراحه مارضتش أدخل عليه سيبته براحته يفرح بالخبر زي ما أنا فرحت
لقيته طلع بعدها وهوا ماسك هدوم البيبي وقام حضني وباسني على راسي وفضل يتمرجح بيا وانا في حضنه فتره كبيره بعدها دخلنا ننام وحطينا لبس البيبي بينا
بعد ساعه وانا مفكره حاتم نام لقيته بيبصلي وبيقولي هنسميه ايه ؟
قولتله استنى لما نعرف ولد ولا بنت .؟ قالي خلاص لو بنت هنسميها " ليان " ولو ولد هنسميه " سعد " عشان هوا وش السعد
ابتسمت لاني بحب اسم ليان بس لو ولد هوا يسميه وانا هسمي البنت.. زي ما اتفقنا من حوالي 8 سنين في الخطوبه ..نمت وعدت الايام لحد ما في مره أتصورت مع حاتم في خطوبه واحده من قرايبه ..ولما روحت ببص عالصورة لقيت بيني انا وحاتم في خيال أسود واقف ورانا
قلبي أتقبض بصراحه بس طنشت الموضوع ..وريت الصورة لفيروز صحبتي بعدها أول ما شافتها قالتلي انتوا عندكم صور كتير وراحت ماسحه الصورة من غير ما تقولي ..
قالتلي فكك بقى من هلاوس الحمل دي واعقلي كده مافيش حاجه
نسيت فعلا الموضوع وعدت الشهور وفعلا خلفنا بنوته صغيره زي القمر وسميناها ليان
جاتلي هدايه كتير من أهلي وأهل حاتم وكنت طايره في السما حرفيا عبئ كبير اتشال من على كتافي
حلم جميل بعيشه دلوقتي واتحقق
الموضوع مرهق أوي في الايام الاولى للبيبي والخوف الزايد بيخليك قلقان على طول
وبعدها بسبع شهور كنت نايمه جنب حاتم فجأة لقيت حاتم بيبصلي في الضلمه ومبتسم ..ومسك أيدي بالراحه
وبيقولي ليان دي بنتي أنا .. قولتله طبعا يا حبيبي بنتنا .. قالي انا هاخدها معايه ..حسيت طريقه الكلام مختلفه نورت نور الاباجورة لقيت حاتم مسك على أيدي جامد..و عينه كلها سودا مافيش أبيض ومنخيره بتزل دم غزير
صرخت جامد قام ماسك رقبتي وفضل يخنق فيا ..بعدها صحيت من النوم مفزوعه لقيت حاتم ماسك ايدي وبيحاول يصحيني
قالي مالك بتترعشي كده ليه .. قولتله مافيش قام جابلي كوباية مياه شربتها وتاني يوم الصبح  طلعت القماشة من مخدة حاتم وبعدها رميتها في الزبالة .. وكلمت فيروز تجيلي وحكيتلها على كل اللي حصل
قالتلي ان دي كوابيس بس وتعب ما بعد الولادة وبسبب الضغط النفسي والقلق
فضلنا نتصور ونلعب مع ليان واتغدينا ومشيت وبليل قبل ما أنام .. حسيت اني مش قادره اتحرك على سريري .. وفي خيال أسود .. ماشي في الاوضه ورايح ناحيه سرير ليان حاولت أصرخ أو اتحرك ما عرفتش ..
بعدها لقيته رافع ليان ولقيتها بتطير فوق سريرها وانا مش عارفه اعمل حاجه وليان صحيت وقعدت تعيط وتصرخ وانا مش عارفه اعمل ايه بعدها ليان نزلت على سريرها مره واحده بقوة
كانه سابها مرة واحده وهي في الهوا .. فجأة لقيت نفسي قادرة اتحرك جريت على ليان وهي بتعيط وشيلتها وفضلت أطبطب عليها وهي بتصرخ بشده وفجأة سمعت صوت حد بيهمس في ودني
بيقولي دي بنتي أنا .. لفيت ورايه بسرعه مالقتش حاجه فضلت أعيط وحاتم صحي وفضل يطبطب عليا ويقولي ما تخافيش عليها هي كويسه وانا مش عايزة احكيلي انا بحلم وبشوف ايه؟؟
اللي حصل من شويه دا مش حلم دا حقيقه .. فضلت ماسكه ليان في حضني وانا قاعده عالسرير لحد الصبح وبعدها حطتها جنبي بعد ما نامت ونمت
عدى يومين مافيش حاجه لحد ما في يوم نايمة لقيت حاتم صحي من النوم وطلع الصاله قولت اكيد هيدخل حمام او عطشان بعدها لقيت حاتم راجع وهوا بيمشي بالراحه بصيتله لقيته ماسك سكينه في أيده ورايح ناحية ليان
قومت صرخت وجريت عليه أمسك ايده وهوا يجرني مش راضي يقف .. لحد ما وصل عند ليان وبعدها وقع على الارض كان كان في حاجه بتتحكم فيه وسابته
اتصلت بفيروز كتير ماردتش فضلت اتصل لحد ما ردت قولتلها الحقيني حصل كذا كذا جاتلي البيت وحاتم مغمى عليه مش بيتحرك
جاتلي وشلنا حاتم حطينها على السرير .. واتصلت بخالتها تحجزلنا معاد عند الحجه تهاني .. فضلت فالبيت مع حاتم وراحت فيروز تحكي للحجه تهاني على اللي حصل ورجعت فيروز كان حاتم فاق وقالي سبتيني نايم كل ده ليه احنا في العصر
قولتله معلش حسيتك مرهق خوفت اصاحيك بعدها أصر يلبس وينزل الشغل برده ..وفيروز جت بعدها بشويه ووشها متغير بقولها في أيه .. قالتلي هاتي العمل اللي انتي حاطاه جوه المخدة ..قولتلها من ساعة ما بدات تحصل الحاجات الغريبه دي وانا رميتها في الزباله
قالتلي يا نهار اسود ومنيل .. قولتلها في ايه ؟؟ قالتلي العمل لازم يتفك عشان الجن اللي لبس حاتم حب البنت ومش عايز يسيبكوا .. قولتلها طيب وايه الحل قالتلي مش عارفه هكلمها اروحلها تاني
كان يوم اسود يوم ما كلمناها .. قالت فيروز الكلمة دي ومشيت .. الكلمة جرحتني اوي حاسه اني بقيت تقيله عليها ..فعلا اليومين دول بقيت بشتكيلها كتير وبزن عليها تشوفلي حل ويمكن حسستها بانها السبب او هي ضميرها بيأنبها
المهم مارضتش اتصل بيها قولت هي لما تقابلها تاني ويكون في جديد مش هتتاخر عليا .. بعدها فضلت مستنيه حاتم في الاوضه والوقت اتاخر الساعة كانت 11 بليل.. وبعدها روحت المطبخ اكل حاجه وانا راجعه الاوضه لقيت الخيال الاسود واقف جنب ليان
كنت خايفه جدا بس حبي لبنتي خلاني اروح احميها .. اول ما قربت من باب الاوضه الباب قفل في وشي حاولت افتحه وازقه لحد ما اتفتح معايه لقيت ليان طاير عند السقف وبتعيط وانا مش عارفه اطولها وقفت تحتها وحطيت ايدي وفجأة وقعت على ايدي بسرعه مسكتها ووقعت
بعدها فضلت ابوسها واطبطب عليها المشكله انها ماكنتش بتعيط بصيتلها لقيتها بتبصلي بعيون غريبه اوي
ولقيتها بترجع دم  .. خدتها الحمام وفضلت انضفها واطبطب عليها لحد ما هديت لبست بسرعه عشان اوديها الدكتور كلمت حاتم وفيروز مش بيردوا عليا
رجعت عشان اشيل ليان من عالسرير ..عشان انزل بيها لقيتها طايرة بسرعه ناحية الصاله صرخت وجريت وراها وفجأة لقيت باب البكلونه اتفتح وليان طايره وطلعت بره قلبي كان فعليا هيقف
وبعدها لقيت ليان طايره بره سور البلكونه ولقيت الخيال الاسود شايلها وبيبصلي وانا واقفه على سور البلكونه بحاول اطولها بايدي ومش عارفه وبعدها الكائن الاسود اختفى ..
وليان وقعت في الشارع ماتت وانا ببصلها من فوق ..وببكي بهستريا والناس اتلمت فالشارع لحد ما اغمى عليا
... دخلت حالة اكتئاب رهيبة ..وانا وحاتم اتطلقنا بعد ما حكيتله كل اللي انا عملته وقالي حسبي الله ونعم الوكيل فيكي ..
وفيروز ما بقتش بتكلمني ولا بترد علي تلفوناتي .. رجعت بيت اهلي .. فضلت معاهم 6 شهور بعد الحادثة ..لقيت بعدها فيروز منزله صوره ليها مع طليقها وكاتبه الحمدلله ..رجعنا لبعض تاني
الموضوع نرفزني هي اقترحت عليا اعمل كده عشان اخلف .. ودلوقتي مش بترد عليا ورجعت لطليقها
مابقتش فاهمه حاجه ولا عايزة اكلم حد .. وصلت لمرحه صعبه جدا نفسيا .. والندم وكلمات حاتم بتزن في ودني اني مجنونه وازاي اعمل حاجه زي كده من غير ما ارجعله وازاي ادخل السحر في حياتنا وازاي وازاي وازاي؟؟
ألف سؤال اتسالته مكنتش عارفه ارد عليه كان عقلي غايب وكل اللي نفسي فيه اني اخلف عيل صغير .. جايز لو كنت صبرت زي ما حاتم قالي كان ربنا هيرزقنا بعدها ..جايز كان اخر اختبار ليا في الصبر اني ارفض كلام فيروز واستنى وادعي ربنا لحد ما يرزقني وكان هيرقزني بعدها لو قولتلها لا
فضلت أفكر كتير لحد ما فتحت باب البكونه وجبت كرسي ووقفت عليه .. حطيت رجلي على سور البلكونه ودماغي بتفكر أرمي نفسي وأخلص ولا أرجع وأنتقم من فيروز ..وبعدها طلعت على سور البلكونه وانا بفكر وبصيت تحت رجلي في الشارع .

النــهــايــة
بقلم_عمر_ليمونه